Thempudan 20

Thumanlou Jeh-a Gotna

1Chuin Pakaiyin Mosi henga aseijin, hitin ati, 2Israel chateho henga hitihin seikitnin, Israel chate lah-a kona ahin, Israel gama khopem gamdang mi lah-a kon hijongle, koitobang Molech henga acha pe-a chu; ama chu thatei teiding ahi: agam mite chun ama chu songa asediu ahi. 3Keiman amapa douna-a kamaingat ding, chule amite lah-a kona kapaidoh ding ahi; ajeh chu aman keima muntheng suhbohna ding le keima mintheng suhminset nadingin acha Molech henga apen ahi. 4Chule itiham khatna agam mite chun amapan acha Molech henga apeh chu akimumo sah uva, chule amapa chu atha lou uva ahileh, 5Chuteng chule keiman amapa le a-insung mite douna-a kamaingat ding, chule Molech to jonthanhoi dinga amatoh jong jouse chu amite lah-a kona kapaidoh ding ahi.

6Chule koi hile amaho to jong dinga lhakou ho le doithemho lama kihei tapou chu, amapa douna-a kamaingat ding, chule amite lah-a kona kapaidoh ding ahi 7Hijeh chun nangho kisuthengun lang atheng hiuvin: ajeh chu keima Pakai na-Pathen'u kahi. 8Chule nanghon keima chondan ho nanit uva, natohdoh dingu ahi: ajehchu keima nangho suthengpa Pakai chu kahi.

9 # Pot 21:17; Matt 15:4; Mrk 7:10. Koi hile apa ahiloule anu gaosapma chu thonlouva thatei ding ahi: aman apa ahiloule anu agaosap ahin; athisan chu ama chunga chuding ahi.

10 # Pot 20:14; Thmpu 18:20; Danb 5:18. Chule pasal khat pasal dang ji to jonga, aheng akompa jinu to jonga chu, ajongpa le ajongnu anilhona thatei ding ahi. 11#Thmpu 18:8; Danb 22:30; 27:20. Chule pasal khat apa jinu to lumkhoma, apa sagohkeo hina hodohpeh-a chu, amani chu anilhona thatei ding ahi; amani thisan chu amani chunga chuding ahi. 12#Thmpu 18:15. Chule pasal khat amounu to alupkhoma ahile, amani chu anilhona thatei ding ahi; amanin kidah umtah aboldoh lhon ahitai; amani thisan chu amani chunga chuding ahi. 13#Thmpu 18:22. Pasal khat apasal chanpi khattoh numei to lupkhom banga alup khoma ahile, amani chun kidah umtah abol lhon ahitan; amani chu thatei ding ahi: amani thisan amani chunga chuding ahi. 14#Thmpu 18:17; Danb 27:20. Chule pasal khatnin ajinu le ajinu nu ji-a anei kopma ahile, hichu gitlouna ahi: nalah uva gitlouna aumlouna dinga amapa le amani chu meija hala umdingu ahi. 15#Pot 22:19; Thmpu 18:23; Danb 27:21. Chule pasal khat gancha khattoh alupkhoma ahile, amapa chu thatei ding: chule nanghon agancha jong chu atha dingu ahi. 16Chule numei khatnin gancha khat ajotlutna, chuche tochun alupkhoma ahile, nangman numeinu le gancha chu nathatei ding ahi: amani chu thitei ding ahilhone; amani thisan chu amani chunga chuding ahi.

17 # Thmpu 18:9; Danb 27:22. Chule pasal khatnin asopinu, apa chanu hihen anu chanu hile akichenpi-a, aman amanu sagohkeo amua, amanun amapa sagohkeo amua ahile; hichu gilouna ahi; amani chu amiteu mitmu-a paidoh-a umlhon ding ahi: amapan asopinu sagohkeo hina chu ahodoh peh ahitan; amapan akhangit louna chu akipoh ding ahi. 18#Thmpu 18:19. Chule pasal khatnin numei anatna neipet khat alupia, amanu sagoh hina ahodoh peh-a ahile; amapan amanu twinah ahodoh peh ahin, amanun athisan twinah chu ahodoh ahitai: chule amani chu anilhona amiteu lah-a kona paidoh-a umlhon ding ahi.

19 # Thmpu 18:12-14. Nangman nanu sopinu ahin, napa sopinu hile asagokeo hina naho dohpeh louding ahi: ajeh chu amapan akinaipi a-insungmi ahodoh ahi: amanin achonset nalhon akipoh lhonding ahi. 20Chule pasal khatnin apa-ngahpa jinu alupkhom pia ahile, aman apa-ngahpa sagohkeo hina chu ahodohpeh ahitan: amanin achonset nalhon akipoh lhonding, chabeija thilhon ding ahi. 21#Thmpu 18:16. Chule pasal khatnin asopipa jinu akipuija ahile, hichu thilthenglou ahin: aman asopipa sagohkeo hina ahodohpeh ahi; amani chabeija umlhon ding ahi.

22Hijeh-a chu keiman nangho kahin puilut nadingu gam chun nangho nalohdoh louna dingun; nanghon kachondan ho le kathutana ho nitnun lang chule bolun. 23Chule nangho masanga keiman kakaidoh nam chondan bangin chonhih-un: ajeh chu amahon hitiho jouse hi anabolun, hijeh-a chu keiman amaho chu kahot ahi. 24Ahinla keiman nangho henga, Nanghon amaho gam chu nalo diu, chule hiche bongnoi le khoiju lona gam chu nalo diuva kapeh ding nahiuve, kati ahi. Keima nangho namdang ho-a kona khendoh-a Pakai Pathen chu kahi. 25Hijeh-a chu nanghon satheng le saboh, vacha boh le atheng nakhen dingu ahi: chule sa hile vacha hile chule tolla kitholtho ho hijongle keiman nangho-a kona athenglou ahi tia kakhendoh ho-a kona chu nahinnao thet umtah nasolou dingu ahi. 26Chule nangho keima dinga atheng nahi dingu ahi: ijeh-inem itile Pakai keima hi atheng kahin, chule keima-a tum hidinga nanghohi midang ho-a kona kakhen doh nahiuve.

27Pasal hihen numei hile, lhakou ahiloule doithem hia chu thonlouva thading ahi: amahon amaho chu songa asediu ahi: amaho thisan chu amaho chung mama-a chuding ahi.

Currently Selected:

Thempudan 20: THADBSI

Highlight

Copy

Compare