IPEKULU 9

Pighiche keu Lhoxu Thive

1AMPEU no Muse vilo pi, “Akukau lau wulo eno pilo, Ibrimi Lhou AMPEU no pi ani pilo, ‘Iwu timiqo wuvepelo eno panongu pelo imlla pelo. 2Nono itaghi panongu no wunikeu lo milivetsu aye 3ino oghimeqhi nani tiye owu pighiche keu lhoxu: khurshi, gadaha, kemel, amshi, bheri eno aneqo shou akusu kusa lakhi puwu nanike. 4Ino Israilmi wu pighiche keu lhoxu ngo Ijipmiqo wu kuma dolo kiyequ keu shivetsu nani eno Israilmi wu lhoxu ye thipemo nanike. 5Ni, AMPEU no thoghiuno hipau shinikeu shi ado kihipe puanike.’ ” 6Tishiwo thoghiu ye pano piqhive keu toi AMPEU no tipau shike eno Ijipmi wu pighiche keu lhoxu kumtsu thive ikemu Israilmi lhoxuye lakhimu thimoe. 7Kiu kishive kela akukau no iniju kelo Israilmi wu lhoxu lakhimu thimo keu pa vilo pitsue. Ikemu paye amlo hekike pesu auve eno timiqo pelo wupe move.

Amishe

8Tipathiu AMPEU no Muse ngo Aron pama vilo pi, “Amphoki lono ayevu au ki-e lakhi lulo; akukau zu lono Muse no tipau pesu amlhulo vepuwulo. 9Tiye Ijip yeghiqha kumtsulo qhughu toi phowove nani eno aqha kumtsulo tipau no amishe shi no timi ngo lhoxuqo shou apiyi shive nanike.” 10Ikehu pamano ayevu hami pesu akukau zulo puthugho; Muse no tipau pesu amlhulo vepuku eno tipauno timi philo ngo Lhoxuqo philo amishe ipeghivepe eno apiyi shivepe. 11Kuduumiqoye Muse zulo ipeghi mlave kughengu panonguye Ijipmi kutamiqo toi amisheno panoqo philoghi ipeghiveke. 12Ikemu AMPEU no akukau mlo hekikevetsu eno AMPEU no pivekeu toi akukauye Muse ngo Aron tsa initsumove.

Apughu

13Tileno AMPEU no Muse vilo pi, “Thoghiu inaqhe itheno akukau sasu kusholo eno pavilo Ibrimi Lhou AMPEU no ishi piani pilo, ‘Iwu timiqo puwuvelo tishiaye panonguno imllalu penike. 14Ishiuloye owu kijemi ngo owu timiqo likhi kumono noghi ghimeqhinike, tishi anguno ayeghiqhalo itoikeu milakhimu kuhakeu nono ithi penike. 15Ino iu peqhe puzu kusukini pesu no eno owu timiqo heke napiaye nonguye qhoyi kutsaveni cheke. 16Ikemu ikuka opiyenike ino opelo xuaghi anipeke tishianguno ijekipiye ayeghiqha kuchopulo vekuphawo peniyeke. 17Ikeghi noye qheza laki ani eno iwu timiqo puwomono anike. 18Thoghiu hikutotilo Ijip xu ghililo tikithipu khilemu mthano akeu ino apughu kimishi ghuqhi penanike. 19Tighenguno itehino ahza tsupuzu nowu Lhoxu khijehi khalau chekhani keno ihjeluve kepu qholo qhiluvelo. Apughuno timi na lhoxu pinamu ashou sukusho kuhakemiqo shou qipuku nani eno tipaqoye kumtsu thive nanike.’ ” 20Akukau wu kijemi khamiye AMPEU no pikeulo musave eno pano qemi ngo lhoxuqo akilo ihjeluve penike alou sailove. 21Ikemu kutamiqoye AMPEU no kutughukeulo amlo suyikeu shimoe eno pano Lhoxu ngo aqemiqo khalau qhive.

22Tileno AMPEU no Muse vilo pi, “Ou kunguu peqhelo eno Ijip yeghiqha shou apughu iqighi nanike; timi shou, lhoxu shou eno aluzalo asutsuniqo shou iqighi nanike.” 23Ikehu Muse no pa kusu pesu kunguu peqhe eno AMPEU no tsutsukusu ngo apughu puwutsue eno amusuno ayeghi cheke. AMPEU no 24pasapagha lono apughu ihulokeu puwuke eno tsutsu phano hula hila kuloke. Ijip xu lo titoikeu pasapagha khilemu mutha aphikeu lakhike. 25Ijip yeghiqhalo khalau akeu jeli timi ghi lhoxuqo ghi kumtsu apughuno ghaqhi khave. Tipauno aluzalo asutsuni eno asuboqo kumtsu vechheqhiveke. 26Israilmiqono achekeu Goshen qhalo likhino apughu qimoke.

27Akukau no Muse ngo Aron kupuwu eno pi, “Ishiu loye ino axine shivae; AMPEU no achipiuke eno iwu timiqo ngo ino achipikumoke. 28AMPEU vilo khuinilo! Tsutsukusu ngo apughu hipau lukumkha shi nishou ighivae! Nonguye wuve peniake, ino tushoqhi anike, nonguye hilau ngokithe pemoake.” 29Muse no pa vilo pi, “Ino aphughi lono ipeve kemtsa AMPEU lau iu peqhepe inikhutsu nani eno apughu qimove nanike tishianguno ayeghiye AMPEU wuke pi opelo ithipeni. 30Ikemu ino ithi anike no eno owu kijemiye AMPEU Alhou sumsakeu kuhae.”

31Yeqhiyebo eno asuo thi shipsakhave, asuo thi ye ni ayeake eno yeqhiyeboye mini ipeghi ake. 32Ikemu ashothiye shipusamoe tiye munu nicheni kehuke.

33Muse no akukau qhiveno aphughi lono khalau ipe puzu pau peqhe pesu AMPEU vilo khu inike. Tsutsukusu, apughu eno tsutsughu kumtsu tave. 34Kiu shivetsu keno akukauno ithuluve mu paye axine shikitheuve, pa eno pawu kijemiqoye puzuu tholono amlo hekikepe auve. 35AMPEU no Muse vechewo puzuuno pivekeu toi akukauye Israilmi puwumo nikeu shive.

Currently Selected:

IPEKULU 9: SUMIBSI

Highlight

Copy