IPEKULU 8

Achuyi

1Tithiu AMPEU no Muse vilo pi, “Wupuzu akukau vilo AMPEU no ishi pi ani pilo, ‘Iwu timiqo puwuvelo panongu pelo imllape kepushi. 2Nono mopi aye ino achuyi pesu aghakhu nhaluve peno ghimeqhi nanike. 3Nayil ye achuyino chhive nanike tipaqono tipaa qhiveno okuka kilo, ozuabolo, ozualo, owu kijemi kilo eno nowu timi kilo ighive nani eno nomiphoki eno ali loghi ilove nani. 4Tipaqono oshou owu kijemi ngo nowu timi shou ilhe kughi nani.’ ”

5AMPEU no Muse vilo pike, “Aron vilo aghokiqo shou azula eno azukucho shou pa kusu peqhelo pilo eno achuyiqo pelo Ijip yeghi nhaluve pelo.” 6Ikehu Aron no azu kumtsu shou pa kusu peqhe eno achuyiqono ipeghi puzu ayeghi nhalu veke. 7Ikemu kuduumiqono kuduu peitha eno panongu ghi achuyiqo pelo ayeghilo ipeghipe ke.

8Akukau no Muse ngo Aron kusaghipeno pi, “AMPEU pelo achuyi hipaqo ikhisuwuve penike inikhulo eno ino nowu timiqo pelo wulupenike, tishi anguno nonguno AMPEU lau heqhi mllakeu shilu nani.” 9Muse no ishi khochile, “Niye oghenguno inikhutsu nishi anie, kiu ghuloki lono oghengu eno owu kijemi ghengu eno nowu timiqo ghenguno inikhu penishi anikeno ado kihi tha tsulo. Tithiu achuyiqoye olau no puha khave tsu nani eno Nayil lo likhi auve nanike.” 10Ikelo akukauno pi, “Ighenguno thoghiu inikhu tsulo.” Muse no ishi pi, “Nono khu akeu toi ino tishi tsuni, tileno nono ithi nanike niLhou AMPEU toi kemi alhou kutau kuhae. 11No, owu kijemi eno owu timiqo launo achuyiqo puhave tsu nani ke eno Nayil lo likhi thono kutaulo ye kuhave nani.” 12Tithiu Muse ngo Aron pama ye akukau launo cheve eno Muse no AMPEU vilo akukau shou achuyiqo puwu keu ikhivetsu lo pi inikhu. 13Muse no iniju keu toi AMPEU no shivetsu eno achuyiqo ye aki lono, akikhala lono eno aluza lono thi khave. 14Ijipmino tipaqo amqo kutsasa kichepe qhike, tipaqono ayeghilo tsumuna keu kutolo. 15Achuyiqo thikhave keu akukauno ithulu puzu pamlo hekike pesu auve, AMPEU no puzuu no akukau ye Muse ngo Aron pama tsa initsumo nani kepi pivekeu toi shive.

Amthu

16AMPEU no Muse vilo pi, “Aron pelo pa kusu ayeghilo hesu pelo eno Ijip yeghiqha kumtsulo ayeghi mukhu no amthu ilhou khave peni.” 17Ikehu Aron no pa kusu pe ayeghilo hepuku keu loye Ijip lo ayeghi mukhuno amthu ilho khave eno tipaqono timi ngo lhoxu kumtsu kuzupholuve. 18Kuduumiqo ghi pano wu kuduugha lono amthu kughulho phenike puka putsaju ikemu panonguye tomlave. Ikehu aqha kumtsulo amthu no kumzapu shive, 19ike kuduumiqo no akukau vilo pi, “Alhou no hipau mlavae!” Ikemu akukau ye AMPEU no pipuakeu toi kuthovi kitheveno paye Muse ngo Aron pama tsa initsumove.

Amiyi

20AMPEU no Muse vilo pi, “Thanau inaqhe itheno wupuzu akukauno aghokilo wuche ke lono pa sasu kushono pa vilo AMPEU no ishi pi ani pilo, ‘Iwu timiqo pelo wuve pelo tishianguno panonguno imllalu penike. 21Ino opiputo tsu ani ke nono moepi aye ino oshou owu kijemi eno owu timiqo shou amiyi puwu no oghimeqhi penanike. Ijipmi kilo amiyino chhitoive nani eno ayeghiye tipaqono nhachhive nanike. 22Ikemu Goshen yeghido khilehi iwu timiqono acheni keno tiye ino tipau kutashi qhipua nanike ikehu tilehiye amiyi kiumu kuha nanike. Ino hipau shini cheni tishianguno ni AMPEU no ayeghi hipaulo akumla shi ani kepi nonguno ithi nanike. 23Ino iwu timi ngo owu timiqo dolo kijetha tsu nani, akumzapu michi hipauye thoghiuno shinani ke.’ ” 24AMPEU no akukau kilo ngo pawu kijemi kilo amiyi kumzapu shi tah ighipe ke. Ijip yeghiqha kuchopu amiyi qono shipusa keu sughivetsue.

25Tile akukauno Muse ngo Aron pama kuno pi, “Hipa yeghi lono no Lhou lau heqhi mlla kepushi wulo.” 26Ikemu Muse no khochile pi, “Tiye achipi kumoe, kughengu ninguno AMPEU niLhou lau lhoxu heqhi mlla keuno Ijipmiqo mlo shipusave tsu nanike. Khilehino Ijipmiqono ningu ithulukeu a lono ninguno lhoxuqo heqhipe mlla anapiaye panonguno atu pesu niveqhive nanike. 27Ninguye Alhou no ahza ningu tsuve keu toi asayeqha lo ghulo kuthu lachelo wupuzu niLhou AMPEU lau heqhi mllakeu shimasa ke.” 28Ikelo akukauno pi,”Niye nongu pelo asayeqha lo wupuzu noLhou AMPEU lau heqhi mlla peni, tsala nonguno ala kushuwa lo wumo napiaye. Ighenguno inikhutsu lo.” 29Tile Muse no pi, “Ino cheve kemtsa AMPEU vilo khuini tsuni tishianguno thoghiu amiyi ye olauno, owu ofisermi launo eno owu timiqo launo chevepe nanike. Ikemu noye itaghi nipishiqhi kevilo eno AMPEU lau heqhi mllanike wuni keulo lakha kevilo,” 30Muse no akukau launo cheve eno AMPEU vilo khunitsu, 31Ike Muse no inikhu keu toi AMPEU no tipau shitsuke. Amiyi ye akukau, pawu ofisermi eno pawu timiqo qhive; amiyi lakhi mu ngomove. 32Ikemu ishiu loghi akukauno pa mlo hekikeluve eno itaghi timiqo pelo wupemove ke.

Currently Selected:

IPEKULU 8: SUMIBSI

Highlight

Copy