THUPHUANDOH 22
22
1Huin ama’n hinna tui lui chiimtah, Khristal suang banga val, Pathian leh Belaamnou laltouphah apata hung pawtkhia ahung ensah a. 2Hu khopi kotzing lailung leh a luipang tuaah ah gah chi tuamtuam sawmlenih nei, huleh ha china gah, hinna singkung a um a; huleh hu sing nah chu namte suhdamna diing ahi. 3Huleh hu ah haamsia mawngmawng a um nawn sih diing a; hizongleh Pathian leh Belaamnou laltouphah a um zawta diing hi; huleh a suaahte’n ana a tohsah diing uhi. 4Huleh amahun a meel a mu diing va; a min chu a tal vah a tuang diing hi; 5Huleh huah jan a um nawn sih diing a; thaumei vaah leh ni vaah zong a ngai nawn sih diing uh; ajiahchu Lalpa Pathian in amahuh a taan vaah diing a; huleh amahun kumtuang kumtuang in vai a hawm diing uhi.
Thutawpna
6Huleh ama’n ka kawmah, hi thute hi a ginum in a dih ahi, huleh zawlnei siangthou Lalpa Pathian in sil kibawlpah diingte chu a suaahte musah diingin a angel a sawlta hi. 7Ngai in, kintahin ka hungpah ngei diing hi; hi lehkhabu a soilawhna thute jui photmah chu a hampha hi, a chi a. 8Huleh kei John in hi silte ka mu a, ka ja hi. Huleh ka jaha ka muh tahin hi silte hung musahtu angel keeng bulah be diingin ka puuhta a. 9Huin ama’n ka kawmah En in, hibang bawl hial sin; kei chu nang leh, na unau zawlneite leh, hi lehkhabua thu kisoite juihaw suaah tanpih ka hi; Pathian bia in, a chi a. 10Huleh ama’n ka kawmah, hi lehkhabua soilawhna thute khaahkhum sin; ajiahchu ahun tung diing ahita hi. 11Mi dihlou chu dihlou in um nalai heh, mi bolhhoh chu bolhhoh in um nalai heh; huleh mi dihtat chu dihtat in um nalai heh, mi siangthou chu siangthou in um nalai heh. 12Ngai in, kintahin ka hung hi; huleh michin a silbawl bang jel a piah diing ka kipaahman ka kawmah a um hi. 13Kei Alpha leh Omega, a patna leh a tawpna, a masapen leh a nunungpen ka hi. 14Hinna singkunga tan a neih theihna diing uleh, kota khopi sunga a luut theihna diing va a puansilhte uh sawpsiangte chu a hampha uhi. 15Ajiahchu polamah uite, bumhaatte, tohuuhte, tualthatte, milem bete, huleh koipouh zuau ngaina leh bawlte a um uhi. 16Kei Jesu in kouhtuamte diinga hi thute na kawma hung hesah diingin ka angel ka hung sawl hi. Kei David zungpi leh a haah, huleh jingsol aahsi taang chu ka hi, a chi a. 17Huleh Hagau leh mou in, Hung in, a chi uhi. Huleh a ja taphot in, Hung in, chi heh. Huleh koipouh a dangtaah chu hung heh. Huleh a ut taphot in hinna tui a thawnin la heh. 18Ajiahchu koipouh hi lehkhabu a soilawhna thute ja taphot kawmah ka hesah hi, Mi koipouh in hi thute a behlap inchu, Pathian in hi, lehkhabu a kigial gawtnate a tungah a behlap diing hi. 19Huleh mi koipouh in hi soilawhna lehkhabu thute apat a laahmang inchu hinna singkung leh, khopi siangthou leh, hi lehkhabua kigial silte apat a tan diing chu Pathian in a laahmangsah diing hi. 20Hi thute hesahtu in, Ka hungpah ngei diing hi, a chi hi. Amen. Huchi hi heh, hungta in, Lalpa Jesu. 21I Lalpa Jesu Khrist hehpihna chu na bawnva kawmah umta hen. Amen.
Currently Selected:
THUPHUANDOH 22: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
