THUPHUANDOH 18
18
Babylon khopi loupi puuhna
1Huleh hi silte nungin angel dangkhat silbawltheihna loupitah neia vaan apat hungsuh ka mu a; a loupina in lei a taan vaahta hi. 2Huleh amah chu aw ngaihtahin, naahpitahin a kikou a, Babylon khopi loupi chu a chimta hi, a chimta hi, dawite umna leh, hagau bolhhoh chinteng kulh leh, va sianglou leh kihdahum chinteng bawm ahung hita hi. 3Ajiahchu nam zousiah in a kingaihhaatna lungthahna uain chu a dawnta va, huleh leitung a kumpipate’n amah a kingaihpih va, amah noptatluatna jalin leia sumkawlveite a hausa gawpta uhi, a chi a. 4Huleh vaan apat aw dangkhat ka ja a, Ka mite haw, a sualnate a na tel louh na diingun leh, amahnu toh na thuaahkhawm louhna diingun amah apat hung pawt un. 5Ajiahchu a sualnate’n vaan a suta a, huleh a giitlouhnate Pathian in a he zing ahi. 6Ama’n ahung piah bang ngei in amah pia unla, a silbawl bangjelin a kawmah a lehnih in thuh un; a nou sundimah amah diingin a lehnih in sundimsah un, 7A kiloupisahdan leh, a noptatdan bangjel in bawlgim unla, sulungkham un; ajiahchu ama’n a lungtang in, Kumpinu in ka tou a, meithai ka hi sih, ka lungkham ngei sih diing, a chi hi. 8Hujiahin ni khat thuin amah gawtna, sihna leh, lungngaihna leh kialna ahung tung diing a; amahnu chu mei in a kaangtum diing hi; ajiahchu a tunga vaihawmtu Lalpa Pathian chu a haat ahi, a chi a. 9Huleh leitung a kumpipate, amah na kingaihpiha, amah toh nuamtaha na umte’n, amahnu kaatna meikhu a muh chiangun a kah diing va, 10Amahnu kibawlgimna lau jiaha gamlapi a ding in, Tamaide, tamaide, Babylon khopi loupi, khopi kip, pungkal khat sunga na tungvaihawmna ahung tun taah mei! a chi diing uhi. 11Huleh leia sumkawlveite’n amahnu kahin a suun diing uh; mi koima’n a thuampua uh a lei nawn louh diing jiahin. 12Hu thuampote chu sanate, dangkate, suang mantamte, tuikep suang te, puanmalngaatte, puan sandupte, puannemte, puan sandaangte, sing gimtui chintengte, saiha a kibawl beel chituam zousiahte, sing mantampente, sumengte, siihte, suang kaang beel chi tuamtuam zousiahte; 13Huleh singthaalte, sil gimtuite, sathaumante, begawte, uainte, taangbuangte, gehute, gante, belaamte, sakolte, kaangtalaite, suaahte, huleh mite hinnate bang ahi. 14Huleh silgah na lunggulhte’n nang ahung nuseta va, sil tuituaah leh hoih zousiah in nang ahung paimangsanta hi; hitehaw chu na mu kiit nawn hial sih diing hi. 15Hi siltea sumkawlveite, amahnu jiaha hung hausate chu, amahnu kibawlgimna lau jiahin gamlapi a diingin, kap in a suun diing va. 16Huleh, Tamaide, tamaide, hu khopi loupi, puanmalngaat leh, puan sandup leh, puan sandaang silh a, huleh sana leh suang mantam leh tuikep suang a kijem chu! 17Ajiahchu pungkal khat sung chauh in hibanga hauhsatna loupi bangmahlou ahung suaahta, chi'n. Huleh kuang pu photmah leh, kuang a tuanghaw zousiah leh, kuang mite leh, tui khang liana sumkawlvei photmah chu gamlapi ah a ding va. 18A kaatna meikhu a muh un a kikoukhia va, hi khopi loupi tobang khopi khoiah a um ei? a chi uhi. 19Huleh amahun a lutung va leivui kitheh in a kikou va, kap leh maupum in, Tamaide, tamaide, amah manphatna jiaha tui khang liana kuang neite zousiah suhhauhsat a umna khopi chu! pungkal khat sungin suhsiat ahung hita hi. 20Nang vaan leh, nanguh sawlleh siangthoute leh, zawlneite, amahnu tungah nuam un; ajiahchu Pathian in na phuba uh a tungah ahung laahsahta hi, chi'n. 21Huleh angel haattah khat in buhgawina suang liantah tobang suang khat a la a, tui khang lian ah a paailuut a, Hichibanga naahpitahin Babylon khopi loupi chu paihkhiah ahi diing a, muh kiit in a um nawn het sih diing hi. 22Huleh tengtang tumte tumging bang, la siamte la sah ging bang, gosem muutte muut ging leh pengkuul muutte ging bang na sungah a kija nawn het sih diing hi. Khutsiammi, banglam pouha khutsiam mawngmawng na sungah a kimu nawn sih diing a; huleh buhheehna gin mawngmawng zong a kija nawn sih diing hi. 23Huleh thaumei vaah zong na sungah a taang nawn het sih diing a; mou leh mouneitu aw zong a kija nawn het sih diing hi; ajiahchu na sumkawlveitute hi leitung a miliante ahi va; na bumsiamna a nam zousiah heem a a umtaah jiahun; 24Huleh a sung a’chu zawlneite leh misiangthoute leh, leitung a thah a um zousiahte sisan muh in a umta hi, a chi hi.
Currently Selected:
THUPHUANDOH 18: SIMTBSI
Highlight
Copy
Compare
Share
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
