NDAUHLOUMEI 16
16
Ravguangc Lungpuam Kamkuak Chanei
1Khoutei, “Nangniw tatna Ravguangc kamkuak chanei tei mbaanv khou bun key tho!” twna khwan ranvmei akhat rui kauh baanchara chanei khou tei ravkai khou rui sapatmei ta ai chu the.
2Reymei kauh baanchara tei tat patna katuang kamkuak mbaanv khou bun key the. Khoutei khouringh tuang madancloumei tei phunghmei nunc khatni mi maengc ta tei kalummei nunc khou tei si sihmei suhmei asuc pat the.#Tat 9.10
3Kaneimei kauh baanchara tei rui katuang kamkuak duipui khou bun key the. Khoutei dui tei meic theihmei zei kumc the, kumna duipui khou naimei kalungparik katana theic the.
4Mi tangv kathumhmei kauh baanchara tei rui katuang kamkuak duiriang guay khatni duipuakkai guay khou bun key the. Kumna mi guay tei zei mbaih the.#Tat 7.17-21; Kal 78.44 5Khoutei dui tuang kauh baanchara rui mi kumna samei ai chu e, “Nang tuang latzan hei nchumh e, he Nthanmeipu, nai bam khwanmei khatni nai bammeipu! 6Kaniw rui nthanmei nunc khatni muhzwng nunc zei tikey the. Hei zaeng rui kaniw zangv khang zei tii the. Mi hei kaniw tuang taanv thai e!” 7Khoutei, “Ngguay, Poubauhmei Ravguangc, Ngamparimeipu! Nang tuang latzan guay hei nchumh e khatni nzih e!” twna sa the.
8Padeihmei kauh baanchara tei rui katuang kamkuak neihmik khou bun key the; kumna katuang mai rui meic nunc ta raw khang kakhou tiilou kan the. 9Meic nunc ta tei mi chaenghmei ramchaeng tei rui raw the. Khoutei mi ntaamhmei guay hei tiguangmeipu Ravguangc ta siang the. Kaniw lungh laicna Ravguangc ta kalum mak khe.
10Panguhmei kauh baanchara tei rui katuang kamkuak khouringh tuang guangc bamvpaeng khou tei bun key the. Khoutei khouringh tuang guangcdic tei zingc the, kumna meic guay tei kaniw baley nkayna suhmei tei khaengv the.#Tat 10.21 11Suhmei khatni asuh zaeng khou tei rui kaniw tingkauh Racguangc ta siang the. Kumna kaniw tuang simei taanv guay khou tei rui kaniw lungh laih mak khe.
12Mi tangv charukmei kauh baanchara tei rui daihmei Euphretis Duiriang khou katuang kamkuak bun key the. Khoutei mi duiriang tei thip the, kumna neihpat biak thangcmei guangc nunc rihkey khang chaeng laanclou the.#Isa 11.15 13Mi tangv gou kumhmei nthan makmei bumaengc kathumh ai how e. Mi guay tei thaanngangc mwang khou rui, khouringh mwang khou rui, khatni meicguatmei muczwng mwang khou rui pat re. 14Mi nunc hei charynmei taanv mpeyna taanc bammei ravsic tuang bumaengc nunc e. Ngamparimei Racguangc tuang daihmei Tingmik tuang rihdai adow khang, mbaanv kapwm tuang guangc nunc ta khuam kaduai khang kaniw tat kan the.
15“Zauclo! Ai kaihouhmei guang kumc guang puni the. Paliucna charuangc khou zakmei ariw pw ramc e twna, ntak nrakna katuang pwanrai chamdaanvlouna bampui mei tei sangaymei e!”#Met 24.43-44; Luk 12.39-40; Nda 3.3
16Mi bumaengc guay tei rui guangh guay ta tei Ibri lat khou Harmegiddo twna kawmei bamv khou tiguang kaduailou the.#2 Gu 23.29; Zek 12.11
17Mi tangv chaneimei kauh baanchara tei rui katuang kamkuak mpwan khou bun key the. Khoutei, “Luai the!” twna khwan ranvmei akhat rui Ravkai lungc khou naimei guangh bamvpaeng khou tei rui kauc pat the. 18Khoutei tingpalik ganhkeyna kachin karo the khatni baengladaih zay the. Maansei lungc pat rap khou rui mi kumhmei baengla hei zay kan mak he. Mi hei tanc liangmei baengla e!#Nda 8.5; 11.13,19 19Mi daihmei kaidai tei kalangv kathumh khang zay baklou the, khatni kandih guay tuang kaidai guay tei pangv ngam the. Ravguangc mi daihmei Babilon ta tei amuc mak ge, kumna kaniw ruc khou kalungpuam keylou the.#Isa 51.17 20Duipuidic guay maan ngam the; chyngbut guay ni nai dat mak khe.#Nda 6.14 21Nrihthai daihmei, kilogram riakngu dou nganv nritmei, tingpuk thangc rui meic nunc ruc khou key the. Nrihthai tei rui heidikamv sw kasic karouclou tina meic nunc tei Ravguangc ta siang the.#Tat 9.23; Nda 11.19
Currently Selected:
NDAUHLOUMEI 16: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
