NDAUHLOUMEI 14
14
Thuakpatloumei nunc Lu
1Mi tangv ai zauc pw ki, Lauziu Nac tei Zaion chyng khou ding bammei ta how e. Kaniw sanpiang khou kazanc khatni kapu zanc hyloumei gaanv 144,000 kadaeng khou ding bam e.#Eze 9.4; Nda 7.3 2Khoutei duipui duidai khwan kumhmei, ganhkeymei khwan kumhmei khwan akhat tingkauh thangc rui sakeymei ta ai chu e. Hei tei nrah zay thaymei nunc rui zay patmei nrac khwan kumc e. 3Mi gaanv 144,000 tei khouringh padeih khatni gaanvthaih nunc kadaeng khou bammei guangc bamvpaeng hu khou tei dingna luthanh suan bam e. Kaniw na hamhna mi lu tei meic thay mak ge. Kaniw hei mbaanv kapwm khou rui guangmei thuakloumei nunc e. 4Kaniw hei ntumei rui sw mphuam makmei nunc, ntumei ta kahi makmei nunc e. Kaniw hei Lauziu Nac thei tei kamei tat tat thangc lay tat bammei nunc e. Kaniw hei meic guay pang khou rui thuakpatloumei nunc khatni Ravguangc khatni Lauziu Nac khang katloumei nthai reymei thai kumhmei e. 5Kaniw latsaraamc zat mak ge; kaniw hei kakhuay maekmei nunc e.#Zep 3.13
Kauh Baanchara Gaanv Thumh
6Mi tangv, kauh baanchara akhat tingpuk laan khou samc bammei ta how e. Kandih khou lungc bammei zaatc kathuic, khwang kathuic, lat kathuic, khatni guanghdic kathuic khou dinclou khang tingsaeng gaychamv kakhou nai e. 7Kamei rui kauc ranvna sa e, “Ravguangc ta ping o khatni kata chakhwang champouh o! Kalam thu kamei rui latzan sw nimei ganv guang the! Tingpuk, kandih, duipui khatni duipuakkai guay damcloumeipu ta kalum o!” 8Baihmei kaneimei kauh baanchara kathei lay patna sa e, “Daihmei Babilon tei bow kan the! Zaatc guayna ta katuang nthah boulahmei zouc, lungpuam tithaumei zouc tizangvloumeipui tei bow kan the.!”#Isa 21.9; Jer 51.8; Nda 18.2
9Reymei khatni kaneimei tangv, kathumhmei kauh baanchara pat datna kauc ranvna sa e, “Khouringh khatni kamaengc ta tei kalummei guay ruc khou khatni kasanpiang khou hamh e thei kabaanc khou mi tuang madanhmei tei naimei guay ruc khou, 10Ravguangc lungpuamdai, kasut tuang nai dat makmei lungpuam keylou puni. Kaniw ta tei maipu rui chuangc bammei mai khou nthanmei kauh baanchara nunc khatni Lauziu Nac hu khou rai puni.#Isa 51.17; Tha 19.24; Eze 38.22 11Kaniw ta rai bammei mai tei amit dat lak khe. Mi khouringc khatni kamaengc ta kalummei nunc, kazanc tuang madanhmei tei phunghmei nunc tei zingbangc kalaanv ryanramei nthaekc dat lak khe.”#Isa 34.10
12Mi khou hei, Ravguangc latdanv guay piu bammei khatni Jisu khou lwmnuhmei sw bammei nthanmei guay khaengvthay khang kage nai e.
13Mi tangv, “Mi hei hy o: Ntaw rui thauna Poubauhmei khou theicloumei nunc tei sangaymei e!” twna tingkauh thangc rui sakeymei ai chu e.
“Ngguay, kachangc e! Kaniw ryanra ryanriumei khou rui nthaekc puni the. Kalam thu kaniw tuang taanvthai kaniw thei lay guang e,” twna Bumaengh rui daw e.
Nkhamhmei Latzan tuang Ndawman
14Mi tangv ai zauc dat pw ki, meic nac mpouh kumhmei gaanv khat kachaekc tuang guanghpyrun runna kabaanc khou ntukmei baengkhuai sinna muangh mphwanmei ruc khou dungc bammei ta how e.#Dan 7.13 15Khoutei kauh baanchara baihmei akhat khwan ranvna, “Nang baengkhuai sinna lau tei tay tho. Kalam thu taypui ganv tangc the; mbaanv laupuk hei minc the!” twna muangh khou dungc bammeipu khou tei sa the.#Jol 3.13 16Khoutei muangh khou dungc bammeipu tei rui kabaengkhuai tei rui mbaanv laupuk tei tay the.
17Mi tangv kauh baanchara baihmei akhat tingkauh thangc ravkai khou rui patmei ta ai how e. Kamei ni baengkhuai ntukmei sin e.
18Mi tangv mai ruc khou kangamv naimei kauh baanchara baihmei akhat ravchapaeng khou rui pat the. Ntukmei baengkhuai sinmei kauh baanchara khou tei kamei rui kauc ranvna, “Nang tuang baengkhuai tei sinthau tho, mbaanv tuang drakha lau khou rui kathai guay tei tay tho. Kalam thu drakha thai guay tei minc the,” twna sa the. 19Kumna mi baanchara tei kabaengkhuai tei kandih nam ruc khou zay patna drakha thai chuam guay tei tayna, Ravguangc lungpuam tuang daihmei drakha thai niakpui bamv khou phaiclou kan the. 20Mi drakha thai guay tei nipui bamv kaidai paengc khou ni the, kumna mi khou tei rui zei takuanh mwangkhap kauhmei saan nthukna mail phaynei dou luangc pat the.#Isa 63.3; Ltl 1.15; Nda 19.15
Currently Selected:
NDAUHLOUMEI 14: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
