PHILIPIMEI 4
4
Katiuloumei
1Mi zaeng rui, ai ningna bammei, nzianmei achanathiu, ata tineihlalou nimei, atuang swan pyrun sw nimei, ai nzianmei nangniw, hei tei kumcna Poubauhmei khou ding ntip bam o.
2Eurodia lev Sintuki nangney khou ai zaenghuay e; nangkai swanreynei Poubauhmei khou chwn chamc o. 3Lwmnuhmei ai lev boudu nchamcmei nang ni mi tanpui nei ti hei nkhavlou o. Kaney hei Klemen khatni baihmei ai lev taanv sw nchamcmei ringhmei latrik khou kaniw zanc naimei nunc lev gaychamv dinhmei khou ai lev taanv ranvna taanc guangmeipui nei e.
4Nangniw Poubauhmei khou neihla tanh tan bam o. Ai rui sa dat re: neihla o! 5Nangniw lungh zaenghmei tei meic guayna khou lungc lyan o. Poubauhmei guang zaic puni the. 6Nangniw ramh lam akhat na khang sini lungh katuakc bam riu; tiki nangniw huayneymei kathuic, nangniw khang kage naimei guay tei Ravguangc khou poulou o, thuanckuna ney o. 7Kumna maansei rui thay tangh makmei Ravguangc tuang chuzaenghmei tei rui Khrista khou nangniw lung khatni lungning ta dinggaeklou puni.
8Nkhamh khou, chanathiu, kalingmei, chingkhiuhmei, nchumhmei, nthanmei, meic nzianmei khei, mi kumhmei gaymei thuanckulou biuhmei gunc guay ti hei nangniw lungning khou machunhna bam o. 9Ai rui nangniw khou lat swna nchamlou kanmei khatni akheiliak rui lungc lyanlou kanmei guay tei nangniw taanc bam o. Kum pwkhou, chuzaenghmei tiiloumei Racguangc rui nangniw ta bam duanghlou puni.
Kaipat khang rui Thuanckumei
10Kaganv tingsaengc sihmei tangv, nangniw akhang ningtowlou datmei khang tei ai Poubauhmei khou neihla e. Nangniw akhang ningtowlou taan the twna sa tu hamh e; nangniw khang kadouchamei ariw lamc makna de. 11Mi hei akhang ramh maek khena lungc ryanra the twna sa tuang ni hamh e. Akhou tiilou loumei lwnlung khou tei ai pian thay the. 12Lungcsina akumhna lungc nina cho, lungcgayna akumhna lungc nina cho twmei ni ai thay the. Kumna nggu pw ni, ndaapc pw ni; katitna nai pw ni, liamh laihna nai pw ni, ai pian thay the. 13Khrista rui akhou tiiloumei pumtan paan rui ai ramh guayna ngam the.
14Tiki ai ryanramei dam hei nangniw ni phungc nchamcloumei hei gaymei taanv the. 15Philipimei nangniw thay bammei tei the: i gaychamv dinc guang reymei douc tei, ai Makidonia khou rui tat datmei ganv khou tei ata nkhavloumei phwamling kiu nangniw na de. Gaengmei, rumhmei khou kadam phungc nchamcmei kiu nangniw na de.#2 Ko 11.9 16Ai Thessalonika khou bam khou, luan guayna hamhna akhang kage nai bam khou, nangniw rui nkhavloumei tei tii guang khwan e.#Lat 17.1 17Mi hei ai kaipat laa niina sa tu hamh e; nangniw tuang taanv tei ti-mbu thau khang twna de. 18Nangniw rui tii guangmei guay na tei laatow the. Akhang kage naimei suangc liamh laihna laatow the. Nangniw rui Epaphrodita khou rui tii guangmei kaipat tei rui akhang gaat tuang nai dat mak khe. Hei tei namh gaymei agaw, Ravguangc rui pianmei khatni laalou nuhmei khaengpui puat the.#Tat 29.18 19Ramh khat sini gaat tuang maekmei aRacguangc rui Khrista Jisu paan rui nangniw khang kage naimei guay tiilou puni. 20Aniu Pu Ravguangc tingsaeng hymdaihmei sw diu. Amen.
Dwan Gay Kadymei
21Khrista Jisu khou Ravguangc mei akhat akhat swna meic guay ta ai lev bam chamcmei lwmloumei guay rui dwan gay kady e. 22Mi khou bammei Ravguangc mei guayna rui nkunna Kaisar tuang guangckai khou bammei guay rui dwan gay kady e.
23Poubauhmei Jisu Khrista tuang zauzian nangniw khou naimei sw di tho.
Currently Selected:
PHILIPIMEI 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
