OBADIA 1
1
1Mi hei Kauh Liangmei Ringhpouc rui Edommei lam khou Obadia khou sa guangmei lat re:
Ringhpouc rui Edom Kandic ta Dandi Tii Puni
Ringhpouc rui katuang latdinhmei
gaanv khat ta zaatc nunc khou thouc guang the.
“Thau tho! Aniu Edom kandih ruc khou rihkey di kho!”
twna kamei rui samei aniw chu the.
2 Ringhpouc rui Edom kandic khou sa e,
“Ai rui nang ta zaatc guay pang khou rui ti-nthyamlou puni;
meic guayna rui nang ta mala puni.
3Nang daihlwn swmei rui nang ta guat the.
Nang tuang kaidai hei khowtauh ruc khou swmei rihpan e;
nang kai hei chyng kauhmei ruc khou kauhna swlou bam e,
‘thow rui ata thaek key dat ngam punina cho?’
twna nang kakhanh e.
4Nang rui mouckauh kumc samc kauh bam sini khatni nang bou tei gaanchuangcna rak khou
nang bou duanc bam sini ai rui
nang ta zaykey lou dat puni.
gaanchuangcna pang khou swlou kumc bam sini,
ai rui nang ta zaykey dat puni.
5“Kaihouhmei rui zingbangc guangna,
kaniw kahawmei na kha laa kan de.
Drakhathai reimei nunc rui ni
asaekc thu rei nsaekclou kan de.
Kum e tiki nang ta zauczihmei nunc rui nang tuang khiukhingh guay katham nthan thiak tat kan puni the.
6He Esau kikta nuncle,
nangniw tuang lanv guay asut tat kan the.
7Nangniw gin nunc rui nangniw ta guat the;
kaniw rui nangniw ta nangniw kandic khou rui alay ganc the.
Nangniw champanv nunc rui nangniw ta sinbin the.
Nangniw lev tuzangv nchamc bammei nunc tei rui nangniw khang phah zawlou the;
‘Katuang ningtyng takh guay tei tabui thangc lou kan thena cho?’ twna kaniw rui sa the.
8“Ai rui Edom ta dandi tii pwkhou kiu thu,
ai rui kaniw tuang ntakmei nunc ta swmutlou puni.
Kumna kaniw tuang ningtyng guay giak ganclou puni.
9Temanmei tuang rihphyan nunc ta tipinglou puni,
kumna Edom khou naimei rihmei guay ta swluai puni.
Edom Kandic ta Dandi Tii Nimei Lam
10“Nang rui nang chana, Jakob kikta nunc tuang akwamna laana swluaimei zaeng rui,
nang ta swmutlou puni khatni
tingsaengzaeng ti-malalou puni.
11Kaniw tuang raengckat guay zauhzihmei nunc rui swra khou tei nang kapaengc dingna zauc bam e.
Jerusalem tuang lanv guay phungc tatna kaniw khang nzanh kanmei gin nunc lev
simei nangniw nchamh the.
12Juda khou bammei nang chana nunc rui sansimei khou keylou bammei khang tei nang zaenggay bam lak nimei tuang e.
Kaniw ta swmutloumei ganv khou tei nang neihla bam lak nimei tuang e.
Kaniw ryanramei ta tei nang nuic bam lak nimei tuang e.
13Amei nunc tasiat chari ariwmei ganv khou tei kaniw tuang raengckat khou tei nang gut lak ni tuang e,
khatni tasiat charimei ganv khou tei nang zaenggaylou lak ni tuang e khatni kaniw tuang lanv asut lak ni tuang e.
14Nang chaengkhaek chaengkhaek khou dingna pakduak patmei nunc ta nym bammei tei sw lak nimei tuang e.
Kaniw khang ryanra ryanriumei ganv khou tei nang rui kaniw ta zauczihmei nunc khang nym tii bam lak nimei tuang e.#Isa 34.5-17; 63.1-6; Jer 49.7-22; Eze 25.12-14; 35.1-15; Amo 1.11,12; Mal 1.2-5
Ravguangc rui Zaatc nunc ta Latzan Sw Puni
15“Ringhpouc ai rui zaatc guayna ta
latzan sw nimei tingmik ana the.
He Edomle, nang rui taanc kanmei tei nang ruc khou taanclou dat puni.
Nang rui tiipat kanmei tei nang laa dat puni.
16Amei nunc tei atuang nthanmei chyngbut khou dandi tuang nkhucmei buangc zangv kan the.
Kum e tiki kadaeng khou lungc nkuay bammei zaat nunc hei dandi tuang nkhuc ranvmei buangc zangv puni;
kaniw hei tei zangv ngamparyna mutsut puni.
Isaraelmei tuang Rihngammei
17“Kum e tiki Zaion Chyngbut khou gaanvsaekc pakduaklou puni,
kumna hei tei nthanmei bamv sw puni.
Jakob mei nunc rui kaniw khang tiiloumei ramv tei kaniw laa puni.
18Jakob khatni Josepmei nunc tei mai kumc puni the;
kaniw rui Esaumei nunc ta mai rui ngeic raw kumc raw mutlou puni the.
Esau kikta gaanv khat na ta sini nsaekclou lak khe.
Ringhpouc ai rui sa pat kan the.
19“Juda tuang dihba thangc bammei nunc rui Edom khou lungc puni;
neihkeylou biak chingcphay khou
lungc bammei nunc rui Philistin ta laa puni.
Isaraelmei nunc rui Ephraim lev
Samaria tuang ramv laa puni;
Benjamin mei nunc rui Gilead ta laa puni.
20Isaraelmei tuang nym tat kanmei rihmei nunc dihpy thangc rui hancguang datna Phoenikia
ramv dihpy thangc Zarephat nganv laa puni.
Jerusalem khou rui nym tat kanmei Sardis khou bammei nunc rui Juda tuang dihba khou naimei kaidai guay ta laa puni.
21Jerusalemmei suc-rih ngammei nunc rui Edom ta adow puni kumna mi ti hei sin puni.
Kumna Ringhpouc kamei kahak rui Guangh sw puni.”
Currently Selected:
OBADIA 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
