AMOS 9
9
Ringhpouc tuang Latzan
1 Ringhpouc ravchapaeng daeng khou ding bammei ta ai how the. Khoutei kamei rui kumna latdanv tii the: “Kandih nganv kachyn biuc kaimun py khou tei hy o. Hei tei swbaukeyna meic nunc py khou key kan diu tho. Nsaekcloumei guay ta tei ai rui rih khou swluai puni. Meic gaanv khat na sini pak duak lak khe; meic gaanv khat na sini duak lak khe. 2Kaniw taruaih thangc key bam sini, ai rui kaniw ta mi khou tei nym puni. Kaniw tingkauh thangc ku sini, ai rui kaniw ta zaykey dat puni. 3Kaniw Karmel Chyng twan khou ku dup bam sini ai rui kaniw ta phuna nym puni. Kaniw duipui syng thangc key dup bam sini, duipui thaanngangc rui kaniw ta nkay khang latdanv tii puni. 4Kaniw ta zauczihmei rui nym zay tat bam sini, kaniw ta swluai khang ai rui latdanv tii puni. Ai kaniw ta nkhavlou lak khe, kaniw ta swmaan khang alung ding the.”
5Kauh Liangmeipu Ringhpouc
kandih ta kahi the, Ngamparymeipu rui
kumna kandih kadunh the;
kandih khou lungc bammei guay huayna kap the.
Kandih kapwm hei Nail duithuak kumc kamuatc the.
6 Ringhpouc rui tingpuk kauh khou kakai swlou e,
khatni kamei rui kandih ta
tingpuk rui kagwm swna runlou e.
Kamei rui duipui dui ta kaw guangna kandih nam ruc khou bun keylou e.
Mi guay hei Ringhpouc rui taanclou the.
7 Ringhpouc rui sa e, Isaraelmei nuncle, ai rui nangniw khang kadanmei kumcna Sudanmei nunc khang kadan muay de. Ai rui nangniw ta Izip khou rui nduangh guangmei kumcna ai rui Philistinmei ta Kret khou rui khatni Siriamei ta Kir khou rui nduangh guang the. 8Kauh Liangmeipu Ringhpouc ai rui mi paapc padikmei Isaraelmei guangcdic ta zauc bammei tuang the, kumna ai rui kaniw ta kandih nam ruc khou rui swmaan mutsutlou puni the. Tiki ai rui Jakob kikta kaguayna ta thu swmaan khang hamh e.
9“Zauc lo, Isaraelmei ta nap katang kumc katang khang ai rui latdanv tii puni the. Gaeng makmei guay ta laa ganh khang ai rui kaniw ta zaatc baihmei pang khou katang puni the. 10Amei pang khou bammei paapcmei nunc ta— Ravguangc rui aniu khou simei tiguang bam ni tuang hamh e, twna sa bammei nunc ta rih khou tiswluai puni the.”
Thei thangc Isaraelmei ta Laalou dat Nimei
11 Ringhpouc rui sa e, “Raam ngamna bowkeyna ganclou bammei kai kumhmei David guangcdic ti hei zay thaulou datmei ganv guang puni. Ai rui mi tuang raengc phoumei guay tei katamvlou dat puni. Ai rui hei tei kasiamh datna mi ta tei rey khou lwnlung tei kumclou dat puni.#Lat 15.16-18 12Edom kandic khou nsaekcloumei nunc khatni kaganv akhat khou atuang sw bam khwanmei zaat nunc ta tei Isaraelmei rui laa dat puni,” twna mi guay hei tiguang tangclou pw nimeipu Ringhpouc rui sa e.
13 Ringhpouc rui sa e,
“Nap-bi tithuihlou nimei ganv guang puni the—
lau lingc luai mak khou rui minhmei rui hu puni the,
drakhathai sunc luai mak khou rui lingc dat nimei ganv guang puni the.
Chyngbut guay tei ndeihmei drakhadui nzuk kariph rip puni the.
Khatni luanghbut guay tei drakhadui luangc puni the.
14Ai rui amei nunc ta kaniw kandic khou nduangh guanglou dat puni.
Kaniw rui kaniw tuang sw kasic kanmei kaidai tei kasiamh thau datna lungc puni;
kaniw drakhalau ruaicna drakhadui zangv puni;
kaniw pikwan taanc lana kaniw rui lingc keyloumei thai tu puni.
15Ai rui kaniw khang tiiloumei kandic khou tei
ai rui amei nunc ta lingclou puni;
kumna kaniw ta phuai pat dat lak khe,”
twna Ringhpouc nangniw Racguangc rui sa the.
Currently Selected:
AMOS 9: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
