SINGCHAKH 4
4
Levimei Kohat Puinacmei tuang Thouc Guay
1 Ringhpouc rui Mousi khatni Aron khou kumna sa the; 2Levimei phwam khou rui Kohatmei langv baicna puinac khatni mpouhlang tuang swna hy thau tho. 3Tingkwm 30 khou rui 50 kak khoumei nggaanvmei guayna ta Ringhpouc tuang pheykai khou siamruai sw khang hy o. 4Kaniw tuang taanv tei Nthan Liangmei bamv khou taanc nimei tuang taanv the.
5 Ringhpouc rui kabangc khoumei lat guay hei ni dinclou the. Zypui kalaic nipui ganv khou, Aron khatni kanac mpouh nunc tei kalummei pheykai lungc khou tei gutna Latdyng Khuk hu khou thaengcloumei khamthinghphey tei laa keyna mi phey tei rui mi khuk tei gumbin nina e. 6Kaniw rui mi ruc khou tei ramhgic gaymei rui gumbinlou nina e. Mi ruc khou tei nrymmei phey gumlou nina e. Kumlana puanc nimei phuang kanei tei kanu khou tei karilou nina e.
7 Ringhpouc khang ntyan kat nimei tuang paeng khou tei phey nrymmei rui gumlouna mi ruc khou tei ramh kuak guay, agaw kuak guay, puatkat kuak guay, khatni drakhadui kat nimei tuang muanh tei lou nina e. Mi paeng ruc khou tei ntyan nai tanh tan bam nina e. 8Kaniw rui mi ruc khou tei phey haenghmei gumlou nina e, mi tangv gaymei ramhgic tuang gwm rui gumlou nina e, kumlana puanc nimei phuang kanei tei kanu khou tei karilou nina e.
9Kaniw rui thauhmai hyang tei, thauhmai, tiangkap, puanh kuak, khatni thauhhaan hei guayna ti hei phey nrymmei rui gumbin nina e. 10Kaniw rui thauhmai hyang khatni mi tuang na guay ti hei gaymei ramhgic rui duamna puanc nimei taulai khou tei mbaenglou nina e.
11Mi tangv kaniw rui kachaekc tuang ravchapaeng ruc khou tei phey nrymmei rui gumlouna puanc nimei tuang phuang tei kanu khou tei karilou nina e. 12Nthanmei Bamv khou sinswmei tuang kuak guay tei kaniw rui laa lana mi guay ta tei nrymmei rui duamlou nina e. Kumlana gaymei ramhgic rui hei tei duamlou nina e. Hei tei ni puanc nimei tuang taulai khou mbaenglou nina e. 13Kaniw rui ravchapaeng mbut tei laa ganc lana ravchapaeng ruc khou tei haengcnrymmei phey rui gumlou nina e. 14Ravchapaeng khou sinswmei na guay: maikuak, rwang, suakkuak, zeisiankuak hei guay hei mi ruc khou tei mbaenglou nina e. 15Zypui kalaic nimei ganv khou Aron khatni kanac mpouh guay rui nthanmei tuang puat guay tei duamlou ngam pwkhou rui Kohat puinac nunc rui guangna mi guay tei puanc nina e. Kohat puinac mei nunc tei nthanmei puatc tei kahi nuh mak ge; kahilou e thei kaniw theic puni. Kalummei pheykai tei kalaihpui ganv khou Kohat puinac mei rui taanc nimei thouc guay kiu mi hei the.
16Aron nac mpouh amuh Eleazar rui pheykai, mai thauc, agaw, taektw puatkat, teymei thauc, khatni Ringhpouc khang katgutlou kanmei pheykai khou naimei katana tei kathouc sw nina e.
17 Ringhpouc rui Mousi lev Aron khou sa the, 18Levimei phwam khou rui Kohatmei puinac mei nunc mut kan mak khang sw nina e. 19Kohatmei nunc nthan liangmei bamv khou gut bam sini theih mak khang Aron khatni kanac nunc rui gutna Kohatmei kathuic khou sw nimei thiak dinclou nina e. 20Tiki Kohatmei nunc rui gutna nthanmei puat nunc ta zauc nuh mak ge, zauc e thei theic puni.
Levimei Gershon Puinacmei tuang Thouc guay
21 Ringhpouc rui Mousi khou sa the; 22Levimei Gershomei nunc ta ni puinac puinac mpouhlang mpouhlang swna meicsing hy o. 23Ringhpouc tuang pheykai taanv taanc nuhmei tingkwm 30 khou rui 50 kak khoumei nggaanvmei guay ta zanh hy thau nina e. 24Kaniw tuang thouc thu kabangc khoumei puat guay hei puanhmei e: 25pheykai, mi tuang kalungcmei phey, kapaengcmei gwm, karuc khou gumbinloumei tuang gaymei ramhgic, kaimunphey, 26pheykai raengvphey lev kariang guay, kairaenghmun phey, khatni mi guay hei katinghloumei tuang na guay hei e. Mi puat guay khou hei taanclou nimei tuang thouc naimei guay tei kaniw rui taanh khang e. 27Gershonmei nunc rui phunghmei puni hamh e thei baihmei taanv pwni taanhmei guay tei Aron khatni kanac nunc rui dincloumei khou tei taanc nina e. Puatc phungc nimei mung guay kaniw dam sw khang katiulou nina e. 28Gershon puinac mei rui kalummei pheykai khou taanc nimei thouc guay kiu mi hei the. Amuh Aron nac mpouh Ithamar rui kaniw ta dinc nina e.
Levimei Merari Puinacmei tuang Thouc Guay
29Merarimei nunc ta tei puinac puinac mpouhlang mpouhlang swna meicsing hy o twna sa the. 30Ringhpouc tuang pheykai taanv taanc nuhmei tingkwm 30 khou rui 50 kak khoumei guayna sing hy o. 31Kaniw tuang thouc swna puanc nimei kiu thu: Katiangc, kaphuang, kalang, katiangc bam, 32kairaengv tuang ntiangh, ntiangh bam, muihtiangc, kariang, khatni hei tei suamcthau nimei na guay hei the. Meic kathuicna puat langv akhat akhat puanc khang e. 33Merari puinacmei rui pheykai khou taanc nimei tuang thouc kiu mi hei the. Amuh Aron nac mpouh Ithamar rui dincloumei theilayna kaniw taanh khang e.
Levimei nunc Sing Phuhmei
34Kumna Mousi, Aron khatni Isaraelmei kapy nunc rui Kohatmei nunc ta puinac puinac mpouhlang mpouhlang swna meicsing hy thau khwan e. 35Ringhpouc tuang pheykai khou taanvtaanc biuhmei tingkwm 30 khou rui 50 kak khoumei guay ta zanh hylou the. 36Kaniw rui puinac puinac swna zanh hyloumei sing hei 2,750 khwan e. 37Mi hei Ringhpouc rui Mousi khou latdanv tiilouna pheykai khou siamruai sw bammei Kohatmei nunc ta puinac puinac theilayna Mousi lev Aron rui meicsing hyloumei e. 38Gershonmei nunc ta tei puinac puinac mpouhlang mpouhlang swna hyloumei kiu 39Ringhpouc tuang pheykai taanv taanc biuhmei tingkwm 30 khou rui 50 kak khoumei ta e. 40Kaniw rui puinac puinac mpouhlang mpouhlang swna hyloumei sing hei 2,630 e. 41Mi hei Ringhpouc tuang latdanv theilayna pheykai khou siamruai sw bammei Gershonmei nunc ta puinac puinac swna Mousi lev Aron rui meicsing hyloumei e. 42Merari nac mpouh nunc tuang kaikhunc sing puinac puinac khatni mpouhlang mpouhlang tuang kaikhunc guay 43tingkwm 30 lev 50 kak khoumei kalummei pheykai khou siamruai sw nuhmei 44kaikhunc sing chak pwkhou 3,200 e. 45Mi guay hei Ringhpouc latdanv theilayna Mousi lev Aron rui chakloumei Merari nac mpouh nunc tuang kaikhunc pang e. 46Mousi lev Aron khatni Isaraelmei kapy swmei guay rui Levimei kaikhunc khatni kaniw pupouc tuang kaising chaklou e, 47tingkwm 30 lev 50 kak khoumei kalummei pheykai tuang siamruai taanv taancna karith phungc ngammei 48kaniw rui chakpatloumei sing kiu 8,580 khwan e. 49Ringhpouc rui Mousi khou latdanv tiimei theilayna meic kathuicna zanc hy the; khatni Mousi khou tii guangmei Ringhpouc tuang latdanv theilayna meic kathuicna khou siamruai taanv khatni phungc puanhmei taanv tiilou the.
Currently Selected:
SINGCHAKH 4: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
