SINGCHAKH 3
3
Aron nac Mpouh nunc
1 Ringhpouc rui Mousi khou Sinai chyng khou kachucloumei ganv khou tei Aron lev Mousi kai kaikhuncmei heikumna nai bam khwan the. 2Aron tei kanac mpouh gaanv padeih e: gaanvthaihmei Nadab, Abihu, Eleazar khatni Ithamar hei nunc hei the.#Sin 26.60 3Kaniw ti hei thauh teylouna amuh suanglou khwan e, 4kum e tiki Nadab lev Abihu ta thu kaniw Sinai tazikramv khou bam khou kaney rui nthan makmei mai rui Ringhpouc khang khaeng timei zaeng rui swluai kan the. Kaney nac maek khwan e, kumna Aron ringh saanv Eleazar lev Ithamar rui amuh sw khwan e.#Lev 10.1,2; Sin 26.61
Amuh nunc Siamruai Sw khang Levimei ta Kadahmei
5 Ringhpouc rui Mousi khou sa the, 6“Levimei kaikhwang ta phungc guangna amuh Aron tuang siamruaimei khang kaniw ta suamclou tho. 7Atuang kalummei pheykai khou taanc nimei taanv guay tei kaniw rui taanc nina e khatni amuh nunc lev meic nunc khang taanclou nimei taanv guay tei ni kaniw rui taanc nina e. 8Pheykai tuang na guay tei kaniw tuang thouc swna zauc nina e khatni Isaraelmei guay khang taanclou nimei thouc guay tei kaniw rui taanc nina e. 9Nang rui Isaraelmei maansei kaguayna khou rui Levimei khatni kakikta heizumei ta Aron lev kanac mpouh nunc tuang siamruai sw khang tii patpary nina e. 10Nang rui Aron khatni kanac mpouh nunc ta tei amuh tuang taanv taanh khang kadahlou nina e; meic baihmei rui nthanmei bamv khou guang ana pw e thei kamei ta swluai nina e.”
11 Ringhpouc rui Mousi khou sa the, 12Zauclo Isaraelmei maansei guay khou rui nareimei ta akhang reicpatloumei phaan tei Levimei ta reicpatlou dat the. Levimei hei atuang e. 13Nareimei guay tei atuang e. Ai rui Izipmei nareimei guay ta swluaimei ganv khou tei Isaraelmei tuang maansei ni khouringh ni nareimei guay ta atuang swna reicpatlou khwan e. Ai hei Ringhpouc e.#Tat 13.2
Levimei nunc Sing Phuhmei
14Sinai chyng tuang tazikramv khou bam khou tei Ringhpouc Mousi khou sa the. 15Levimei nggaanvmei bw khat khatni akhat ruc mei guay puinac puinac mpouhlang mpouhlang swna zanh hy tho. 16Kumna Mousi rui hei tei taanc the. 17Levi tei kanac mpouh gaanv thumh Gershon, Kohat khatni Merari hei nunc hei nai khwan e. 18Gershon tuang kaikhwang zanc phunghmei kanah nunc kiu Libni khatni Shimei e. 19Kohat nac nunc kaikhwang zanc phunghmei ruina Amram, Izhar, Hebron khatni Uzziel e. 20Merari nac nunc kaikhwang zanc phunghmei ruina Mahli khatni Mushi e. Mi guay hei Levi tuang mpouhlang zanc nunc the.
21Gershon puinac khou mpouhlang kanei Libni lev Shimei nai e. 22Mi puinacmei bw akhat suangc gaanvthaihmei zanc hyloumei nggaanvmei sing rui 7,500 e. 23Mi puinac hei pheykai tuang kaithei biak neihkey biak thangc zypuikai sw nina e. 24Lael nac mpouh Eliasap hei mi puinac tuang kapy the. 25Kaniw tuang thouc khang tiiloumei thu: pheykai, kalungcmei gwm, kapaengcmei kainam, kaimun tuang kaikhamvphey, 26pheykai tuang raengv phey, karaengv tuang kaimunphey hei khou taanc nimei thouc naimei kaguayna tei kaniw rui taanh khang e.
27Kohat puinac khou Amram, Izhar, Hebron, khatni Uzziel mpouhlang nai e. 28Mi puinacmei bw akhat ruc mei zanh hymei nggaanvmei kaguayna meic 8,600 e. 29Mi puinacmei hei pheykai tuang dihba biak thangc zypuikai sw the. 30Uzziel nac mpouh Elizaphan rui kaniw tuang kapy sw the. 31Kaniw tuang thouc khang tiiloumei kiu thu: Latdyng Khuk, ntyanpaeng, Nthanmei Bamv khou amuh nunc rui sinswmei kuak guay, thauhmai tiangc, ravchapaeng Nthan Liangmei bamv daengcthingloumei khamthinghphey hei guay khou taanc nimei thouc naimei kaguayna tei kaniw tuang thouc the.
32Levimei nunc tuang kapy hei amuh Aron nac mpouh Eleazar e. Kamei hei Nthanmei Bamv khou taanvswmei nunc ta zauhmeipu e.
33Merari puinacmei khou mpouhlang kanei Mahli khatni Mushi nai e. 34Mi puinacmei bw akhat ruc mei nggaanvmei zanh hyloumei meicsing hei 6,200 e. 35Mi puinacmei hei pheykai tuang dihpy biak tei kaniw tuang zypuikai sw nina e. Abihail nac mpouh Zuriel rui mi puinac tuang kapy the. 36Kaniw thouc sw khang tiiloumei kiu thu: kalummei pheykai tiangc, kaluang, katiangc, kabam, khatni mi khou tei duancloumei na guay hei the. Mi na guay khou sw nimei taanv guay tei kaniw thouc the. 37Kairaengv tuang tiangc, kabam, muytiangc khatni riang guay tei ni kaniw tuang thouc the.
38Mousi, Aron khatni kanac mpouh nunc tei pheykai kaihu, neihpat biak tei kaniw tuang zypuikai katingh nina e. Nthanmei Bamv khou Isaraelmei khang taanc nimei taanv guay tei kaniw tuang thouc the. Meic baihmei rui nthanmei bamv khou guang anapui mei ta swluai nina e. 39Ringhpouc tuang latdanv theilayna Mousi rui Levimei nggaanvmei bw akhat khou rui karuc ku kanmei guay ta zanh hyloumei meicsing hei 22,000 e.
Nareimei Mpouh Guay Phaan Levimei rui Lynmei
40 Ringhpouc rui Mousi khou sa the. Isaraelmei nareimei nggaanvmei guay bw khat khatni mi ruc kukanmei guay zanc hy thau o. 41Isaraelmei nareimei phaan Levimei ta akhang laalou o khatni Isaraelmei tuang puancreymei khouringh khounah phaan Levimei tuang puancreymei khouringh khounah tei laalou o. Ai hei Ringhpouc e. 42Ringhpouc rui latdanv tiiloumei theilayna Mousi rui Isaraelmei nareimei guay zanc hy the. 43Nareimei bw khat khatni mi ruc mei nggaanvmei kaguayna zanc hyloumei sing kiu 22,273 e.
44 Ringhpouc rui Mousi khou sa the, 45“Ntaw thu Isaraelmei mpouh nareimei phaan tei Levimei ta akhang katgutlou nina e, khatni Isaraelmei tuang khouringh puanc reymei phaan tei Levimei tuang khouringc tei katgutlou nina e. 46Isaraelmei mpouh nareimei guay tei Levimei suangc 273 geic mbu the, hei zaeng rui mbumei mpouh guay tei nangniw rui thuak nina e. 47Meic gaanv khat khang daandi paek panguh tiina thuak nina e. 48Mi tuang syan hei Aron khatni kanac mpouh nunc khang tii nina e.” 49Levimei nunc rui thuakpatloumei tangv meicsing mbumei manv tei Mousi rui laa the. 50Isaraelmei nareimei nunc khou tei rui Ravkai tuang dath theilayna shekel 1365 laa the. 51Ringhpouc rui dincloumei theilayna thuakmei manv tei Aron khatni kanac nunc khou tei tii kan the.
Currently Selected:
SINGCHAKH 3: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
