SINGCHAKH 11
11
Tabera twna Kawmei Bamv
1Meic nunc tei kaniw khou ryanramei guangmei hei Ringhpouc tuang e twmei chu pwkhou Ringhpouc ta nutna sa the. Hei tei Ringhpouc rui chu pwkhou lunghpuamc the kumna kaniw ruc khou mai tiikey the. Hei tei kaniw rak khou chuangc the kumna zypui katin akhat raw the. 2Nkhavlou khang meic nunc tei rui Mousi khou kauc thau the; kamei rui Ravguangc khou huayneylou pwkhou, mai tei amit key kan the. 3Kumna mi bamv zanc tei Tabera twna phuaklou the, kalam thu hei khou tei Ringhpouc tuang mai kaniw rak khou raw the.
Mousi rui Kapy Swmei Gaanv 70 Kadahmei
4Isaraelmei nunc thei lay tat bammei zaatc baihmei asaekc rui taektw khang lat sw thau the. Isaraelmei nunc nganvna “Zanh katit na sini tu khang nai e thei gay ni ki twna lat sw thau khwan the! 5Izip khou thu katy-kamanv key maekna khav hei tu nii saanv tu de. Ngeicnathai, duangkhathai, maruai, chalouc, gannamv heidi mphamh bammei tei ningtow e! 6Ntaw thu aniu pumtan hei suan key the. Tu khang ramhkhat na sini maek khe— tingmik pum mi manna na hei tu kaluaih phik bammei hei hamhna baihmei maek khe!”
7Manna hei mphuan nzinh zinna ramhthw launa kumc e.#Tat 16.31 8Meic nunc rui tat nkuayna khuaic the, hei tei kamut sowpat lana lai khou suangc the hamh e thei ntyan paek kasiamh the. Hei tei Olive thauc louna kasiamh loumei mahauc nai e. 9Hei tei zypui bamv khou zingbangc chaeng zik thei laykey raph rap khwan e.#Tat 16.13-15
10Kaniw tuang pheykai guay kaimun khou meic kakang kakang dinglouna khuay sw bammei tei Mousi chu the. Kamei kalung ryanra the kalam thu Ringhpouc rui kaniw ta lunghpuamc the. 11Kumna Mousi rui Ringhpouc khou sa the, “Tabui swna mi kumhmei ramrianra hei akhou tiguanglou bam tu cho? Tabui swna mi nunc ti hei chaengzay nimei thouc guay hei akhou tiilou bam tu cho? 12Mi nunc ti hei ai rui damcloumei tuang ni hamh e, ai rui puancloumei tuang ni hamh e! Tabui swna ai hei nahpui kumcna kaniw ta angana ta kumcna abaanc khou puanc lana kaniw pupouc khou nrianhloumei kandic nduangh tangclou khang akhou tiilou bam tu cho? 13Mi nunc khang hei tii biuc tabui thangc rui ai khav-zanh laa nina cho? Kaniw khuay swna zanh ney bam e. 14Ai arana mi nunc tuang rith hei phungc ngam mak khe; akhang nrit langv khe. 15Nang rui ata heikumna piu bam ni de tw e thei thu, nang tuang nzianthay makmei taanv tei akhaengv bam dat mak khang ata zauc nzianlouna swluailou pu tho.”
16 Ringhpouc rui Mousi khou sa the, “Meic nunc rui kaniw tuang kapy nunc the twna laamei chakhwang sw nuhmei 70 khuam tho, kumna kaniw ta atuang pheykai khou tei adaeng khou nduangh guangna nang daeng khou ding bam khang kaniw khou sa ti tho. 17Ai khoutei keyna nang ta kachuc puni the, kumna ai rui nang khou tiilou kanmei bumaengc asaekc tei nang khou rui laana kaniw khou tii puni the. Kumna kaniw rui mi nunc tuang rith tei nang ta phungc nkhav puni the, kumna hei tei nang rana phungc dat ni tuang hamh the. 18Ntaw thu meic nunc khou tei kumna sa tho, ‘Nthuanh khang nangniw pumh nthan tho; nthuanh nangniw zanh tu khang nai puni the. Nangniw khuay swna zanh ney bammei tei khatni nangniw khang Izip rui gay de twna sa bammei tei Ringhpouc chu the. Ntaw thu Ringhpouc rui nangniw khang zanh tii puni the, kumna hei tei nangniw tu puni the. 19Nangniw rui hei tei zaeng neih khat, neih nei, zaeng panguh, ruh, zaeng 20 na tuna taan ni tuang hamh the, 20tiki bw akhat, nangniw ruak tu tangh mak saanv, nangniw tu chany mak saanv tu puni the. Nangniw khou bammei Ringhpouc kata ganc patna nangniw Izip khou rui tatpat lak nimei tuang e twna sa bammei zaeng rui mi hei tiguangmei tuang the.’ ”
21Mousi rui Ringhpouc khou sa the, “Khou hei ai meic 600,000 ta nduangh tat bam e, kumna mi nunc khang bw khat tu biuh khang zanh akumhna tii nina cho? 22Kaniw ta titu pian biuc khouringh dowluai diwna cho? Duipui khou naimei khav guay hei rui biuc puni dina cho?”
23 Ringhpouc rui daw the, “Akhang ngam lakmei tuang naina cho? Ai rui samei hei guang tangc ny guang tangh mak ny nangniw nthuanh thay puni the!”
24Kumna Mousi rui tatpat lana Ringhpouc rui samei tei kaniw khou dinclou the. Kamei rui kapy swmei gaanv 70 khuam kaduaina kaniw ta kalummei pheykai daeng khou tiding haengvlou the. 25Khoutei Ringhpouc muangh khou keyna kata kachuc the. Kamei rui Mousi khou tiilou kanmei bumaengc tei asaekc laana kapy swmei gaanv 70 khou tei tiilou the. Bumaengh tei kaniw khou guanglou pwkhou kaniw tei muhzwng nunc kumcna ravmun dinc thau the, kum e tiki kaniw tei sw dat kaluaih mak ge.
26Kapy pang khou tei Eldad lev Medad thu kalummei pheykai thangc tei pat makna zypui bamv khou bam khwan e. Mi zypui khou bumaengh tei kaney khou ni guanglouna kaney ni muhzwng kumcna ravmun dinc thau the. 27Eldad lev Medad rui sw bammei tei salou khang chabwan gaanv khat Mousi daeng khou pak guang the.
28Khoutei Nun nac mpouh, alauc khou rui Mousi baanhou sw guangmeipu Joshua rui Mousi khou sa the, “Kaipoucle, kaney ta khaamv keylou tho!”
29Mousi rui daw the, “Athouc khou tei nang lunggeih bam tu cho? Ringhpouc rui katuang bumaengc meic kathuicna khou tiilouna kaniw guayna ta muhzwng kumcna tikauclou pw e thei gay nii e twna ai ning e!” 30Mi tangv tei Mousi tei kapy swmei 70 tei lev twna zypui bamv thangc tei guang dat the.
Ringhpouc rui Akhuaihna Tii Keymei
31Thay mak daekna Ringhpouc rui mpwan tipatna duipui thangc rui akhuaihna pang phungc guang the, hei tei sianphai kamv kamv na khou samc guang the. Hei tei zypui bamv khou khatni mi daeng nkuaymei zaeng neih khat chaengkaamv lungc khou keytow padiklou the. 32Kumna zingbangc kalaanv akhuaihna tei nym the; meic kathuicna kilogram 1000 khou rui key makna khuamlou the. sw kangh khang kaniw tuang zypuikai daeng guay tei phauc padik the. 33Kaniw zanh tei tu khang nai geicna bammei ganv khou tei, Ringhpouc rui meic nunc ruc khou tei lunghpuamc the kumna kaniw khou tei meic ryam tiguang the. 34Mi bamv zanc tei Kibroth-hattaava “Agaamvmei Taroubamv” twna kaw the, kalam thu zanh agaamvmei nunc ta tei mi bamv khou tei phuplou the.
35Mi bamv khou tei rui Hazerot khou guang the, kumna hei khou tei zypui sw the.
Currently Selected:
SINGCHAKH 11: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
