SINGCHAKH 10
10
Daandi tuang Bianggun Kanei
1 Ringhpouc rui Mousi khou sa the, 2“Meic nunc ta kaw kaduai khou khatni zypui kalaic ni khou sinsw khang tandiak rui dymei daandi tuang bianggun kanei kasiamh o. 3Bianggun kanei tei zaysaengcna amuan e thei meic nunc tei atuang pheykai kaimun khou tei nang daeng khou guang kaduai nina e. 4Kum e tiki bianggun akhat na amuan e thei kaikhwang tuang kapy nunc na tei nang daeng khou guang kaduai nina e. 5Bianggun amuan duina amuan e thei neihpat biak bammei kaikhwang guay tei pat nina e. 6Amuan duina bianggun tei kaneimei swna amuan pwkhou dihba biak thangc bammei kaikhwang guay tatpat nina e. Zypui kalaic khang kakhwan duina bianggun tei amuan nina e, 7guang kachwn khang rui amuan saengcna amuan nina e. 8Bianggun tei amuh Aron nac nunc rui amuan nina e.
“Kabangc khoumei riak hei guang nimei ganv guay khou ni ngaekna lungc nina e. 9Nangniw kandic khou suc-rih naipui ganv khou nangniw ta zauczihmei nunc khou tei rui nangniw rana nangniw ta gaek nina e. Suc-rih guangpui ganv khou bianggun tei amuanna rih chamv dinc nina e. Ringhpouc, nangniw tuang Racguangc ai rui nangniw ta nkhavlou puni khatni gaeklou puni. 10Nangniw tuang neihla zaenggaypui ganv khou — bwthanh Ngai guay khatni baih baihmei ngai guay khou — nangniw tuang rawna khaengmei khatni alamvpuatkat katmei ganv khou bianggun tei amuan nina e. Kum pwkhou ai rui nangniw ta nkhavlou puni. Ai hei Ringhpouc nangniw tuang Racguangc e.”
Isaraelmei Sinai khou rui Zypui Kalaicmei
11Isaraelmei rui Izip khou rui tatpatmei tangv kaneimei kwm kaneimei bw tuang zaeng 20 puineic Ringhpouc tuang pheykai ruc khou bammei muangc tei ku kan the. 12Kumna Isaraelmei Sinai tuang tazikramv khou rui tatpat the. Mi muangc tei Paran tuang tazikramv khou guang nthaekclou the.
13 Ringhpouc rui Mousi khou latdanv swna tii guangmei theilayna kaniw tat thau the. 14Kaniw rui tat thaupui kathuic thei-hu tatmei thak tei kalaic makna tat tanh tan e. Juda kaikhwang rui chaengzaymei phwam tuang chuangcphey bangc khou bammei nunc tei rui tat rey the. Amminadab nac mpouh Nashon rui kapy swna kalangv kalangv swna tat the. 15Zuar nac mpouh Nethanel rui Isakar kaikhwang tuang kapy khatni 16Helon nac mpouh Eliab rui Zebulun kaikhwang tuang kapy swna tat the.
17Mi tangv tei kalummei pheykai tei rakey lana Gershon khatni Merari puinac rui hei tei puancna tat the.
18Mi tangv tei Reuben kaikhwangmei bangc khou bammei phwam tei tat thau the. Shedeur nac mpouh Elizur rui kapy swna kalangv kalangv swna tat the. 19Zurishaddai nac mpouh Shelumiel rui Simeon kaikhwang tuang kapy swna, 20khatni Deuel nac mpouh Eliasap rui Gad kaikhwang tuang kapy swna tat the.
21Mi tangv tei Levimei Kohat puinacmei tei nthanmei puat guay tei puancna tat thau the. Zypui tei guang tangc pwkhou, kalummei pheykai tei katinghlou bam dat the.
22Mi tangv tei Ephraim kaikhwang bangc khou bammei nunc tei tat thau the. Ammihud nac mpouh Elishama rui kapy swna kalangv kalangv swna tat the. 23Pedazur nac mpouh Gamaliel rui Manase kaikhwang tuang kapy 24khatni Gideoni nac mpouh Abidan rui Benjamin kaikhwang tuang kapy swna tat the.
25Nkhamhliang khou thei thangc gaekna tatmei langv, Dan kaikhwang bangc khou bammei nunc langv Ammishadai nac mpouh Ahiezer rui kapy swna kalangv kalangv swna tat thau the. 26Okran nac mpouh Pagiel rui Aser kaikhwang tuang kapy 27khatni Enan nac mpouh Ahira rui Naphtali kaikhwang tuang kapy swna kaamc thau the. 28Mi hei Isaraelmei rui zypui kalaihmei kathuic tatmei ramtat the.
29Mousi rui Reuel nac mpouh Hobab Midianmeipu khou sa the, “Ringhpouc rui aniw khang tii ni twna nrianhloumei kandic thangc aniw tat puni the. Aniw thei lay guang o ai rui nang ta kungc kadanlou puni de kalam thu Ringhpouc rui Isaraelmei guay khang latdyng gaymei swlou bam e.”
30Hobab rui daw the, “Tat lak ge. Ai akandih khatni ariang aluaic thangc tat dat kan ni the.”
31Mousi rui sa the, “Aniw ta ganclouna tat riu. Tazikramv khou tei tabui bamv khou zypui sw nuh cho twmei nang thay e, nang rui aniw ta chaengzay nina the. 32Nang aniw thei lay guang pw e thei Ringhpouc rui aniw khang tiimei suaihiam nang khang ni tii ni de.”
Isaraelmei tei Tat Thau Datmei
33Isaraelmei tei Sinai, nthanmei chyngbut khou tei rui tat thauna kaniw zaeng neih thumh chaengkaamv tat the. Kaniw zypui swlou dat nimei bamv thay khang Ringhpouc tuang Latdyng Khuk tei kaniw hu khou titat the. 34Kaniw zypui kathuic khou rui tatpatmei sik, kalaanv chaeng Ringhpouc tuang muangc tei kaniw ruc khou tat bam khwan e.
35Latdyng Khuk tei puancthau nimei kathuic, Mousi rui kumna sa the,
“Thaulou o, He Ringhpouc!
Nang ta zauczihmei guay ta tei hacpianglou o;
nang ta zauczihmei guay nang hu khou rui pak kandiu.”#Kal 68.1
36Guang nthaekcna loukey nimei kathuic kumna kamei rui sa the,
“Guanglou dat ro, He Ringhpouc,
Isaraelmei ching ching mei guay ruc khou hei guanglou dat ro.”
Currently Selected:
SINGCHAKH 10: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
