NAHUM 3
3
1Saraamhmei, meicbiw-meicdowmei kaidai hei
amaan puni the,
asut animna laa khang lanv padikna nai the!
2Nking o! takuanh kathamvmei khwan tei,
gari haengv luanghmei khwan tei,
takuanh pang pakmei khwan tei,
takuanh gari guay pak kanukcmei khwan tei!
3Takuanh ricmei nunc adow gut the,
baengsaeng guay palikh palik the,
buy guay karang the!
Phouh khuan nsuang the,
phouh hei kasing thay mak khe—
meic nunc rui mi ta tei niibin gut the!
4Nineve mangcsangmeiluc ta dandi tii the.
Kamei hei howgay e theic nuhmei
duaih-raengh rui padik ge.
Kamei rui zaatc nunc ta nthiam patna bangh tisw the.
5Ngamparymei Ringhpouc rui sa e,
“He Nineve, ai rui nang ta dandi tii puni the!
Ai rui nang pheybaan kathangv paliuc duaklou puni the,
kumna zaatc guay ta nang ta tizauc puni the,
nang zakmei lwn tei tizauc puni the.
6Ai rui nang ta karaengna sw puni the kumna nang ta tanacmei rui gumbinlou puni the.
Meic nunc rui nang ta chanyna zauc puni the.
7Nang ta howmei guay rui tangsyn kan puni the.
Kaniw rui sa puni e, ‘Nineve hei
sw kasic karoucna ganclou bam bu the!
Thow rui kata lunghsuhlou nimei naina cho?
Thow rui kata swmlou nimei naina cho?’ ”
8He Nineve nang hei Izip tuang kaidai Thebes suangc gay mbumei tuang naina cho? Kata ni dui ruina raengh kumcna raenglouna gaek bam khwan e. 9Kamei rui Sudan khatni Izip ta sin bam khwan e, kangamv tei kanganv maek khwan e; Libia ta kagiang sw khwan e. 10Tiki Thebesmei nunc ta bangh nym kan the, chaengkwn kathuic khou kaniw nac nunc ta kathamv luailou kan the. Kaniw khou kapy swmei nunc ta kangriang ntalouna zay tat kan the kumna kaniw ta nymmei nunc khang nzanh kan the.
11He Nineve, nangniw ni zouh zangv mba puni the! nangniw ni nangniw ta zauczihmei nunc khou rui duak khang karamc puni e. 12Nangniw tuang rihgaekkai guay tei minhmei tadutthai bang kumc puni the: kabang tei kanukc tina, kathai nang mwang khou keymei tei kumc puni the. 13Nangniw tuang ricmei nunc tei ntumei kumc the khatni nangniw kandic tei zauczihmei hu khou rihmei maek kumc puni the. Nangniw tuang raengcmun guay tuang kaikhamvtaan guay tei mai rui ntei mut puni the. 14Dingbin nimei khang tei dui zu chamdaanvlou la tho, kumna nangniw tuang rihgaekkai sw tanc la tho! Niangtauc kasiamh khang bih buat la tho, kumna niangtauc kasiamhmei khuk tei chamdaanv la tho! 15Nangniw rui tabui tabui sw bam sini, nangniw ta raw luai puni the hamh e thei rih bamv khou swluai puni the. Phunling tei nkav rui tu ngammei tei kumcna nangniw ta kathamv key puni.
Nang hei alunkav kumc geic pat the! 16Tingpuk gaanchuangcna suangc nang tuang lanvguanh-lanvdaenghmei sing geic the! Tiki ntaw thu kaniw guay tei alunkav samc maan kumc amaan ngam kan the. 17Nang tuang meicdaihmei nunc tei tingsei khou ngaengsaengc khou thuap padik bammei alunkav pang kumc the. Tiki neihpat pwkhou mi guay tei samc tat kan the, mi guay tei tabui thangc tat kan cho twmei thay dat mak khe.
18He Asiriamei guangcle, nang tuang dihsinpouc nunc theic the, khatni nang tuang meicdaihmei nunc tingsaeng zip kan the! Nang mei nunc ta chyngbut guay khou zinphaklou kan the, kumna kaniw ta kai khou phungc guanglou dat nimei meic maek khe. 19Nang zam guay tei tikuak dat khang ramh maek khe, kumna nang tuang zamzei guay tigay dat ngam ni tuang hamh the. Nangniw ta sw kamut kamailoumei chamv chumei guay rui neihlana baanhhiw puni the. Nang tuang kanganv maekmei meic nzimei taanv khou rui thowkumhmei duakmei nai bu cho?
Currently Selected:
NAHUM 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
