MAIKA 1
1
1Jotham, Ahaz, khatni Hezekia rui Judamei guangc swna bammei douc, Moreshet kaidai khou bammei Maika khou Ringhpouc rui mi lat hei tiguang khwan e. Ringhpouc rui mi guay hei Maika khou Samaria lev Jerusalem lam khou ndauhloumei tuang e.#2 Gu 15.32-38; 2 Ki 27.1-7; 2 Gu 16.1-20; 2 Ki 28.1-27; 2 Gu 18.1—20.21; 2 Ki 29.1—32.33
Samaria khatni Jerusalem khang Latlumei
2Mi hei nking o, zaatc guaynale;
mi hei chu lo,
kandih nam ruc khou lungc bammei maansei katana!
Kauh Liangmei Ringhpouc rui nangniw khuay kalauh puni the.
Nking o! Katuang tingkauh
ravkai khou rui kamei sa pat puni the.
3 Ringhpouc kamei katuang nthanmei bamv khou rui pat pw the;
kamei keyna luanghbut guay
twan ruc khou tat puni the.
4Khou kiu luanghbut guay tei khuailiu nungh kumc nungc puni the;
luanghkauh thangc rui dui luangc key kumc hei tei nzaengc baek khou luangc key puni the.
5Isaraelmei rui paapc taancna liammei zaeng rui mi guay hei pat puni the. Isaraelmei rui lat liammei hei thow zaeng rui cho? Kaniw kaidai Samaria rui the! Juda khou ravmaengc kalum bammei hei thow khuay cho? Jerusalem khuay e! 6Kumhpui zaeng rui Ringhpouc rui sa e, “Ai rui Samaria ta meic lungc taekna gancloumei bamv, drakha linghpui bamv tiswlou puni. Mi kaidai tuang rakeyloumei ntauh raan guay tei nzaengc baek thangc bun keylou puni, kumna mi kaidai tei laa nkyduaklou puni. 7Mi tuang kunghmei ravmaengc guay tei diangcpuat paruatlou puni, ravkai tuang mangcsangmeiluc nunc khou tiiloumei puat guay tei mai rui swmaan puni, kumna mi tuang ravmaengc guay tei kakhuan swna ganclou puni. Samaria rui mi guay hei kingckiucmei rav khou thouh swmei khou piu khang nthah boulahmei tuang manv khou rui khuamloumei tuang puat pang e, ntaw thu mi guay tei kabamv baih thangc kalum tat khang kata zauczihmei nunc rui phungc tat kan puni the.”
8Khoutei Maika rui sa the, “Hei zaeng rui ai huayna latlu ni the. Alung kabiumei lyanna ai pumtang aphay nsyn rui ruan ni the. Ai asacsi muh kumc kap ni the khatni ostrich kumc huay ni the. 9Samariamei zam guay tigay dat ngam pu lak khe. Juda ni hei tei kumcna ryanramei ariw puni the; sw kamut kamaimei tei amei nunc lungc bammei kaidai Jerusalem kaidai raengckat guay khou guang tangc the.”
Zauczihmei nunc Jerusalem khou Guangmei
10Gat khou bammei aniw ta zauczihmei nunc khou tei aniw ta zaw tisiloumei chamv hei dinclou riu; nangniw kap bammei ta kaniw khou tihow riu. Beth Leaphramei nuncle, mbut ding khou niangcna nangniw lungh kabiumei lyan o! 11Saphirmei nunc nangniw, pumtang zakna tatpat tho. Zaanan khou lungc bammei nunc kaniw tuang kaidai khou rui tat twan pat bauh mak khe. Bethezelmei nunc rui latluna kapmei nangniw chu pwkhou, hei khou tei duploupui bamv maek khe twmei nangniw thay puni the. 12Marotmei nunc duakpat khang lunghgeicna nkhwan bam e, kalam thu Ringhpouc rui tiguangmei sw kamut kamai nimei Jerusalem raengckat daeng khou guang tangc the. 13Lakis khou lungc bammei nuncle, takuanh nunc khou tei gari goulou tho. Nangniw rui Isaraelmei paap lailuaih the kumna nangniw rui Jerusalem ta paapc tisw the. 14Ntaw thu Judamei nuncle, Moreshet Gat kaidai khou ntamvmei lat kadylou la tho. Akzip kaidai rui Isaraelmei guangh nunc ta nkhavlou dat pw lak khe.
15Mareshamei nuncle, Ringhpouc rui nangniw ta nangniw kaidai laa khang guangmei zauczihmei nunc baanc khou tiilou puni the. Isaraelmei tuang katik kagunc daihmei kapy nunc tei Adullam khowlang khou nkamh puni the. 16Judamei nuncle, nangniw nzianmei alauc nunc khang rui huayna nangniw py guat tho. Nangniw py langdia py kumcna guat nkyduakh duaklou tho, kalam thu nangniw nac nunc ta tei nangniw pamv khou rui bangh khang zaytat kan puni the.
Currently Selected:
MAIKA 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
