LEVITHOUC 9
9
Aron rui Khaengmei Taanv Taanhmei
1Zaeng tachat tanghmei nungc tei Mousi rui Aron, kanac mpouh khatni Isaraelmei gaanvthaih nunc ta kaw guang the. 2Kumna kamei rui kaniw khou sa the, hiaksuimei guaituamchic launa khatni lauziuchic laa lana guaituamchic tei rui paapc khang khaeng tho kumna lauziuchic tei rui rawna Ringhpouc khang khaeng tho. 3Mi tangv tei, paapc khang khaeng khang ziuchic akhat, rawna khaeng khang hiaksuimei tingkwm akhatmei guaituam launa akhat khatni tingkwm akhatmei lauziunac akhat 4khatni alamvpuatkat khang guaituamchic akhat lev lauziuchic akhat laaguang o twna meic nunc khou sa o. Thauh kazauhmei ntyan katmei lev twna kaniw hei tei kat nina e. Kalam thu aseic hei Ringhpouc kaniw khou lyanlou puni.
5Mousi rui samei guay tei kaniw rui kalummei pheykai kaimav khoutei phungc guang the, kumna Ringhpouc ta kalum khang meic kapwmna khoutei guang kaduai the. 6Khoutei Mousi rui sa the, “Ringhpouc tuang hym tei nangniw khou lyanlou diu khang mi hei taanc o twna Ringhpouc rui nangniw khou latdanv tiimei tuang the.” 7Khoutei kamei rui Aron khou sa the, “Nang tuang paap khatni meic nunc tuang paap kuaklou khang ravchapaeng khou tei guangna paapc khang khaengmei rawna khaengmei taanv tei taanc tho. Meic nunc tuang paap kuaklou diu khang, Ringhpouc tuang latdanv theilayna mi hei kat tho.”#Ibr 7.27
8Aron rui ravchapaeng khou guangna kapaap khang khaeng nimei guaituamchic launa tei dowluai the. 9Kanac mpouh nunc rui zei tei kakhou laaguang the, kumna kabaanczung zei khou tei ntin lana ravchapaeng chei guay khou tei teylou the, kumna nsaekcloumei guay tei ravchapaeng phaybi khou tei bunlou the. 10Mi tangv tei Ringhpouc rui Mousi khou tiiloumei latdanv theilayna kamei rui kathav, kaki nei, khatni kathyn khou gay liangmei langv tei ravchapaeng khou kat the. 11Kum e tiki kazanc khatni kagic tei thu kalummei pheykai paengc thangc laa patna ntei the.
12Kakhang rawna khaeng nimei khouringc tei ni kamei rui swluai the. Kanac mpouh nunc rui zei tei laaguang pwkhou kamei rui zei tei ravchapaeng naek padeih khou tei kazinhlou the. 13Kaniw rui kapy khatni baihmei zanc bangv guay tei ni kakhou tiilou the, kumna kamei rui mi guay tei ravchapaeng khou raw the. 14Kamei rui kalungcna khatni katan tei khiu lana ravchapaeng khou rawna khaengmei puat ruc khou tei louna ntei the.
15Mi tangv Aron rui meic nunc tuang puatkat tei kat the. Meic nunc tuang paap khang khaeng nimei ziuc tei kamei rui laana hei tei dowluaina, kapaap khang katmei thak tei kumcna hei tei kat the. 16Rawna khaeng nimei khouringc tei ni laaguangna hei tei dincloumei kariak thei suicna khaenglou the. 17Ntyan kat nimei tuang tei ni kamei rui laaguangna, ntyan buay baankiu akhat ruaina ravchapaeng khou tei ntei the. (Mi hei tingmik pum kat bammei tuang khou tei haaploumei tuang e.) 18Meic nunc khang rui alamvpuatkat kat nimei guaituamchic khatni lauziuchic tei kamei rui dowluai the. Kanac mpouh nunc rui zei tei kakhou laaguang the, kumna kamei rui hei tei ravchapaeng naek padeih khou tei kazinhlou the.#Lev 3.1-11 19Kumlana guaituamchic lev lauziuchic tuang thav, kamai bangbi, kalungcna guay ta duammei karavpaek, kaki kanei khatni mi khou tei naimei thav khatni kathyn khou gay liangmei 20mi kathav guay hei kaphurou khou tei mbaenglouna Aron rui ntei the. 21Kumlana kaphurou kanei tei khatni baanzat theinaeng tei nkunmei kaipat swna Ringhpouc mav khou Mousi tuang latdanv theilayna katlou the.
22Aron kamei rui khaeng nimei tuang taanv guay taanc luailouna meic nunc ruc khou tei kabaanc zaythauna suaihiamlou the, kumna kamei tat key dat kan the.#Sin 6.22-26 23Kumna Mousi lev Aron tei Ringhpouc tuang kalummei pheykai lungc khou tei gut the, kumna kaney pat dat lana kaney rui meic nunc khou tei suaihiamlou the. Khoutei Ringhpouc tuang chanh chanmei hym tei meic nunc khou lyanlou the. 24Thay mak daek khou Ringhpouc rui mai tikeyna ravchapaeng khou naimei rawna khaengmei tuang ravcha guay tei raw kan the. Hei tei meic nunc rui how pwkhou, kaniw tei kauc ranvna kauc thau the kumna kaniw zaw kandih khou sow nkhum key the.
Currently Selected:
LEVITHOUC 9: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
