LEVITHOUC 10
10
Nadab lev Abihu rui Paapc Taanhmei
1Aron nac nei, Nadab lev Abihu rui agaw nteimei kuak akhat laa lana maithyn haenghmei louna agaw ntupclou the kumna kaney nthan makmei mai Ringhpouc khou kat the, mi mai tei kat khang nuhloumei tuang hamh khwan e. 2Dyngmak khou Ringhpouc rui mai tikeyna, mi bamv khou tei Ringhpouc hu khou kaney ta raw luai the. 3Khoutei Mousi rui Aron khou sa the, “‘Atuang siamruai swmei guay thu atuang nthanmei ta chakhwang sw nina de; ai rui amei nunc khou ahym lyanlou puni,’ twna Ringhpouc kamei sa bammei tei mi hei the.” Aron tei reih reina bam the.
4Khoutei Mousi rui Aron pulauc Uzziel rui puanhmei Mishael lev Elzaphan ta kaw guangna kaney khou sa the, “Nangney guangna nangney chana nei tuang phouh ti hei mi kalummei pheykai khou rui kapaengc puanc patna lou kan tho.” 5Kumna kaney rui guangna theihmei nei tuang thiula tin tei biancna Mousi tuang latdanv theilayna kapaengc thangc puanc pat kan the.
6Khoutei Mousi rui Aron khatni kanac mpouh Eleazar lev Ithamar khou sa the, “Nangniw sam nthut kut kutna bam nuh mak ge, nangniw phey ni siat nuh mak ge. Nangniw hei tei sw e thei, theic puni, khatni Ringhpouc lungpuam Isaraelmei kapwm ruc khou keylou puni. Kum e tiki Ringhpouc tuang mai rui swluai kanmei nei khang hei Isaraelmei riangluaicmei guay rui latlu nuh e. 7Nangniw thu mi kalummei pheykai kaimun khou rui tat pat re thei theic puni. Kalam thu nangniw ta thu Ringhpouc tuang thauc teylouna katgutlou kanmei tuang di the.” Kumna Mousi rui samei tei kaniw taanc the.
Amuh nunc rui Taanc Nimei Riak
8 Ringhpouc rui Aron khou sa the, 9“Nang ni nang nac nunc ni zouh zangv lana atuang pheykai khou gut nuh mak ge; gut re thei theic puni. Mi hei nangkik nangta guay rui ni ngaek bam nimei latdanv e. 10Tabui tei Ravguangc tuang cho, tabui tei kiuc hamh cho khatni tabui tei nthanmei cho tabui tei nthan makmei cho twmei nangniw kalangv thayna sw nina e. 11Ai rui nangniw khang Mousi khou tiguang kanmei latdyn guay tei nangniw rui Isaraelmei nunc khou dinclou bam nina e.”
12Mousi Aron khatni ganclou duhmei kanac mpouh gaanv nei, Eleazar lev Ithamar khou sa the, “Ringhpouc khang katloumei ntyan buay khou rui nsaekcloumei tei laana khay loumakmei ntyan kasiamhna ravchapaeng daeng khou tei tu o, kalam thu mi tuang puatkat tei nthan dianghmei e.#Lev 6.14-18 13Hei tei nthanmei bamv khou tu o, mi hei Ringhpouc khang katloumei tuang khou rui nang khang khatni nang nac nunc khang tiiloumei dam e. Mi latdanv hei Ringhpouc rui akhou tiiloumei tuang e. 14Amuh nunc khang rui nkunmei puatkat khatni puatkat swna Ringhpouc khang tiiloumei kaphurou khatni theitan nei tei thu nang kai kaikhunc tu nuh e. Hei tei kariak khou nthanmei bamv akhat khou tu nuh e. Isaraelmei nunc rui alamvpuatkat khou kat guangmei khou rui nang khatni nang nac nunc khang tiiloumei tuang langv the.#Lev 7.30-34 15Kathav tei Ringhpouc khang guang katpui ganv khou theinaeng khatni kaphurou tei ni kaniw phungc guang kazauh nina e. Ringhpouc tuang latdanv theilayna hei tei nang khatni nang nac nunc khang e.”
16Paapc khang khaengmei ziuh lam khou tei Mousi rui thanv pwkhou, hei tei mai ntei kan the twmei chu the. Khoutei kamei rui Eleazar lev Ithamar ta kalungpuamcna sa the, 17“Tabui swna paapc khang khaengmei zanc tei Nthanmei bamv khou tu mak tu cho? Hei tei nthan dianghmei e, kandihmei paap kuaklou khang rui Ringhpouc rui hei tei nangniw khang tiiloumei tuang the.#Lev 6.24-26 18Mi tuang zei tei nthanmei pheykai khou phungc gut makpui zaeng rui, atuang latdanv theilayna hei tei nangniw hei khou tei tu nimei tuang di the.”
19Aron rui daw the, “Paapc khang khaengloumei puat tei ai aseic hei tu ti thei tabui tuang pat puni cho? Hei tei rui Ringhpouc ta tineihla puni dai cho? Aseic hei meic nunc rui paapc khang Ringhpouc khou khaengna, kaniw rui rawna kat the, kum tisini hei kumhmei tuang hei aruc khou guanglou the.” 20Mousi hei tei chu pwkhou pian the.
Currently Selected:
LEVITHOUC 10: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
