LEVITHOUC 27
27
Ringhpouc khang Katloumei Puatkat
1 Ringhpouc rui Mousi khou sa the, 2Isaraelmei guay khou kumna sa o. thowkumhmei gaanv khat ta nkunna swloumei tuang latdyng theilayna Ringhpouc khang tiilou e thei, kabangc khoumei thak kumcna syan rui thuak dat nuh e: 3Tingkwm 20 khou rui 60mei nggaanvmei: daandi paek 50, 4meic phamei ntumei: daandi paek 30, 5tingkwm panguh khou rui 20mei nggaanvmei: daandi paek 20, ntumei e thei daandi paek ruh, 6tingkwm panguh bangcmei nggaanvmei nac: daandi paek panguh, ntumei e thei: daandi paek 3, 7tingkwm 60 ruc mei nggaanvmei: daandi paek 15, ntumei e thei: daandi paek ruh. Mi hei Ravkai khou tat bammei chaengc theilayna chakna sw nina e.
8Latdyng swloumeipu tei lungcsi langvna riatloumei chaengc khou tei tii ngam mak ge thei, kamei rui mipu ta tei amuh khou phungc guang nina e, kum pwkhou amuh tei rui kamanv tei key maihna kamei rui tii diwmei chaengc khou dinglou puni.
9Kamei rui nrianhloumei tei Ringhpouc khang puatkat swna tii nuhmei khouringh bam khwan e thei, Ringhpouc khang tiilou kanmei khouringc tei nthanmei di the. 10Mi khouringc phaan tei baihmei nsin dat nuh mak khe. Nsin e thei thu hei kaguay tei Ringhpouc tuang de. 11Kamei rui nrianhloumei khouringc tei, nthan makmei, Ringhpouc khang kat nuh makmei khouringc zaat re thei thu, mipu tei rui mi khouringc tei amuh khou phungc guang puni. 12Kumna mi khouringc tei simei gaymei theilayna amuh tei rui kamanv tei riatlou puni. Kumna mi manv tei kalaic dat nuh mak khe. 13Kakaipouc rui hei tei liu dat nii e thei, kamanv ruc khou tei panguh khou akhat louhaapna liu dat nina e.
14Thowkumhmei rui Ringhpouc khang nthanmei tuang swna kai katlou e thei, amuh tei rui mi kai tuang simei gaymei tei zauc lana kamanv kaklou puni. 15Mi kai tei katloumeipu tei rui laa dat nii e thei, kamanv ruc khou tei rui panguh khou akhat haaplouna tii nina e.
16Thowkumhmei rui katuang laupuk Ringhpouc khang katlou e thei, mi laupuk khou tei loukeymei napphwn khou rui kamanv chak puni — sipian kaduk 20 khou daandi paek 50 tuang chaengc khou chak puni. 17Ramv tei Jubili tingkwm luai rapna katlou e thei, kamanv kapwmna tei laa puni. 18Kum e tiki kanakmei tangv rui katlou tuang e thei, Jubili guang tangh khang naimei tingkwm sing tei chakna amuh tei rui kamanv tei kaklou puni. 19Laupouc tei rui hei tei liu dat nii e thei kamanv ruc khou tei rui panguh khou kadam akhat haaplouna liu dat nina e. 20Kamei mi laupuk tei thuak datmei phaan khang thowkumhmei khang zuanclou e thei kamei thuak dat ngam mak khe. 21Jubili guang tangc pwkhou thu mi ramv tei Ringhpouc tuang sw nzut kan ni the. Hei tei amuh nunc tuang sw kan ni the.
22Thowkumhmei rui kamei rui liuloumei ramv Ringhpouc khang katlou e thei 23amuh tei rui mi ramv manv tei Jubili guang nimei hu khou naimei tingkwm sing theilayna kaklou puni, kumna mipu tei rui mi ramv manv tei mi nungc kahak tei tii nina e. Mi ramv manv tei Ringhpouc tuang the. 24Jubili tangc pwkhou mi ramv tei ramvpouc khang hamh e thei katou kanac nunc khang hanclou dat nina e.
25Kamanv guay tei Ravkai tuang tat bammei kadath khou dinglou puni. Gera 20 rui Shekel akhat sw puni.
26“Khouringh khou puanc reymei tei thu Ringhpouc tuang rap di the, hei zaeng rui hei tei thu kat niina katmei puatkat swna kat dat nuh mak khe. Guaihnac pwni, lauziunac pwni, ziuhnac pwni hei tei thu Ringhpouc tuang di the. 27Tiki nthan makmei khouringh nac guay tei thu kamanv ruc khou rui panguh khou akhat lou haapna liu dat nuh e. Kamei rui hei tei liu dat mak ge thei meic baihmei khang kamanv ling khang zuanc nuh the.
28“Thowkumhmei rui Ringhpouc khang maansei pwni, khouringh pwni, ramv pwni, ravnyng sw khang katloumei tei zuanc nuh mak ge, liu ni liu dat nuh mak ge. Hei tei Ringhpouc tuang nthan dianghmei di the.#Sin 18.14 29Ravnyng sw khang katloumei maansei ta nganvna liu dat nuh mak ge, swluai nina e.
30“Mi kandic khou rui patmei nap-bi pwni, tingthai pwanpiu pwni kadam ruh tuang akhat tei Ringhpouc tuang e. Mi hei Ringhpouc khang thu nthanmei e.#Sin 18.21; Ria 14.22-29 31Kakaipouc rui hei tei laa dat nii e thei dingloumei manv ruc khou tei rui 100 khou 20 haaplouna liu dat nina e. 32Kiruai guay ni ruh khou akhat tei Ringhpouc tuang e. Khouringh tei chak pwkhou ruh mei khouringc kathuic tei thu Ringhpouc tuang e. 33Hei tei simei khouringc khou keylou khang sw nuh mak ge khatni kaphaan nsin nuh mak ge. Kamei rui nsin e thei kaguayna tei Ringhpouc tuang e. Hei tei liu dat nuh mak khe.”
34Mi latdanv guay hei Isaraelmei khang Ringhpouc rui Sinai Chyng khou tii guangmei latdanv e.
Currently Selected:
LEVITHOUC 27: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
