LEVITHOUC 22
22
Nthanmei Puatkat guay tei
1 Ringhpouc rui Mousi khou sa the, 2Aron khatni kanac mpouh nunc khou kumna sa o, “Nangniw rui azanc nthanmei ta sw kasic mak khang Isaraelmei akhang katloumei nthanmei puatkat tei kungc kadanna sw o, ai hei Ringhpouc e. 3Nang kikta thow thow pwni kamei nthan makna bampui ganv khou, akhang katmei nthanmei puatkat daeng khou tei guang tuanc e thei, mi mei ta kiuc swluai ganc puni. Mi hei thei thangc nganvna piu nina e, ai hei Ringhpouc e.
4“Aron kikta gaanv khat na sini naengv nuhmei meicgic ravpuat naipui mei khatni kapumc khou tanacmei tatpui mei tei kamei nthan dat mak saanv nthanmei tuang puatkat akhat na sini tu nuh mak ge. Amuh akhat tei rui theihmei pumc ta kahilou e thei hamh e thei khurou tuang tanacmei tat re thei kamei tei nthan mak khe. 5Kamei nthan makmei maansei khatni mphuammei khouringh ta kahilou e thei kamei nthan mak khe. 6Mphuam kanmei amuh akhat tei kamei tingzyn nganvna nthan mak ge, kumna kamei duilow dat mak saanv nthanmei taektw tu nuh mak ge. 7Neih key tang kan e thei kamei nthan dat the, kumna kamei rui tu nimei nthanmei taektw tei tu dat nuh the. 8Karana theicloumei hamh e thei khouringh rui swluailoumei zanc kamei tu nuh mak ge, hei tei rui kata swtanac puni. Ai hei Ringhpouc e.
9“Amuh guay rui atuang nthanmei riak tei lat piu makmei khuay phungcna theih mak khang ai rui saloumei lat ngaek nina e. Ai hei Ringhpouc e kumna ai rui kaniw ta sw nthanlou the.
10“Nthanmei puatkat guay tei amuh kai kaikhuncmei na rui tu nuh e; meic baihmei gaanv khat na sini — katuang gin khatni kamei rui niaklouna sinsw bammei gaanv khat na sini hei tei tu nuh mak ge. 11Tiki amuh tei katuang syan rui liuloumei bangc nunc, hamh e thei kakai khou rui puanhmei bangc nunc thu amuh nunc tuang taek tei tu nuh e. 12Amuh nac aluh amuh hamhmei khou micloumeipui tei thu nthanmei puatkat tei tu nuh mak ge. 13Tiki amay swna hamh e thei muloumei swna kanac maekna kapu daeng khou guang lungc bam datmeipui tei thu kapu rui amuh swna laaguangmei taektw tei tu nuh e. Hei tei amuh kai kaikhuncmei na rui tu nuh e.
14“Amuh kaikhwangmei thowkumhmei rui hei tei tu maanvlou e thei, kamei mi puat manv khou tei 100 khou 20 haaplouna khangclou dat nina e. 15Amuh tei rui nthanmei puat Isaraelmei rui katloumei tei 16meic nunc ta tituna sw mphuam nuh mak ge khatni hei tei rui kaniw ruc khou khuay tiphungc guanglou nuh mak ge. Ai hei Ringhpouc e kumna ai puatkat tei sw nthanlou the.”
17 Ringhpouc rui Mousi khou sa the, 18Aron khatni kanac mpouh nunc khatni Isaraelmei nunc khou kumna sa o: Isaraelmei hamh e thei Isaraelmei pang khou khuam bammei zaatc baihmei rui pwni kalatryan tiguang tanghmei tuang pwni, tii niina tiimei tuang pwni, rawna khaengmei khouringc tei 19guaichic pwni, ziuchic pwni hamh e thei lauziuchic tei hiaksuimei khouringc laalou nuhmei puatkat swna kat nina e. 20Hiaksui makmei khouringc kat tina thu Ringhpouc rui laalou ni tuang hamh e.#Ria 17.1 21Thowkumhmei rui katuang latdyng tiguang tanghmei tuang pwni, tii niina tiimei pwni, alamvpuatkat swna kat pwkhou, kat nimei khouringc tei hiaksuimei nina e. Kum pwkhou rui laalou nina e. 22Kamik tiatmei, katan baumei, khatni nggai nggiumei khouringc Ringhpouc khang kat nuh mak ge. Mi kumhmei khouringc tei nangniw rui rawna khaeng nuh mak ge. 23Kat niina katmei puatkat khou thu hiaksuimei hamh sini nuh e, tiki latdyng tiguang tanghmei tuang puatkat khou thu hei tei nuh mak khe. 24Kapumc siammei khouringc Ringhpouc khang kat nuh mak ge. Mi hei nangniw tuang kandic khou sw nuh mak ge.
25Kandih baih thangc rui laaguangmei khouringc rui taektw puatkat swna kat nuh mak ge. Mi kumhmei khouringc tei hiaksuimei e twna laa mak ge kumna mi guay tei laalou nuh mak ge.
26 Ringhpouc rui Mousi khou sa the, 27Guaituamchic, lauziu, ziuh puanckeymei tei zaeng chanei nganv kakui khou rui laa khaic nuh mak ge. Zaeng tachat tangv khou rui rawna khaengmei tei laalou nuhmei sw khang e. 28Ziuh pwni, guaih pwni, lauziu pwni kuina zaeng neih khat na khou kat riu. 29Nangniw rui Ringhpouc khang thuanckumei tuang puatkat kat pwkhou, kariak lungc khou tei laalou nuhmei sw khang kat ro. 30Mi zanc tei katingmik nungc rui tu ngam nina e; nthuanh khang katit na sini daeklou nuh mak ge.
31 Ringhpouc rui sa the, “Atuang latdanv guay tei piu o; ai hei Ringhpouc e. 32Nthanmei azanc ta nangniw sw kasic riu; Isaraelmei kathuicna rui ata nthanmei e twmei thay nina e. Ai hei Ringhpouc e, ai rui nangniw ta sw nthanlou the. 33Ai hei nangniw tuang Racguangc sw diu khang ai rui nangniw ta Izip khou rui kawpatmei tuang e. Ai hei Ringhpouc e.”
Currently Selected:
LEVITHOUC 22: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
