LEVITHOUC 21
21
Amuh nunc rui Tat Nimei Riak
1 Ringhpouc rui Mousi khou sa the: Tingkuh Aron nac nunc khou tei kumna sa o: Tingkuh gaanv khat na rui sini kariang kaluaic theihmei zaeng rui kapumc sw mphuam lak nina e. 2Kamei tei ana liangmei riangluaic kapui kapu, kanac mpouh, kanac aluh, kachana 3khatni liuchang kamei lev mpeyna anamei riangluaic, kalam thu kamei hei kagaanv maek ge, hei nunc khang hamhna thu kapumc sw mphuam nuh mak ge. 4Theihmei mei tei now nac biak thangc rui riangluaih swpui zaeng rui pumh sw mphuam nuh mak ge.
5“Amuh gaanv khat na sini kapy guat nuh mak ge, kamwanghiw tiap nuh mak ge khatni zaengsimei lyanna meicpumc khou hiakmei tei ni hiak nuh mak ge.#Lev 19.27,28; Ria 14.1 6Kamei tei nthan nina de kumna azanc sw kasic nuh mak ge. Kamei hei akhang kat guangmei taektw katmeipu e, kumhpui zaeng rui kamei hei nthan nina de. 7Amuh akhat tei mangcsangmei luc swloumei, liuchang hamhmei, hamh e thei meickai rui muloumei mi kumhmeipui ta kanow khang laa lak nina e; kamei hei thu nthanmei de. 8Meic nunc rui amuh ta nthanmei e twmei laa nina e kalam thu kamei akhang taektw puatkat katmeipu e. Ai hei Ringhpouc e; ai hei nthanmei e, hei zaeng rui ai amei nunc ta sw nthanlou e. 9Amuh nac aluh akhat rui kapumc zuanhmei sw e thei, kamei rui kapu ta tizak ge; kumna kata tei mai ntei luai nina e.
10“Tingkuh tei kapy khou teymei thauc bunlou kanmei tuang e khatni amuh nunc tuang pwan piu khang katpatlou kanmei tuang e. Kumhpui zaeng rui kapy tei thauh tey maekna bam nuh mak ge, kaphey ni siat kaek nuh mak ge. 11Meic theihmei naipui bamv khou tei tat lak nina e, kapui kapu theihmei khou nganv tatna kapumc sw mphuam nuh mak ge. 12Nthanmei Ravkai lungc khou tei rui tatpat lana kaRacguangc tuang nthanmei ta sw mphuam nuh mak ge. Tingkuh tei thu akhou katloumei di the. Ai hei Ringhpouc e. 13Kanow khang liuchang ta laa nina e. 14Amaypui ta, meickai rui muloumeipui ta khatni kapumc zuanhmei swloumeipui ta kaw nuh mak ge. Kamei tei kakai kaikhwangmei liuchang ta na kaw nina e. 15Kum mak ge thei kanac nunc tei mphuam puni. Ai hei Ringhpouc e kumna ai rui kata tingkuh swna kadahpatloumei tuang di the.”
16 Ringhpouc rui Mousi khou sa the, 17Aron khou kumna sa o: “Kapumc nthuih makmei nang kikta gaanv khat na rui sini akhang taektw tei kat nuh mak ge. Mi hei thei thangc nganvna tat bam nina e. 18Thow pwni kapumc hiaksui makmei, miktiatmei hamh e thei katan baumei, 19phaybaanh chuanchaymei, 20kangumc nkuanmei, kalwnlung tuang saengdai makmei, kamik karyngmei, asuh naimei hamh e thei kapumc siammei hei kumhmei nunc rui khaengmei thouc sw nuh mak ge. 21Amuh Aron kikta gaanv khat na sini kapumc nthuih makpui mei rui akhang taektw puatkat kat nuh mak ge. 22Mi kumhmei nunc tei akhang katloumei nthanmei khatni nthan dianghmei taektw tei kaniw tu nuh e, 23tiki pumh khou nthuih makpui zaeng rui kamei tei nthanmei khamthinghphey daeng khou khatni ravchapaeng daeng khou guang nuh mak ge. Kamei rui mi kumhmei nthanmei puat ti hei sw mphuam nuh mak ge. Kalam thu ai hei Ringhpouc e kumna ai rui mi guay tei sw nthanlou the.”
24Mi guay hei Mousi rui Aron khou, Aron nac mpouh nunc khou, khatni Isaraelmei guayna khou salou the.
Currently Selected:
LEVITHOUC 21: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
