LEVITHOUC 17
17
Zei Tu Nuh Makmei
1 Ringhpouc rui Mousi khou sa the, 2Aron khatni kanac mpouh nunc khatni Isaraelmei guay khou mi hei Ringhpouc tuang latdanv e twmei salou tio. 3Isaraelmei pang khou thowkumhmei rui guaih pwni, lauziu pwni, ziuh pwni khaeng khang zypui kailuangc khou hamh e thei zypui kai paengc thangc swluaina 4Ringhpouc tuang pheykai khou Ringhpouc mav khou phungc gut mak ge thei kamei tei zei tikeymei tuang khuay nai the, kata meic pang khou rui swluai ganc nina e. 5Mi tuang kabac kiu thu ntaw nangniw rui ramvpuk khou ravkhaeng bammei tei ntaw thu Ringhpouc khou phungc guang dat nina the. Khaeng nimei khouringc tei pheykai kaimun khou amuh khou tei phungc guangna alamvpuatkat swna kat nina the. 6Amuh tei rui zei tei kalummei pheykai kaimun khou naimei ravchapaeng naek guay khou tei kazinhlouna kathav tei mai nteina karym tei rui Ringhpouc ta tipianlou puni. 7Isaraelmei nunc rui ramvpuk khou ziuh ravsic nunc khang khaengna Ringhpouc khou lwm nuh makmei lwnlung swna bammei tei sw taan nina e; Isaraelmei rui mi hei thei thangc nganvna ngaek bam nina e.
8Isaraelmei khatni Isaraelmei pang khou khuam bammei meic baihmei pwni rawna katmei hamh e thei khaengmei sw lana 9Ringhpouc tuang kalummei pheykai khou Ringhpouc khang khaeng khang phungc gut mak ge thei kata meic pang khou rui swluai ganc nina e.
10Isaraelmei pwni, kaniw pang khou khuam bammei zaatc baih baihmei pwni zei naimei zanc tu e thei Ringhpouc rui kata tei ganc pat puni kumna kamei pang khou rui swluai ganc puni.#Tha 9.4; Lev 7.26,27; 19.26; Ria 12.16,23; 15.23 11Ringhmei katana tuang ringhmei tei zei khou tei nai e, hei zaeng rui maansei tuang paap laa ganclou khang ravchapaeng khou tei zei kapwm tei bun keylou nina e twna Ringhpouc rui latdanv tiimei tuang e. Ringhmei naimei zei tei rui paapc laa ganhmei tuang e.#Ibr 9.22 12Hei zaeng rui Isaraelmei khatni kaniw khou khuamna bammei zaatc baih baihmei ni zei naimei zanc tu nuh mak ge twna ai rui samei tuang e.
13Isaraelmei khatni kaniw pang khou khuam bammei zaatc baih baihmei ni suc-zouc nrikna nthanmei nruayna pwni suc-zouc pwni swluai e thei kazei tei kandih khou bun keylouna hei tei taniang rui kagouh binlou dat nina e. 14Ringhmei katana tuang ringhmei tei zei khou tei nai e. Hei zaeng rui Ringhpouc rui Isaraelmei ta zei kazauhmei zanc tu nuh mak ge, hei tei tu e thei kamei pang khou rui ganc pat puni twna samei tuang e.
15Isaraelmei pwni, zaatc baihmei pwni, karana theihmei hamh e thei khouringh rui swluailoumei zanc tu e thei kaphey kabaan souna khatni duilow lana tingzyn nganvna nthan makmei swna bam nina e. Hei tangv rui kamei nthan dat puni. 16Kamei hei tei sw mak ge thei mi tuang manv tei kamei nsingh puni.
Currently Selected:
LEVITHOUC 17: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
