EZEKIEL 48
48
Ramv Nzanhmei
1Mi guay hei kazanc ntana chakloumei kaikhwangmei nunc e, dihpy biak thangc hei Dan tuang ramv kadam khat nai e. Hei tei Hethlon chaeng suickeyna Lebo Hamat khou; kumlana Hazar Enan khou keylou e kumna mi hei Damaskas tuang dihpy ramvrei Hamat daeng khou naimei e. Mi hei neihpat biak thangc rui neihkey biak thangc nganv Dan tuang kadam sw the. 2Dan tuang ramvrei khou tei neihpat biak thangc rui neihkey biak nganv khou tei Aser tuang ramv nai e. 3Aser tuang ramvrei khou tei neihpat biak thangc rui neihkey biak nganv khou tei Naphtali tuang ramv nai e. 4Naphtali tuang ramvrei khou tei neihpat biak thangc rui neihkey biak nganv khou tei Manase tuang ramv nai e. 5Manase tuang ramvrei khou tei neihpat biak thangc rui neihkey biak nganv Ephraim tuang ramv nai e. 6Ephraim tuang ramvrei khou tei neihpat biak thangc rui neihkey biak nganv Reuben tuang ramv the. 7Reuben tuang ramvrei khou tei neihpat biak khou rui neihkey biak nganv Juda tuang ramv the.
Ramv Chung khou Nkunmei Langv
8Mi tangv khou naimei ramv tei nkunmei khou sin swmei ramv khang reicpatlou nina e. Mi ramv tei dihpy khou rui dihba nganv hei kilometer 12 kapaek khatni neihpat khou rui neihkey hei kaikhwang kathuic khang tiimei ramv di tei daihmei ramv nina e. Mi ramv lungc khou tei Ravkai nai nina e.
9Mi ramv laa khou tei, nkunmei langv akhat kilometer 12 kapaek saenghmei khatni kilometer ruh daihmei ramv Ringhpouc khang katpatlou nina e. 10Mi nthanmei bamv hei amuh nunc khang e. Mi hei neihpat khou rui neihkey hei kilometer 12 kapaek ge khatni dihpy khou rui dihba hei kilometer panguh e. Ringhpouc tuang Ravkai tei mi ramv chung khou hei nai nina e. 11Mi nthanmei ramv hei Zadok khou rui lungc keymei amuh nunc khang e. Kaniw tei lwmnuhmei swna asiamruai sw the kumna Levi kaikhwangmei nunc kumcna Isaraelmei nunc rui simei taanv taanhmei khou tei lay taanc kazauh mak khe. 12Kumhpui zaeng rui Levimei nunc tuang ramv daeng khou naimei nkunmei ramv tei kaniw laa nina the, kumna hei tei nthan liangmei ramv sw puni the. 13Levimei nunc ni mi amuh nunc ramv tuang dihba biak thangc naimei ramv tei laa puni. Hei tei neihpat khou rui neihkey hei kilometer 12 kapaek khatni dihpy khou rui dihba langv hei kilometer panguhmei ramv e. 14Ringhpouc khang kat gutloumei ramv tei mi ramv lungc khou rui gay liangmei ramv the. Kumhpui zaeng rui hei tei zuanc nuh mak ge meic baihmei khang akhiak ni akhiak nuh mak ge. Hei tei nthanmei e kumna Ringhpouc tuang e.
15Nsaekcloumei kilometer 12 kapaek khatni kanei kapaek saengc daihmei daekloumei ramv tei thu nthanmei ramv thu hamh e, hei tei meic mathiuc na sinsw khang e. Kaniw rui khou tei lungcna mi ramv tei sinsw nuh e. Mi ramv chung khou tei kaidai tei nai nina e. 16Kumna hei tei kasaeng kadai chowbuk 4,500 nina e. 17Kumna mi tuang kaidai tei neihpat neihkey dihpy dihba chowbuk 250 daihmei meic lungh makmei ramv nai nina e. 18Nthanmei ramv tuang dihba khou kilometer panguh saenghmei khatni kilometer kanei kapaek daihmei lungc khou kaidai tei kasiamh lana nsaekcloumei ramv tei mi kaidai khou lungc bammei nunc lau bamv khang sw nina e. 19Mi kaidai khou tei lunghmei, tabui bui tuang kaikhwangmei pwni, mi bamv khou tei kailau taanc nuh e.
20Kumna mi ramv chung khou reicpatloumei ramv tei kasaeng kadai kilometer 12 kapaek ge, kumna mi lungc khou tei kaidai ramv tei ni kazauh the.
21Mi Ramv tuang kanaek kanei khou naibammei tei nthanmei bamv e khatni kaidai khou naimei guay tei guangh tuang sw puni. Nthanmei bamv khou tei rui neihpat ramvrei biak thangc kilometer 12 kapaek kasit pat puni khatni nthanmei bamv khou tei rui neihkey ramvrei biak thangc kilometer 12 kapaek kasit pat puni. Mi ramv nei hei guangh tuang sw puni. Nthanmei ramvlangv khatni Ravkai tuang nthanmei bamv tei ramvchung khou sw puni. 22Levimei nunc tuang puat guay khatni kaidai khou naimei guay tei guangh tuang ramvchung khou sw puni. Guangh ramv tei Juda khatni Benjamin tuang ramvrei kak khou nai puni.
Baih Baihmei Kaikhwang nunc khang Ramv
23Nsaekcloumei kaikhwang guay khang tei neihpat zat thangc rui neihkey zat kalangv akhat tei Benjamin kaikhwang khang e. 24Benjamin kaikhwang tuang ramvrei khou rui neihpat biak thangc rui neihkey biak nganv khou naimei ramv tei Simeon kaikhwang khang e. 25Simeon kaikhwang tuang ramvrei khou tei rui neihpat biak thangc rui neihkey biak nganv tei Isakar kaikhwang khang e. 26Isakar kaikhwang tuang ramvrei khou tei rui neihpat biak thangc rui neihkey biak nganv tei Zebulun kaikhwang khang e. 27Zebulun kaikhwang tuang ramvrei khou tei rui neihpat biak thangc rui neihkey biak nganv tei Gad kaikhwang khang e.
28Gad khang tiiloumei ramv tuang dihba biak thangc, mi kandic ramvrei tei Tamar khou rui Kades khou keylouna khou tei rui Izip ramvrei suic pat datna Mediterranean duipui khou patlou the.
29Kauh Liangmei Ringhpouc rui sa e, “Isaraelmei nunc rui kaniw tuang swna sin bam diu khang mi kandic hei nzanhlou nimei thiak kiu mi hei the.”
Jerusalem tuang Raengcmun guay
30Mi hei mi kaidai tuang raengcmun nunc e: Dihpy thangc rui raengh kiu kahouh the. Mi tuang kasaeng kiu chowbuk 4,500 e.#Nda 21.12,13 31Mi raengcmun kathuic tei kaikhwang 12 zanc khat khat phuaklou e. Dihpy biak tuang raengcmun kathumh zanc kiu Reuben, Juda khatni Levi twna kaw e. 32Neihpat biak thangc naimei raengc tei kaseang chowbuk 4,500 e, mi tuang raengcmun nunc zanc tei Josep, Benjamin khatni Dan twna kaw e. 33Dihba biak thangc naimei raengc tei kasaeng chowbuk 4,500 e, mi tuang raengcmun nunc zanc tei Simeon, Isakar khatni Zebulun raengcmun twna kaw e. 34Neihkey biak thangc naimei raengc tei kasaeng chowbuk 4,500 e, mi tuang raengmun nunc zanc tei Gad, Aser khatni Naphtali twna kaw e. 35Mi kaidai tuang raengc kanaek padeih tei kasaseng chowbuk 18,000 saengc e. Ntaw khou rui thauna mi kaidai zanc tei, “Khou Hei Ringhpouc Bam e” twna kaw puni!
Currently Selected:
EZEKIEL 48: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
