DANIEL 1
1
DANIEL KHATNI KAPAMMEI NUNC PARY
(1.1—6.28)
Nebukadnezar Kai khou Chabwan nunc
1Jehoiakim rui Judamei guangc swmei tuang kathumhmei kwm, Babilonmei guangc Nebukadnezar rui Jerusalem ta adowna mi kaidai tei dingbin the.#2 Gu 24.1; 2 Ki 36.5-7 2Ringhpouc rui Guangh Jehoiakim ta Nebukadnezar baanc khou tiilou kan the. Kumna kamei rui Ravkai tuang lanv asaekc asut kan the. Kamei rui nymloumei gaanvsaekc ta Babilon khou naimei katuang rav nunc tuang Ravkai khou phungc guang the, khatni asut guangmei lanv guay tei ni mi Ravkai khou puatc ryloumei bamv khou lou the.#2 Gu 24.1; 2 Ki 36.5-7
3Nym guangloumei Isaraelmei pang khou rui guangh kaikhwang mei khatni meicdaihmei kaikhwang khou rui chabwan gaanvsaekc kapah o twna guangh tei rui katuang meicdaihmeipu, kapumc siammei Aspenaz khou latdanv pat the. 4Kaniw tei lwnchav gaymei, ningtyngmei, ncham chuyloumei, ramh thay katumcmei, kapumc sisuaimei maekmei sw nina e, kalam thu kaniw tei guangh kai khou siamruai sw khang biuhmei nunc sw nina e. Aspenaz rui kaniw ta Babilonmei lat hy thay pac thay khang nchamlou nina e. 5Guanghkai khou bammei guay rui tuzangvmei taektw khatni zouh tei kaniw khang ni nchamcna tingmik pum tii nina e twmei tuang latdanv ni guangh rui tii the. Kumna tingkwm kathumh kasiamhlou tang pwkhou guangh tuang siamruai khou gut nina e. 6Mi kadah patloumei pang tei Daniel, Hanania, Mishael, khatni Azaria kaniw hei e. Kaniw guay hei Juda kaikhwang mei rana e. 7Meicdaihmeipu tei rui kaniw khang zanh thanh: Daniel khang Belteshazar, Hanania khang Shadrak, Mishael khang Meshak, khatni Azaria khang Abednego twna phuaklou the.
8Daniel tei guanghkai tuang taektw khatni zouh tei rui kata sw mphuam lak ge twmei kalung ding the. Kumna kata nkhavlou khang Aspenaz khou sa the. 9Ravguangc rui Aspenaz khou Daniel ta nzianlou khang swlou the. 10Tiki Aspenaz rui guangh ta pingna kamei rui Daniel khou sa the, “Nangniw tu nimei khatni zangv nimei guay tei guangh rui dinglou tang the, kumna baihmei chabwan nunc tei kumcna nangniw pumc gay timak ge thei, kamei rui ata swluai kho ni nuh e.”
11Daniel lev kapam gaanv thumh khang Aspenaz rui langloumei rigaanv khou tei Daniel rui tatna sa the, 12“Aniw ta zaeng ruh matat zauc o.” “Aniw tu zangv khang thingnuy paannu na khatni dui na tii do. 13Kumna guanghkai tuang taektw tu bammei nunc tei lev kida zauc o, kumna aniw akumh bu cho twmei theilayna kakhanh tho.”
14Kaniw ta tei kumna zaeng ruh tei zauh khang nuhlou the. 15Kaganv tei luai pwkhou, guangh tuang taektw tumei nunc khang tei suangc kaniw tei pumh gay mbu the khatni tanc mbu the. 16Kumna khou tei rui thauna rigaanvpouc tei rui guangh rui tiimei taektw tei hamhna thingnuy paannu na titu the.
17Ravguangc rui mi chabwan gaanv padeih khou tei takh khatni latrik khou khatni ningting khou thaymei tiilou the. Hei khou tei rui Daniel khou ndawman khatni mang kabah thay khang tiilou the.
18Guangh rui nrianhloumei tingkwm kathumh ganv tei luai pwkhou, Aspenaz rui mi chabwan guay ta tei Nebukadnezar khou nduangh guang the. 19Guangh rui kaniw kaguayna ta kachuc the, kumna Daniel, Hanania, Mishael khatni Azaria kaniw ta tei baihmei nunc ta khang suangc pian the. Kumna kaniw ta guangh tuang taanv khou laalou the. 20Guangh rui tabui bui lat thanv bam sini khatni kamei rui kunghmei latbam azuh phungc guang sini, mi gaanv padeih hei kaguanghdic kapwm khou naimei ravkhanmei nunc khatni duaih thaymei nunc suangc sini kadam ruh mbuna thay the. 21Persiamei guanghdaihmei Sairas rui Babilon laa kan mak saanv Daniel tei guanghkai khou bam khwan e.
Currently Selected:
DANIEL 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
