EZEKIEL 41
41
1Mi tangv tei kamei rui ata kachungmei kailangv, Nthanmei Bamv khou nduangh gut the. Mi khou tei gutmei chaeng tei kamei ndat the: hei tei chowbuk charuk nthuk ge, 2khatni chowbuk ruh daic e; khatni kanaek kanei tei chowbuk panguh nsumei ngaengsaengc nai suak ge. Kamei rui mi kailangv tei ndat the: hei tei chowbuk 40 saengc e, khatni chowbuk 20 daic e.
3Mi tangv tei kamei kalungc liangmei kailangv thangc gut the. Mi khou tei gutmei chaeng tei kamei rui ndat the: Hei tei chowbuk kanei nthuk ge khatni chowbuk charuk daic e, khatni kadaeng kanei tei chowbuk chanei nsumei ngaengsaengc nai suak ge. 4Kamei rui mi kailangv tei ni ndat the, hei tei kasaeng kadai chowbuk 20 e. “Mi hei Nthan Liangmei Bamv the,” twna kamei rui akhou sa the.
Ravkai tuang Raengc khou Swloumei Kailangv guay
5Mipu tei rui Ravkai tuang kalungcmei ngaengsaengc tuang nsumei tei ndat the, kumna hei tei chowbuk charuk ge. Mi tuang ngaengsaengc khou tei chowbuk padeihmei kailangv lau launa rui Ravkai tei sw ngguilou e. 6Mi kailangv guay hei kathaek kathumh e kumna kathaek akhat khou kailangv tamruc tamruc nai e. Kailangv guay tei ngaengsaengc khou lylou khang Ravkai tuang kapaengcmei ngaengsaengc tei kai thaek kathuic khou tei kabangcmei kai thaek khang tei suangc mpu e. 7Kumna Ravkai tuang ngaengsaengc tei, kapaengc thangc rui zauc pwkhou, katwan nganvna kasu nchamc kumna howlou the. Ravkai tuang kapaengc biak ngaengsaengc khou tei, kailangv guay paengc khou tei phaykhuat daihmei kanei swlou e, kumna mi khou tei rui kabangcmei thaek khou rui nchungmei thaek khou khatni karucmei thaek khou ku nuh khang e. 8Ravkai daeng guay tei kaisangh nai nggui e, mi daeng khou kailangv guay tuang kabamv tei chowbuk charuk charuk saengc e. 9Kailangv tuang kapaengcmei ngaengsaengc nsumei tei chowbuk panguh e. 10Kailangv nunc khatni amuh nunc tuang kailangv khupzulou makmei kaikak chowbuk 20 Ravkai daeng nai suak ge. 11Khupzulou makmei kaisangh biak khou rui dihpy lev dihba biak thangc kaimun kanei nai e. Mi kaimun kanei kak tei chowbuk panguh nsa ramv nai e.
Neihkey Biak Naimei Kai
12Mi kaimav nsa ramv tin khou Ravkai tuang neihkey biak thangc chowbuk 90 saenghmei chowbuk 70 daihmei kai akhat nai e; mi tuang ngaengsaengc tei chowbuk panguh nsu e.
Ravkai Kapwm tuang Dat
13Mipu tei rui Ravkai tei ndat the, kumna hei tei chowbuk 100 saengc e. Ravkai kaithei khou rui nsa ramv tei twan patna neihkey biak thangc Ravkai tin tei nganvna chowbuk 100 saengc e. 14Ravkai kaimav saenghmei tei, baanzat baandau khou naimei nsa ramv tei kazauhna chowbuk 100 muay e. 15Kamei rui Ravkai saanvsaengh tei, baanzat baandau khou naimei kaimav tei kazauhna neihkey biak thangc ndat key the, kumna hei tei chowbuk 100 re.
Ravkai tuang Nsunh Ndiauh
Ravkai, Nthanmei Bamv, khatni Nthan Liangmei Bamv gut nimei kailangv guay tei 16kandih khou rui kailat langv tei thingpaek rui daengc e. Mi kailat guay hei mbangh nuh e. 17Ravkai tuang kalungcmei ngaengsaengc, kaimun kauh tei ramh maengc nai e. 18Tadanv bang khatni kerubim nunc maengc nai e. Kailangv kapwm khou tei kamaengc kanei tei hylou tarina nai e. Kerubim kathuic tei kazaw kanei kanei nai e: 19Maansei zaw tei rui tadanvbang akhat biak thangc karih e khatni kamangliangpui zaw kumhmei akhat rui tadanv bang biak tei karih e. Hei tei kumcna ngaengsaengc kaguay khou tei nai suak the. 20Kandih khou rui thauna kaimun py nganv hei tei kumna nai suak ge. Hei tei chowbuk ruh kumna swlou the. 21Nthanmei Bamv tuang tiangh guay tei kasu padeih tei nchamh e.
Thing tuang Ravchapaeng
Nthan Liangmei Bamv gut nimei kaimun daeng khou 22thing tuang ravchapaeng akhat nai e. Hei tei chowbuk kathumh kauh e khatni chowbuk kanei daic e. Mi tuang kakwn tiangc guay, mi tuang bamv, khatni kadaeng guay tei thing e. Mipu tei rui akhou sa e, “Mi hei Ringhpouc hu khou naimei paeng e.”
Kaimun guay
23Nthanmei Bamv khou gut nimei chaeng twan khou kaimun akhat nai e khatni Nthan Liangmei Bamv khou gut nimei chaeng twan khou tei ni kaimun akhat nai muay e. 24Mi kaikhamv kanei tei nchung khou laanc ntamvmei kaikhamv nai e. 25Ngaengsaengc khou hiakloumei tei kumcna Nthanmei Bamv khou gut nimei kaikhamv nei khou tei ni tadanv bang maengc lev Kerubim maengc hiaklou e. Kaimun khou tei kaizaengc biak thangc thing tuang kaikhamv nai e. 26Mi kailangv guay tuang naek guay khou tei kailat nai e, kumna ngaengsaengc guay tei tadanv bang maengc rana hylou e.
Currently Selected:
EZEKIEL 41: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
