EZEKIEL 40
40
THEI THANGC GUANG PW NIMEI RAVKAI TUANG NDAWMAN
(40.1—48.35)
Ezekiel ta Jerusalem khou Phungc Guangmei
1Aniu meicbangc bam tatmei tuang 25mei kwm, Jerusalem laimei 14mei kwm tingkwm kathanc tuang zaeng ruhpui neic Ringhpouc tuang baanc aruc khou mbaenglouna ata phungc tat the. 2Ndawman khou Ravguangc rui ata Isaraelmei kandic khou phungc guang the kumna kauhmei chyngtwan akhat khou guanglou the. Dihba biak thangc kaidai akhat kumhmei kai pang akhat how khwan e.#Nda 21.10 3Kamei rui ata phungc guang tuanc maih pwkhou tanzinc kumcna karangmei maansei akhat how khwan e. Kamei tei linen tuang ndathmei riang khatni ndathmei thing akhat sinna chaengmun khou ding bam khwan e.#Nda 11.1; 21.15
4Kamei rui akhou sa the, “Maansei nacle, zauc o. Nking chuyna nking o khatni ai rui lyanmei hei lungh gutna zauc o, kalam thu mi khang hei rui nang ta mi khou hei phungc guang tuang e. Nang rui howmei guayna tei nang rui Isaraelmei nunc khou raclou nina e.”
Neihpat Raengckat
5Ai howmei tei Ravkai khwan e, kumna hei tei raengh raeng nkuaylou khwan e. Mipu tei rui chowbuk charuk saenghmei ndathmei thing rui raengh tei ndat the. Mi raengc tei mi zwan tei akhat nsu e khatni akhat kauh e.#1 Gu 6.1-38; 2 Ki 3.1-9 6Hei tangv tei neihpat biak puanc karihmei raengcmun thangc tei kamei tatpat kan the. Kamei phaykhuat tei tat kuna katwan khou tei raenghmun tei ndat the, hei tei chowbuk charuk nsu khwan e. 7Mi paengc thangc tei chaeng akhat nai khwan e kumna mi chaeng baanzat baandau tei rigaanvkai kathumh kathumh nai khwan e. Mi kai guay tei chowbuk charuk saengc charuk daic khwan e kumna kaniw kak daengc langhmei ngaengsaengc tei ni chowbuk panguh nsu khwan e. Rigaanvkai tei twan pat pwkhou chowbuk charuk saenghmei tat kalwmei chaeng akhat Ravkai biak karihmei kailangv daihmei akhat lev alamvmei chaeng nai khwan e. 8Kamei rui mi kai tei ndat the. 9Kumna hei tei chowbuk tachat nthuk khwan e. Hei tei rui mi raenghmun tei luaimei the. Ravkai daeng guang ana liangmei bamv the, kumna luailoumei twan tei chowbuk kanei nsu e. 10(Chaeng naek kanei khou naimei rigaanvkai guay tei kasaeng kadai nchamc raph rap be khatni daengc langhmei ngaengsaengc su tei ni nchamc ngam e.) 11Mi tangv tei mipu tei rui raenghkat chaeng daihmei tei ndat the. Hei tei kaguayna chowbuk 13 e, kumna raenghmun laancloumei langv tei chowbuk ruh e. 12Rigaanvkai kathuic khou tei kahu khou raengh anamei chowbuk akhat kauh chowbuk akhat nsu twmei raengc ni nai e. (Kailangv guay tei chowbuk charuk saengcdaic e.) 13Mi tangv tei kamei rui chaeng paengc akhat tuang kai kaithei, pat nganvmei tin khou rui ndat thauna chaeng paengc akhat thangc tuang kai kaithei tin nganvna ndat pwkhou hei tei chowbuk 25 e. 14Katin liangmei khou tei rui kaimav alamv tat kan the. Kamei rui mi kai tei ndat pwki hei tei chowbuk 20 e. 15Mi tuang raengckat tei raengh paengc tin khou rui ndat thauna nkhamh liangmei kailangv tei nganvna chowbuk 50 e. 16Kalangv kathuic khou tei kaithei kailat raengh paengc biak nai ngam e, kailangv daengc langhmei kak khou tei kailat nai ngam e. Chaeng biak karihmei ngaengsaengc khou tei tadanv bang maengc hiaklou e.
Kapaengcmei Kaimav
17Mipu tei rui ata mi raengcmun chaeng tei rui kaimav khou phungc guanglou the. Raengh khou tei alamvlouna sw patmei kailangv 30 nai khwan e. Mi kai guay kaimav khou tei ntauh rui bamcloumei kaimav nai khwan e, 18hei tei kaimav tei sw nkuay tangclou khwan e. Mi kaimav tei kaisangh khang suangc ana khwan e. 19Kaimav kalungcmei khou gut khang kauh maihmei thaek khou raenghmun nai khwan e. Mi raengcmun kanei dak tei mipu tei rui ndat the, hei tei chowbuk 100 khwan e.
Dihpy Biak Raengckat
20Kapaengcmei kaimav gut nimei dihpy biak thangc naimei raengckat tei mipu tei rui ndat the. 21Chaeng naek kanei khou naimei rigaanvkai charuk tei, kakak kak khou naimei raengh, khatni kailangv daihmei hei guay hei neihpat raengckat khou naimei saenghmei daihmei nchamc de. Mi raengc saenghmei tei chowbuk 50 e kumna daihmei rui chowbuk 25 e. 22Kalangv daihmei, kailat guay, tadanv bang maengc hiakloumei hei guayna hei neihpat raengckat thangc tuang tei lev nchamc de. Khou hei raenghmun tei ku tangh khang chaeng khuat chanei ku e, kumna kailangv daihmei tei nkhamh liangmei khou kazaw kaimav biak tei puanc karihna nai e. 23Neihpat biak thangc naimei tei kumc raphna dihpy biak raengcmun khou tei rui kaimav tei twan pat pwkhou kalungcmei kaimav gut nimei raenghkat akhat nai e. Mipu tei rui mi raengckat kanei tei ndat pwkhou chowbuk 100 saengc e.
Dihba Biak Raengckat
24Mi tangv tei mipu tei rui ata dihba biak phungc key the khou tei ai raenghkat akhat how dat re. Kamei rui hei tei ndat the, kumna hei tei baih baihmei lev nchamc de. 25Baihmei nei khou tei kumcna mi khou tei naimei kailangv guay khou tei kailat nai muay e. Mi raengc saanv tei chowbuk 50 e, kadai rui chowbuk 25 e. 26Raenghmun tei ku khang phaykhuat chanei ku e kumna katwan khou tei kailangv daihmei akhat kazaw kaimav biak puanc karihna nai muay e. Mi raengcmun tuang chaeng paengc kanei raengh khou tei tadanv bang maengc hiaklou muay e. 27Khoutei kalungcmei kaimav thangc gut nimei tuang raengcmun akhat nai muay e. Mi raengcmun kanei kak tei chowbuk 100 ndat pat muay e.
Kalungcmei Kaimav Dihba Biak Raenghkat
28Mipu tei rui ata dihba biak raengcmun khou tei rui kalungcmei kaimav khou nduangh gutlou the. Kamei rui mi raengckat tei ndat the, hei tei kapaengcmei raengh thangc nai bammei raengcmun tei lev nchamc e. 29Baihmei kumcna zaysaengh patmei kailangv nunc khatni kailangv khat khat kak alamv nimei kailangv guay tei ni kasaeng kadai nchamc khwan e. Mi kailungc khou tei kaimik tinai nkuaylou khwan e. Mi kai tuang kasaeng tei chowbuk 50 e khatni kadai rui chowbuk 25 e. 30Mi kainaek ta tat alamv nuhmei kailangv khat nai khwan e, kasaeng rui chowbuk 25 e khatni kadai rui chowbuk panguh e. 31Mi tuang kailangv daihmei tei kaimav baihmei kaimav biak karih muay e. Tat gutmei chaeng baanzat baandau khou tei ngaengsaengc khou tadanv bang maengc hiaklou e. Mi raengcmun tei ku khang phay khuat tachat nai e.
Kalungcmei Kaimav Neihpat Raengckat
32Mipu tei rui ata neihpat biak raenghmun khou tei rui kalungcmei kaimav khou nduangh gut the. Kamei rui mi raengcmun tei ndat the, kumna hei tei baih baihmei tei lev nchamc ngam de. 33Mi tuang rigaanvkai guay, kai daihmei, khatni kalungcmei raengc guay hei baihmei raengckat tei lev nchamc ngam de. Kaguayna khou tei kailat nai ngam de, kai daihmei khou tei ni nai de. Mi raengckat saenghmei tei chowbuk 50 khatni daihmei rui chowbuk 25 e. 34Kailangv daihmei tei kazaw kapaengcmei kaimav biak karih e. Chaeng saanvsaengh tuang zat-bai tei tadanv bang maengc hiaklou muay e. Raenghkat ku khang tei phaykhuat tachat ku e.
Kaimav Kalungcmei Dihpy Biak Raengckat
35Mi tangv tei mipu tei rui ata dihpy biak raengckat thangc nduangh ngangh the. Kamei rui hei tei ndat the, kumna hei tei baih baihmei tei lev nchamc e. 36Baihmei guay tei kumcna rigaanvkai guay, ngaengsaengc khou karuhloumei, kailungc daihmei, khatni kailangv guay khou tei kailat nai muay e. Hei tei chowbuk 50 saengc e khatni chowbuk 25 daic e. 37Kailangv daihmei tei kapaengcmei kaimav biak kazaw karih e. Mi raengckat saanvsaengh tuang zat-bai tei ngaengsaengc khou tadanv bang maengc hiaklou e. Mi raengckat tei ku khang phaykhuat tachat nai e.
Dihpy Biak Raengckat Daeng khou Naimei Kai guay
38Kapaengcmei kaimav khou tei kailangv sw nsuk patmei akhat nai e. Hei tei kalungcmei raengckat khou tei rui dihpy biak thangc nsuk patmei tuang e. Kaimav biak karihmei kalangv daihmei tei lev hei tei chaeng phou alamv e. Khouringh pumc kapwm rawna khaeng nimei khouringc nunc tei mi bamv khou tei khiu e. 39Mi kailangv daihmei khou tei paeng padeih nai e; kailangv tuang baanzat baandau khou tei kanei kanei lou e. Mi paeng tei ravkhaeng nimei khouringc dowluaipui bamv e. Kapwm rawna khaeng nimei, paapc khang khaeng nimei, khatni khaengmei puatkat hei guay hei mi khou tei dowluai e. 40Kailangv paengc khou ni hei tei lev nchamcmei paeng padeih nai e. Hei tei dihpy biak raengckat gut ni khou baanzat baandau lou tuang e. 41Khaeng nimei khouringc swluaimei paeng kaguayna tachat: padeih rui kalungc khou, baihmei padeih rui kaizaengc khou e. 42Kailungc khou naimei kapwm rawna khaeng nimei khouringc kasiamhmei paeng tei ntauhpaek rui kasiamhmei paeng e. Mi tuang kauhmei rui chowbuk akhat kapaeng rui chowbuk akhat kapaek, twna saengc daic e. Khaeng nimei khouringc swluai nimei nanw guay tei mi paeng guay khou tei lou e. 43Mi paeng guay tei baanh ku khat saanv saenghmei gou nuhmei khuay katin nai ngguic e. Khaeng nimei tuang zanc guay tei mi paeng guay khou tei lou e.
44Mi tangv tei kamei ata kalungcmei kailangv khou nduangh gutlou e. Khoutei kalungcmei kaimav biak laancloumei kailangv kanei nai e, akhat rui dihpy biak raengckat daeng khou dihba biak kahuhmei khatni akhat rui dihba biak raengckat daeng khou dihpy biak puanc karihmei e. 45Dihba biak puanc karihmei kai tei Ravkai khou taanvtaanhmei amuh nunc khang e, 46khatni dihpy biak puanc karihmei tei rui ravchabamv khou taanv swmei amuh nunc khang e, twna mipu tei rui sa e. Amuh guay tei Zadok khou rui lungc keymei rana e. Ringhpouc bamv khou gutna taanv sw khang nuhloumei Levi kaikhwangmei nunc kiu kaniw tei na de.
Kalungcmei Kaimav khatni Ravkai
47Mipu tei rui kalungcmei kaimav tei ndat the, kumna hei tei kaphai kadung chowbuk phay khat, phay khat re. Ravkai tei neihkeylou biak thangc nai e; kumna Ravkai kaimav khou tei ravchabamv nai e. 48Mi tangv tei kamei rui ata Ravkai tuang kaimun khou nduangh gutlou the. Kamei rui kaimun tei ndat the. Hei tei chowbuk akhat nthuk ge khatni chowbuk 14 daic e. Kumna kanaek kanei ngaengsaengc tei chowbuk kathumh kathumh nsu e. 49Kalungc gut nimei kailangv tei ku khang phaykhuat mpeyna ku e; hei tei chowbuk 20 saengc e khatni chowbuk 12 daic e. Kaimun daeng khou baanzat baandau tiangdaic akhat akhat nai e.
Currently Selected:
EZEKIEL 40: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
