TATPATMEI 21

Bangh ta Sw Nimei Riak

(Ria 15.12-18)

1“Kabangc khoumei riak guay hei Isaraelmei guay khang dinclou o: 2nangniw rui Ibrimei akhat ta bangh swna liu e thei kamei tei tingkwm charuk nang bangc sw nina e. Chaneimei kwm thu kaphy kadam maekna mpatlou dat nina e.#Lev 25.39-46 3Kamei bangh swpui ganv khou now kaw makna karana guang e thei kamei tat datmei ganv khou ni karana tat dat ni tuang e tiki kanow naina guang e thei kanow lev tat dat ni tuang e. 4Kakaipouc rui banghpu now khang tiilouna mipui tei rui mpouh aluh geicna puanclou e thei mipu tei tat datpui ganv khou kanow kanac guay ta tei ganclou ducna karana tat dat nina e. 5Mi bangcpu tei rui kakaipouc ta khatni kanow kanac nunc ta nzianna tat dat nii mak khe twna sa pw e thei 6kaipouc tei rui banghpu ta tei latzanpouc nunc bamv thangc nduangh tat nina e. Khoutei banghpu ta tei kaimun hamh e thei kaimun tiangc hu khou tidingna kanu row nina e. Kum kan e thei kamei tei tingsaengzaeng kabangc di the.

7“Thowkumhmei rui kanac aluh ta bangh swna zuanclou e thei, mi ta tei nggaanvmei bangc ta kumcna mpat dat nuh mak ge. 8Kata tei gaanv khat now khang zuanclou pwkhou, kamei tei rui mipui ta tei laa dat nii mak ge thei mipui ta tei kapu khou zuanclou dat nina e. Kakaipouc tei rui kata tei zaatc baihmei khou zuanclou nuh mak ge, zuanclou e thei kamei rui mipui khou tei nchumh makmei taanv taanclou the. 9Thowkumhmei rui banghpui ta kanac mpouh khang liu e thei, mi ta tei kanac aluh akhat ta kumcna laalou nina e. 10Thowkumhmei rui now kanei kaw e thei, gaanvthaihmeipui khang tei kahu nungc tii bammei taektw khatni pheybaan zu tei tii bam nina e khatni kahu nungc kakhang tii bammei dam guay tei tii bam nina e. 11Kamei rui mi guay tei kanow khou tei taanclou ngam mak ge thei, katy kamanv hanclou dat makna kata mpatlou dat nina e.

Twanlyammei Taanv khou Sw nimei Riak

12“Thowkumhmei rui meic gaanv khat ta bai luai e thei kata tei swluai dat nina e.#Lev 24.17 13Kum e tiki kamei rui swluai ni twna swluaimei tuang hamhna maanvna swluaimei tuang e thei, ai rui kadahlou nimei duakpui bamv khou tei paklouna duak nuh e.#Sin 35.10-34; Ria 19.1-13; Jos 20.1-9 14Kum e tiki thowkumhmei rui lunghpuamcna meic swluai e thei thu, kamei rui ravchabamv khou paklou bam sini kata tei swluai nina de.

15“Kapui kapu ta baipui mei ta tei swluai nina e.

16“Meic gaanv khat ta zuanh khang bu ny hamh e thei kabangc khang bu ny, nympui mei ta tei swluai nina e.#Ria 24.7

17“Kapui kapu ta siangpui mei ta tei swluai nina e.#Lev 20.9; Met 15.4; Mrk 7.10

18“Abayna meic gaanv khat rui gaanv khat ta ntauh rui hamh e thei kabaanc rui bai the, tiki theih mak ge thei thu kata tei dandi tii lak nina e. Kamei rui bailoupui mei tei ngam makna laeng khou zip the, 19tiki kamei builwang ntunghna tat dat ngam e thei baimeipu tei rui kamei zip amaan kanmei ganv zaeng tei khangc nina e khatni kamei gay dat mak saanv makuat nina e.

20“Thowkumhmei rui builwang sinna kabangc nggaanvmei ta pwni ntumei ta pwni bai tina kabamv khou tei theic palaplou e thei, mipu ta tei swluai nina e. 21Kum e tiki zaeng neih nei neih thumh lungc khou theih mak ge thei kakaipouc ta tei dandi tii lak nina e. Kalam thu bangh tei katuang de.

22“Meic gaanvsaekc rui agayna kapumc nritmei ntumei ta bailou tina nah key the, tiki kapui ta tei kabiu mak ge thei, kagaanv rui khaanhmei zu tei latzanpouc rui nuhmei theilayna khap nina e. 23Kum e tiki ntumei tei zamh e thei thu dandi tei panty khang panty, 24mik khang mik, huh khang huh, baanh khang baanh, phay khang phay,#Lev 24.19,20; Ria 19.21; Met 5.38 25maizam khang maizam, zamh khang zamh, khwm laa nina e.

26“Thowkumhmei rui kabangc ntumei ta pwni nggaanvmei ta pwni kamik bai tiatlou e thei, mik manv tei kamei rui kabangc ta tei mpatlou nina the. 27Kamei huh diangc keylou e thei, huh manv tei khanghmei swna nggaanvmei bangh tapw ntumei bangh tapw mpatlou nina e.

Kaipouc nunc tuang Thouc

28“Thowkumhmei tuang guaichic rui ntumei ta pwni nggaanvmei ta pwni sow luai e thei, mi guaic ta tei ntauh nkwam luai nina e, kumna kazanc tei tu nuh mak ge. Kakaipouc ta ni dandi tii dat nuh mak khe. 29Guaichic tei rui maansei ta sow khang sw raph rapmei zaeng rui kakaipouc khou sa tina bangh makna mpatlou bam khou rui nggaavnmei tapw ntumei tapw khat ta sow luai e thei mi guaic ta tei ntauh kwam luai nina e kumna kakaipouc ta ni swluai nina e. 30Kum e tiki khapna kapanty duak nuh khang nuhlou e thei, gut nimei sing guay tei kamei rui tii ngam nina e. 31Guaih tei rui ntumei nac hamh e thei nggaanvmei nac ta puni swluai e thei hei tei kumcna sw muay nina e. 32Guaih tei rui bangh ntumei hamh e thei nggaanvmei akhat ta swluai e thei kakaipouc khang daandi paek 30 khap nina e kumna guaih ta tei ntauh kwam luai nina e.

33“Thowkumhmei rui kwam tuang gwm laanclou tina hamh e thei kuamc chaulouna gumlou timakna khou tei guaih pwni kuanniam pwni keylouna theic e thei 34mipu tei mi khouringh manv tei khap nina e. Kamei rui khouringh manv tei tii lana mi khouringc tei kakhang laa nuh e. 35Meic gaanv khat tuang guaichic rui meic kai tuang guaichic ta apwan luai e thei, ringhmei guaic tei zuanc lana kamanv tei nzanh nina e, kumna theihmei guaic zanc tei ni nchamcna nzanh nina e. 36Guaih tei meic kai guaic ta diangc raph rap be twmei thayna kakaipouc rui bangh makna lou bam khou rui meic kai guaic ta diangcluai e thei theihmei guaic tei kakhang laa lana guaih akhat khaplou dat nina e.

Currently Selected:

TATPATMEI 21: RONGBSI

Highlight

Copy