TATPATMEI 20

Latdanv Ruh

(Ria 5.1-21)

1Ravguangc rui mi lat guay hei sa the: 2“Ai hei, nangniw bangh swna bammei Izip kandic khou tei rui nangniw ta nduangh patloumei nangniw tuang Racguangc Ringhpouc tei e.

3“Ata hamhna rav baihmei ta nangniw kalum lak nina e.

4“Tingkauh khou pwni, kandih khou pwni, kandih bangc thangc duilungc khou pwni naimei, tabui bui maengc sini nangniw kalum khang ravmaengc kasiamh lak nina e.#Tat 34.17; Lev 19.4; 26.1; Ria 4.15-18; 27.15 5Ravmaengc akhat na hu khou sini nkhum key lak nina e, hamh e thei kalum lak nina e, kalam thu Ringhpouc ai hei mamav tanhmei Racguangc e. Ata karaengpui mei ta thu ai rui kata khatni kakikta ta ni meickin kathumh padeih nganvna dandi tii puni.#Tat 34.6,7; Sin 14.18; Ria 7.9,10 6Tiki ata nzianpui mei khatni alat piupui mei ta thu meickin ching ching khou nganvna ai rui nzianlou puni.

7“Azanc hei ramhzi mak khou sinsw lak nina e, kalam thu azanc ta ramhzi mak khou sinswpui mei ta Ringhpouc nangniw tuang Racguangc ai rui dandi tii puni.#Lev 19.12

8“Sabbathneic tei ningtow o, kumna mi hei nthanna ngaek nina e.#Tat 16.23-30; 31.12-14 9Zaeng charuk tei nangniw tuang taanv taanc nina e,#Tat 23.12; 31.15; 34.21; 35.2; Lev 23.3 10tiki chaneimei tingmik tei thu akhou katlou kanmei nthaekcmei tingmik ge. Mi nungc hei thu nangniw ni, nangniw nac nunc ni, nangniw bangc nunc ni, nangniw tuang kiruai guay ni, khatni nangniw kandic khou lungc bammei zaatc baihmei guay ni taanvtaanc lak nina e. 11Ai, Ringhpouc rui zaeng charuk lungc khou kandih, tingpuk, duipui khatni mi guay khou naimei kapwm hei kasiamhna chaneimei nungc nthaekc the. Hei zaeng rui Ringhpouc, ai rui Sabbathneic ta suaihiamlou the, kumna mi hei sw nthanlou the.#Tha 2.1-3; Tat 31.17

12“Ringhpouc nangniw tuang Racguangc ai rui nangniw khou tiiloumei kandic khou hei nangniw tingpui maruyna lungc bam khang rui nangniw pui nangniw pu ta chakhwang champouh sw o.#Ria 27.16; Met 15.4; 19.19; Mrk 7.10; 10.19; Luk 18.20; Eph 6.2; Eph 6.3

13“Meicbiw meicdow riu.#Tha 9.6; Lev 24.17; Met 5.21; 19.18; Mrk 10.19; Luk 18.20; Rom 13.9; Jos 2.11

14“Lungcmaanv lungcmow riu.#Lev 20.10; Met 5.27; 19.18; Mrk 10.19; Luk 18.20; Rom 13.9; Jos 2.11

15“Kaihouh riu.#Lev 19.11; Met 19.18; Mrk 10.19; Luk 18.20; Rom 13.9

16“Saraamcna meickai ta nkham riu.#Tat 23.1; Met 19.18; Mrk 10.19; Luk 18.20

17“Meicramcmei kaisaamc ta kahaw riu; meickai now ta, meickai tuang ty-bangc, kiruai, kuanniam, khatni baih baihmei guay ta ni kahaw riu.”#Rom 7.7; 13.9

Meic nunc tei Ping the

(Ria 5.22-33)

18Meic nunc tei tingthin ganh keymei khatni bianggun khwan khatni maikhou zingh zing bammei chyngbut tei how pwkhou kaniw pingna kadunh the, kumna ding ducna ding the.#Ibr 12.18,19 19Kaniw rui Mousi khou sa the, “Nang rui sa pw e thei thu aniw nking ni the; tiki Ravguangc rui kachucmei ta thu aniw ping e, aniw theic puni de.”

20Mousi rui daw the, “Ping riu; nangniw paapc taanh mak khang rui Ravguangc rui nangniw ta nchanvmei tuang de khatni kata tipinglou bammei tuang de.” 21Tiki meic nunc tei duc sihmei bamv thangc ding bam the, kumna Mousi na kha Ravguangc bammei bamv muangh zingh zingmei bamv khou tei guang tuanc bam khwan e.

Ravchabamv: Kasiamh Nimei Thiak

22Isaraelmei khou sa o twna Ringhpouc rui Mousi khou kumna sa the: “Ringhpouc ai rui tingkauh thangc rui nangniw khang lat sa keymei tei nangniw how the. 23Ata kalummei khou rui mbuna daandi rui kasiamhmei rav hamh e thei kachaekc rui kasiamhmei rav ni nai nuh mak ge. 24Nangniw rui taniang tuang ravchabamv kasiamh lana khou tei kapumc rawna khaengmei khatni alamvpuatkat swna nangniw tuang lauziu khatni guaih kat ro. Nangniw rui ata kalummei bamv khang ai rui reicpatloumei bamv kathuicna khou tei, ai rui guangna nangniw ta suaihiamlou puni. 25Nangniw rui akhang ntauh tuang ravchabamv dwan thaupui ganv khou, hianloumei ntauh rui dwan nuh mak ge, kalam thu ntauh khou tei nik rui hianloumei tei rui sw mphuamlou e.#Ria 27.5-7; Jos 8.31 26Ravchabamv khou tei kailaak ni dwan kuna kasiamh nuh mak ge, kalam thu hei tei sw e thei nangniw khurou how puni.

Currently Selected:

TATPATMEI 20: RONGBSI

Highlight

Copy