DANIEL 9
9
Daniel rui Kamei nunc khang Huayneymei
1Medimei Darias, Serses nac mpouh rui Babilonmei guangcdic khou guangh sw bam khwan e. 2Kamei guangh swmei rey liangmei kwm, nthanmei latrik guay ai kathaina Ringhpouc rui muhzwng Jeremia khou dincloumei Jerusalem ta swkamut kamaina tingkwm 70 ganclou nimei lam khou kakhanhna bam khwan e.#Jer 25.11; 29.10 3Ai Poubauhmei Ravguangc khou lungh gutna huayneyna, kakhou huaychana, munthiangcna, zaengsiphey baanvna, khatni mbut khou dungcna bam khwan e. 4Ai rui Ringhpouc aRacguangc khou huayneyna amei nunc paap kalauhna bam khwan e.
Ai rui sa the, “He Poubauhmei Ravguangc, nang hei daic e, kumna aniw nang ta champouh e. Nang thu nang tuang latdyng ngaek ge kumna nang ta nzianmei khatni nang tuang latdanv piumei nunc ta taek makna nzian bam e.
5“Aniw hei paapc taanc the, aniw hei si the, aniw nkhuai the. Nang rui aniw ta taanh khang tiimei latdanv tei aniw piu mak khe kumna nang rui aniw khou dincloumei nchumhmei khou tei rui aniw duc tat the. 6Aniw tuang guangc nunc, dihsinpouc nunc, aniw pupouc nunc, khatni aniw zaat kapwm khou muhzwng nunc rui nang zanc khou saloumei lat guay tei aniw piu mak khe. 7Poubauhmei nang thu nchumhmei na taanc e, tiki aniw rana rui aniw ruc khou zakmei phungc guang the. Juda khatni Jerusalem khou bammei aniw guay khatni duhmei anamei kandic guay khou zinphakloumei Isaraelmei guay hei mi kumcna zakna bammei tuang the. Kalam thu kaniw kaguayna nang hu khou lwmlou nuh mak khe. 8Aniw guangc nunc, aniw tuang dihsinpouc nunc, khatni aniw pupouc nunc hei zakmei taanv taanc the kumna Poubauhmei nang ruc khou paapc taanc the. 9Aniw hei nang ta liamna lungc khwan sini nang thu zauzian thay e khatni kuaklou thay e. 10Nang bangc muhzwng nunc khou rui dincloumei nang tuang latdanv guay theilayna lungh khang aniw khou sa pwkhou, He Ringhpouc aniw Racguangc, aniw nang lat nkinglou mak dyng the. 11Isaraelmei guayna rui nang tuang latdanv guay sw bak the khatni nang rui samei tei nking zih the. Aniw rui nang ruc khou paapc sw the, kumna nang bangc Mousi tuang latdanv khou hyloumei syang guay tei aniw ruc khou keylou the. 12Nang rui aniw khou khatni aniw tuang dihsinpouc nunc khou taanclou puni twna samei tei nang rui taanc the. Nang rui Jerusalem ta kandih nam ruc khou naimei kaidai baihmei guay suangc ranvna dandi tii the, 13Mousi tuang Riakdanv khou hyloumei dandi guay tei tii the tiki ntaw nganvna, He Ringhpouc aniw Racguangc, aniw hei aniw paap khou rui lunghlaic guangna khatni nang tuang nchumhmei tei suicna aniw nang ta tipian khang karamh mak ge. 14He Ringhpouc aniw Racguangc, nang rui aniw ta dandi tii khang chamdaanv the, kumna nang taanc the, kalam thu nang thu nchumhmei taanc e khatni aniw thu nang lat nking mak ge.
15“He Poubauhmei aniw Racguangc, nang rui nang mei nunc ta Izip khou rui zay patna nang ngamv lyanlou the, kumna nang ngamv tei ntaw ni ningtowna bam e. Aniw paapc taanc the, aniw nkhuai the. 16Tat kanmei ganv khou nang rui aniw ta dinggaeklou the, kumhpui zaeng rui Jerusalem ruc khou nang lungpuamclou dat ri tho. Mi hei nang tuang kaidai e, nang tuang nthanmei chyngbut re. Aniw paap zaeng rui khatni aniw pupouc rui taanc kanmei simei guay khang tei rui kandih kainingmei nunc rui Jerusalem ta khatni nang mei nunc ta mala the. 17He Ravguangc, ntaw thu ai rui huayneymei khatni huaychamei hei chulou o. Swra kanmei nang tuang Ravkai tei duanc thaulou dat ro; nang hei Ravguangc e twmei meic katana thay diu khang. 18Aniw rui samei nkinglou o, He Ravguangc, aniw ta zauclou o, khatni aniw rui ryanra bammei khatni nang zanc phunghmei kaidai rui ryanra bammei hei zauclou o. Aniw huayney bam e kalam thu nang hei zauzian thaymei zaeng rui e, aniw rui nchumhmei taanhmei zaeng rui hamh e. 19He Poubauhmei, aniw rui neymei chulou o. He Poubauhmei, aniw ta kuaklou o. He Poubauhmei, aniw rui samei chulou o, kumna taanclou o! Nang hei Ravguangc e twmei meic kathuicna thay diu khang, nyanlou ri tho! Mi kaidai khatni mi mei nunc hei nang tuang e.”
Gabriel rui Ndawman Kabac Dincloumei
20Ai kumna huayney key the, apaap khatni amei Isaraelmei paap kalauhna, khatni katuang nthanmei Ravkai khou tiguanglou dat khang Ringhpouc aRacguangc khou huaychana bam khwan e. 21Ai huayneyna bam khou, reymei ndawman khou howlou kanmei Gabriel tei ai bammei bamv nzwanna samc guang the. Hei tei tingzyn khaengmei ganv khwan the.#Luk 1.19,26 22Kamei rui akhou sa the, “Daniel, ndawman kabac tei nang khou tithaylou khang ai guangpui tuang the. 23Nang Ravguangc khou huaycha thau khou tei, kamei rui nang khou dawlou kan the. Kamei nang ta nzian e, kumna kamei rui dawloumei tei nang khou dinclou khang ai guangmei tuang e. Ndawman tuang kabac tei ai dinclou puni the, nking chuyna nking tho.
24“Tingkwm chanei luan 70 hei nang mei nunc khatni nang tuang nthanmei kaidai ta paapc khatni simei khou rui tiduaklou khang Ravguangc rui tamcloumei ganv dak the. Ndawman khatni dinckasuakcmei tei guang tangh khang paapc kuaklou puni the khatni tingsaeng nzihmei tiilou puni the, kumna nthanmei Ravkai tei katgut dat puni the. 25Mi hei chaklou o khatni kabah thay o: Jerusalem kasiamh thau dat khang latdanv tipat khou rui thauna Ravguangc rui kadahloumei kapy swmei guang makmei dak khou, tingkwm chanei luan chanei guang puni. Jerusalem tei chaengdai mpeyna swlouna khatni rigaekbamv taancna kasiamh thau dat puni, kumna hei tei tingkwm chanei luan 62 puni, tiki hei tei ryanramei ganv sw puni. 26Kumna mi ganv tei luai guang pwkhou Ravguangc rui kadahloumei kapy swmei ta nzih makna swluai puni. Kaidai khatni Isaraelmei tei pumtan-baantanhmei dihsinpouc akhat tuang rihmei rui rihkeyna swmutlou puni. Luailou nimei tei Ravguangc rui chamdaanvloumei suc-rih khatni swkamut kamaimei rui dui daih kumc guang puni. 27Dihsinpouc tei tingkwm chanei thu meic mpeyna lev twna ntipna latdyng sin puni, kumna mi ganv kapaek akhat twan kan pwkhou, kamei rui khaengmei khatni puatkat tiimei tii nthaekc kan puni. Karaeng kadangmei puat Ravkai tuang kauh liangmei bamv khou lou puni, kumna hei tei loumeipu tei Ravguangc rui kakhang chamdaanvloumei luaimei tei kakhou ti-ariwlou mak saan hei tei mi khou tei nai bam puni.”#Dan 11.31; 12.11; Met 24.15; Mrk 13.14
Currently Selected:
DANIEL 9: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
