DANIEL 8
8
Daniel rui Lauziuchic khatni Ziuchic Howmei
1Belshazar rui guangh swmei tuang kathumhmei kwm, kaneimei ndawman Daniel ai rui manv dat re. 2Mi ndawman khou tei thay mak daekna ai Elam ramv khou naimei raengh raeng piangh piangloumei Susa kaidai lungc khou bam khwan e. Ulai Duithuak paengc khou ai ding bam khwan e, 3kumna kachei saengc nganvmei kanei naimei lauziuchic akhat ding bammei ta how khwan e. Kachei akhat tei akhat suangc saengc e, kathanc ni kathanc e. Hei tei thau nkhamhmei e. 4Lauziuchic tei kachei tei neihkey, dihpy, dihba kangana bammei ta ai zauc bam khwan e. Khouringh akhat na sini kata thingc ngam mak ge khatni kangamv khou rui duak pat ngam mak ge. Kamei rui taanc nii niimei taanc e kumna kalyan tiina bam e.
5Mi tuang kabac hei tabui tuang lana cho twna kakhanhna bam khou ziuchic akhat neihkey thangc rui katan kandih sini kahitow makna pak ranv sihna pak ngangh the. Hei tei kamik kanei kak khou kachei kuidwnmei akhat nai e. 6Ai how kanmei duithuak daeng khou ding bammei lauziuchic daeng thangc tei pak guangna katanh patna sow the. 7Hei tei rui lauziuchic ta tei sowna bammei ta ai zaucna bam the. Kamei tei heidikamv kalungpuamcna lauziuchic khou tei guang sow tina kachei kanei tei bau the. Lauziuchic tei akhangv khang kapumtan maek khe. Mi ta tei kandih khou diangc bow keyna niibin the, kumna kata kanlou ngammei meic gaanv khat na sini maek khe.
8Ziuchic tei kalyan tii hay hay thau the, tiki kangamv tei kanganv kauh tangc pwkhou kachei tei swbau kan the. Mi phaan tei kuidwnmei chei padeih thau the, mi padeih tei kandih kwn padeih souc ntamv the. 9Mi chei padeih pang khou akhat khou tei kachei launa akhat thau the, mi tuang ngamv tei dihba biak, neihpat biak khatni Nrianhloumei kandic biak thangc daic pat the. 10Hei tei taanc thauna tingkauh ricmei nunc ta adow the, gaanchuangcna guay ta nganvna adow the, kumna hei tei rui mi nunc gaanvsaekc ta tei kandih khou phaic key the. Khatni mi nunc ta tei niibin the.#Nda 12.4 11Hei tei rui tingkauh ricpy ta nganvna ngam the, kumna kakhou khaengpuat tii bammei tei tii nthaekclou the. Kumna Ravkai ta tei swtanaclou the. 12Meic nunc tei rui tingmik kathuic khaengmei tei nthuihna khaengmei phaan meic nunc tei hei khou tei paapc taanc the, kumna nchumhmei ravchap tei kandih khou phaic keylou the. Kachei tei ngam tu rana the.
13Khoutei baanchara akhat rui akhat khou, “ndawman khou howmei guay hei asaanh tingsaengna tat key bam puni cho? Tingmik kathuic khaeng bammei phaan hei asaanh tingsaengna karaeng kanmei paap hei taanc lyn bam nina cho? Asaanh tingsaengcna tingkauh ricmei ta khatni Ravkai ta nii bin bam nina cho?” twna thanv bammei ta ai chu the.
14“Mi hei zaeng 1,150 tat key puni, mi ganv lungc khou tei lauthwan tingzyn khaeng bammei hei nai lak khe. Mi tangv tei Ravkai tei kalwnlung khou tiguanglou dat puni” twna baanchara akhat rui daw bammei ta ai chu the.
Ndawman Kabac tei Gabriel rui Dincloumei
15Ai rui mi ndawman tuang kabac tei thay khang karamcna bam khou, thay mak daekna gaanv khat ahu khou ding bam khwan the. 16Ulai Duithuak paengc thangc rui khwan akhat rui “He Gabriel, kamei rui how kanmei tuang kabac tei kakhou dinclou tio,” twna kauc patmei khwan ai chu the.#Luk 1.19,26 17Gabriel tei guangna adaeng khou ding the, khoutei ai ping langvna kandih khou bowkey the.
Kamei rui akhou sa the, “He maansei nacle, mi kabac hei thay o. Mi ndawman hei kandih luaimei lam khou e.” 18Kamei rui sana bam khou, ai theihmei kumcna ramh thay dat makna kandih khou bowkey bam khwan the. Tiki kamei rui ata zay ding thaulou the. 19Khoutei kamei rui sa the, “Ravguangc lungpuam thai kiu tabui pat puni cho twmei ai nang khou lyanlou puni e. Mi ndawman hei kaganv luai nimei lam khou e.
20“Nang how kanmei kachei kanei naimei lauziuchic tei Medi khatni Persia guangcdic e. 21ziuchic tei Grikmei guangcdic e, kumna kamik kanei kak khou kuidwnmei chei tei reymei guangc e. 22Reymei chei tei bau kan pwkhou thau datmei chei padeih tei mi guangcdic khou tei rui bak pat nimei guanghdic padeih e, hei tei reymei guangcdic tei kumcna tanc lak nimei lyanmei tuang e.
23“Mi guangcdic guay tei kaniw tuang ganv luai guang pwkhou kaniw tei heidikamv si tina kaniw ta tei dandi tii puni. Khoutei kalung tanhmei, kakhei kalung simei, meic guatmei guangc rui guangh sw puni. 24Kamei tanc thau puni, tiki karana pumtan rui hamh e. Kamei rui si sihmei swkamut kamaimei tiguang puni khatni kamei ngam tu rana puni. Kamei rui pumtan baantan meic nunc ruc khou khatni Ravguangc tuang mei nunc ruc khou swkamut kamaimei tiguang puni. 25Kamei karouc sina katuang meic guatmei thak khou tei kamei ngam puni. Kamei kagaengh sw puni khatni nkamhna meic mpeyna ta swmaan puni. Guangh daic liangmeipu ta nganvna kamei khaengc puni, tiki maansei pumtan sinsw makna kata swmutlou puni. 26Lauthwan tingzyn khaengmei tuang ndawman, nang khou kabah dinclou kanmei tei guang tangc puni. Tiki hei tei ntaw thu ndauh pat ri ho, kalam thu hei tei guang makmei hu khou kaganv mpeyna nai puni he.”
27Ai zaeng mpeyna lungh ryanrana khatni akhang nsuanna bam khwan e. Mi tangv tei ai thau dat lana guangh rui akhang tiiloumei taanv tei taanh khang tat dat the, tiki mi ndawman tei rui ata ti-nnguang the kumna hei tei kabah thay ngam mak khe.
Currently Selected:
DANIEL 8: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
