DANIEL 11
11
1Ata nkhavlou khang khatni gaeklou khang kamei kathouc khwan e. 2Kumna ai rui nang khou dinclou nimei hei kalingmei lat kiu the.”
Izip khatni Siria tuang Guangcdic
Baanchara tei rui sa the, “Guangh kathumh rui Persia ta sin puni, mi tangv tei padeihmei guang puni, mipu tei baihmei guay khang suangc lungcgay chingkhiuh puni. Kangamv khatni kalanv tei kanganv daic tangc pwkhou kamei rui Grikmei guangcdic ta khaengc puni.
3“Mi tangv tei tancbauhmei guangc pat puni. Kamei rui daihmei guanghdic akhat khou dihsin puni kumna kamei rui kahaw hawmei kamei taanc puni. 4Tiki kangamv tei kare tangc pwkhou kaguanghdic tei kalangv padeih khang bak pat puni. Kakikta hamhmei guangc nunc rui kaphaan guanghtu puni, tiki kakhou naimei ngamv tei kaniw khou nai lak ge.
5“Izipmei guangc tei tanc puni. Kasuangc tanc dianghmei rihpy gaanv khat rui daic ranvmei guangcdic ta sin puni. 6Tingkwm ramhbiuc dou tangv Izipmei guangc rui Siriamei guangc lev giang khanvna kanacpui ta mipu now khang tei tii kan puni. Tiki mi giang khanvmei tei tingsaengc lak ge, kata, kagaanv ta, kanac ta, khatni kamei rui nduangh tatmei bangc nunc ta swluai puni. 7Mi tangv tei katumcna, kariang kaluaicmei gaanv khat rui guangh sw dat puni. Kamei rui Siriamei guangc tuang ricmei nunc ta adow puni, kaniw tuang ricpan lungc khou gutna, kaniw ta ngamlou puni. 8Kaniw tuang racmaengc guay khatni mi ravmaengc nunc khou katloumei kachaekc khatni daandi tuang puat guay tei kamei rui Izip thangc phungc guang dat puni. Nchu-nzaenghna lunghmei tingkwm mpeyna tangv 9Siriamei guangc rui Izip khou rih key puni, tiki kata nthau hanc dat puni.
10“Siriamei guangc nunc tei rih khang chamdaanv puni kumna rihmei kangdai akhat khuam kaduai puni. Kaniw pang khou gaanv khat rui duidaih kumcna liak key puni kumna zauczihmei rihgaekkai ta adow puni. 11Izipmei guangc tei kalungpuamcna Siriamei guangc ruc khou rih keyna katuang ricmei kangdai ta ngam puni. 12Kamei rui rihngammei khatni rihmei mpeyna ta swluai kanmei khang tei kamei kagaengh sw puni, tiki kamei ngam tan bam lak ge.
13“Siriamei guangc tei hanc dat lana katuang nai bam khwanmei ricmei nunc khang tei suangc geicna khuam dat puni. Kaganv gaymei guang pwkhou, kamei daic ranvmei khatni rih na gay ranvmei sinna guang dat puni. 14Mi tangv tei Izipmei guangc ruc khou meic mpeyna rui rih thau puni. Tiki Daniel, kaniw rui how kanmei ndawman tei guangtangh khang rui meicngam meicliammei nunc gaanvsaekc rui liam thau puni. Tiki kaniw ta zaw tisilou puni. 15Kumna Siriamei guangc rui raengh raengloumei kaidai ta ding haengvna mi ta tei laa puni. Izipmei ricmei nunc tei adow key dat lak khe; kaniw pang khou tancbauc liangmei nunc tei nganvna pumtan nai lak khe. 16Siriamei rihkeymeipu tei rui kaniw ta kamei rui sw nii niimei thak swlou puni the, kata meic gaanv khat na rui sini thing dat ngam lak khe. Kamei nrianhloumei Kandic khou guang ding puni kumna kamei rui mi ti hei kangamv bangc khou lou puni.
17“Siriamei guangc rui katuang ricmei guay ta nduanghna kandih laa khang tat pat puni. Khoutei, kata zauczihmei tuang guangcdic swmutlou khang kamei rui Izipmei guangc ta giang khanv puni khatni kanacpui ta kaniw khang tii puni; tiki katuang raeng tei guangtangc lak ge. 18Mi tangv tei kamei rui zaatc nunc ta duipui khou rui adow puni kumna kaniw mpeyna ta ngam puni. Tiki gindic tuang ricpy rui kata ngam puni kumna kagaengh tei tinganvlou puni; kalingna Siriamei guangc tuang gaengh swmei tei kakhou tihanclou dat puni. 19Guangh tei kakandih tuang rihgaekkai guay khou hanc guang dat puni, tiki kata ngam puni, kumna hei tei kakhang nganvmei puni.
20“Katang khou guangh akhat guang dat puni, kaguanghdic khou lanv mbu thau khang rui dihkhav mbu thauna meic nunc ta tirai khang kamei rui dihkhav neymei gaanv khat ta thouc pat puni. Kaganv katit namei lungc khou mi guangc ta tei swluai puni, tiki hei tei ndauhna hamh e khatni rih bamv khou rui ni hamh e.”
Siriamei Guangc Meicsimei
21Baanchara tei rui sa key dat re, “Katang khou guang dat nimei Siriamei guangc tei meicsimei, guangh swbiuh makmei rui guangh sw puni. Tiki kamei lwm mak daekna guangna karouc sina ngamv tei asut kan puni. 22Kata akhangvmei kathuicna ta Ravguangc tuang Tingkuh ta nganvna swmaan puni. 23Giang khanv lana kamei rui zaatc baihmei nunc ta guat puni, Kamei zaatc launa ta sin bammei khou rui tanc khith khit thau puni. 24Kamei rui tithay rey maekna lungcgaymei kandic akhat khou rihkey puni kumna kapu kapouc gaanv khat na rui sini taanh makmei taanv kamei rui taanc puni. Khoutei kamei rui rih khou rui asut guangmei puat khatni lanv guay tei kamei nunc lev nzanh puni. Kamei rui rihgaekkai guay ta adow khang sw puni, tiki katuang ganv tei luai nuangc kan puni.
25“Ngammei, tancbauhmei rihmei kangdai naimei Izipmei guangc ta adow khang baucna kamei rui rihmei kangdai khuam puni. Kumna Izipmei guangc ta kamei rui guat puni kumna Izipmei guangc tei kata ngam lak khe. 26Katuang diangc liangmei baanhza nunc rui kata swkasiclou puni. Katuang ricmei geihmei ta swluai puni, kumna katuang ricmei nunc ta tei swmutlou puni. 27Hei tangv tei guangh kanei tei kuakpaeng akhat na khou tu kariu khang dungc key puni, tiki kaney lungning tei thu si puni, khatni kaney khat khat khou saraamc puni. Kaney rui kahawmei tei kaney laatow lak ge, kalam thu mi khang tei kaganv guang mak he. 28Siriamei guangc tei kamei rui asut guangmei guay tei phungcna kai guang dat puni, Ravguangc mei nunc tuang ravchap tei swmaan khang kalung khou dinglouna guang dat puni. Kamei kahawmei guay taanc lana kakandih khou guang dat puni.
29“Katang thangc kamei Izip khou rihkey dat puni, tiki mi ganv khou tei ramh guayna kalaic puni the. 30Rommei nunc rungh khou guangna kata akhangv puni the, kumna kata tiping puni the.
“Khoutei kamei kalungpuamcna khangc pat datna Ravguangc mei nunc tuang ravchap ta swmaan khang karamc puni. Mi ravchap ta tei ganc patmei nunc rui samei lat ta kamei laa puni. 31Katuang ricmei gaanvsaekc rui Ravkai ta swtanac puni. Tingmik pum khaeng bammei tuang ta tei kaniw rui ti-nthaekc lana karaeng kadangmei taanv taanclou puni.#Dan 9.27; 12.11; Met 24.15; Mrk 13.14 32Guangh tei rui meic guatna kaniw tuang ravchap ganc kanmei nunc ta tei kabiak tiliangc puni, tiki Ravguangc theilaymei nunc thu adow akhangv puni. 33Ningtyngmei kapy nunc tei kaniw tuang ningting meic baihmei nunc khou dinclou puni. Tiki kaganv akhat kaniw gaanvsaekc ta rihbamv khou swluai puni, mai rui rawluai puni, khatni gaanvsaekc ta kaniw tuang asutna kangkai khou lou puni. 34Swluaina bam khou tei Ravguangc mei nunc tei nkhavloumei gaanvsaekc laatow puni, lungning nthan makmei meic mpeyna kaniw pang khou lay kazauh puni. 35Mi ningtyngmei kapy nunc gaanvsaekc ta tei swluai puni, tiki mi thai tei meic nunc ta tei sw nthan puni. Ravguangc rui nrianhloumei nkhamhmei ganv guang mak saanv mi hei tat key bam puni.
36“Siriamei guangc tei kamei rui kahawmei theilayna taanc puni. Kamei rav guayna suangc ni daic e, Kauh Liangmei Racguangc suangc sini daic e twna kagaengh sw puni. Ravguangc rui kata dandi tii mak saanv kamei heikumna sw bam ngam puni. Ravguangc kamei rui raengclou kanmei raeng tei suai makna tat key puni.#2 Th 2.3,4; Nda 13.5,6 37Kapu kapouc nunc rui kalum bammei rav ta, khatni meicpui nunc rui nzianmei rav ta guangh tei rui thouh sw mak puni. Kalingna, kamei rui rav katana ta thouh sw mak puni, kalam thu kamei hei mi guay khang tei suangc sini daic e twna ning e. 38Mi phaan tei rihgaekkai guay gaek bammei rav ta kamei champouh puni. Kapu kapouc rui kalum zat zat makmei rav khou kamei rui kachaekc, daandi, kunghmei tauc khatni baihmei kamanv kunghmei kaipat tii puni. 39Katuang rihgaekkai guay gaek khang ginramdic rav ta kalummei nunc ta sinsw puni. Kata guangh e twna laaloumei nunc ta tei kamei rui chakhwang sw daicna swlou puni. Kaniw ta bamv kauhmei khou lou puni, kumna kaniw khang swan swna kandih tii puni.
40“Siriamei guangc tuang nkhamhmei ganv tei guang changh guang ni khou, Izipmei guangc rui kata adow puni. Siriamei guangc rui katuang takuanc gari guay, takuanh guay, khatni rungh mpeyna sinswna kapumtan patna adow akhangv pat puni. Kamei rui kandih mpeyna khou duidaih kumc rihkey puni. 41Nrianhloumei Kandic khou nganvna Kamei rui rihkeyna meic aching aching swluai puni, tiki Edom, Moab, khatni Ammon khou nsaekcloumei thu duak puni. 42Kamei rui mi kandic guay khou tei rihkey pwkhou Izip ta nganvna nsaekclou lak khe. 43Izip tuang nkamhloumei kachaekc khatni daandi tuang lanv khatni baihmei kunghmei khiukhingh guay kamei rui laa tat kan puni. Kamei rui Libia lev Sudan ta laagut puni. 44Mi tangv neihpat lev dihpy thangc rui guangmei chamv rui kata tiping puni, kumna kamei katheic-karingc patna adowna meic mpeyna ta swluai puni. 45Duipui lev chyngbut kak khou Ravkai ding bammei bamv khou tei katuang guangh tuang daihmei pheykai pang nganvna kamei rui katingh thau puni. Tiki kata nkhavloumei meic gaanv khat na sini maekna kamei theic puni.”
Currently Selected:
DANIEL 11: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
