AMOS 5
5
Lunghlaih khang Kawmei
1Isaraelmei nuncle, ai rui nangniw ruc khou suanlou nimei theihbeih lu hei nking o:
2Liuchang Isaraelmei tei punkey kan the, thau dat ngam lak khe!
Kaniw tuang ramv lungc khou karana ta ganclou bam the,
meic gaanv khat na rui sini kata zaythau dat mak khe.
3Kauh Liangmeipu Ringhpouc rui sa e, “Kalam thu Isaraelmei tuang kaidai akhat rui rihmei 1,000 thouc pat pwkhou meic 100 na hancguang dat the; kaidai akhat rui 100 thouc pat pwkhou ruh na hancguang dat the.”
4 Ringhpouc rui Isaraelmei nunc khou sa e, “Akhou guang o, kum e thei nangniw ringc puni. 5Beersheba thangc kalum tat bam nangh e. Ata Bethel khou phu bam nangh e, Bethel hei maek puni the. Gilgal thangc tat bam nangh e, Gilgalmei ta ginramc thangc nym tat puni the.”
6 Ringhpouc khou guang o, kum e thei nangniw ringc puni. Nangniw guang mak ge thei, kamei rui Isaraelmei nunc ruc khou ramhac kumc guang puni the. Mai rui Bethelmei nunc ta raw puni the, hei tei meic gaanv khat na rui sini swmit dat ngam lak khe. 7Nchumhmei ta karaengmei khatni meic nunc ta niibinmei nangniw hei sansi e dav!
8 Ringhpouc rui gaanchuangcna guay ta damclou the.
Kamei rui zinghmei ta kalaanv khatni kalaanv ta zingbangc tiguanhlou the.
Kamei rui duipui dui ta kaw guang the kumna hei tei kandih nam ruc khou bun keylou the.#Job 9.9; 38.31
9Kamei rui tancbauhmei nunc khatni kaniw tuang rihgaekkai guay ta swmutlou the.
10Latzan bamv khou nangniw tuang khuay khang nangniw ta luhmei nunc khatni nchumhmei lat samei nunc ta nangniw karaeng e. 11Nangniw lungcsi lungcroucmei nunc ta rai e khatni kaniw tuang nap-bi asut tu asut zangv e. Hei zaeng rui nangniw rui kasiamhloumei gaymei ntauhkai khou nangniw lungc ni tuang hamh the khatni nangniw rui lingcloumei gay kanmei drakha pikwan tuang drakhadui tei nangniw zangvtow ni tuang hamh the. 12Nangniw paap adih si cho twmei ai thay e khatni twanlyammei khuay nangniw azuh taanc kan tu cho twmei ai thay e. Nangniw meicgaymei nunc ta rai e, lanvbiwmei tu e, khatni latzan bamv khou lungcsi lungcroucmei khou nchumhmei taanclou mak diu khang thingc e. 13Kumhpui zaeng rui, mi kumhmei simei ganv khou hei reih reina bammei hei ningtyngmei di the.
14Simei taanc riu, nchumhmei taanh khang karamc o, kum e thei nangniw ringc puni. Kum pwkhou nangniw rui samei kumcna Ngamparymei Ringhpouc Ravguangc rui nangniw ta bam nduanghlou puni. 15Simei ta karaeng o, gaymei ta nzian o, khatni latzan bamv khou nchumhna latzan sw o. Kum pwkhou ntaw theic nsaekcloumei nunc ti hei Ringhpouc rui zauc nzianlou pwng e.
16Hei zaeng rui Ngamparymei Ringhpouc Ravguangc rui sa e, “Kaidai tuang chaengdai guay khou puihuayna kauc puni. Latlu khang niakloumei nunc lev theihmei khang latlu nchamh khang lungcsi lungcroucmei kailau taanhmei nunc ta nganvna kaw puni. 17Drakha pikwan guay khou nganvna nuihmei phaan kap ngiuh ngiuna kap bam puni. Mi guay hei pat puni the kalam thu nangniw ta dandi tii khang ai guang pw the.” Ringhpouc rui sa the.
18 Ringhpouc tuang tingmik ta kahaw bammei nangniw sansi e dav! Tabui khang nangniw mi tingmik ta kiuc kahaw bam tu cho? Nangniw khang mi tingmik kiu zinghmei tingmik puni the, neihla zaenggaymei tingmik ni tuang hamh the. 19Hei tei kamang hu pakna chagamh hu khou pakloumei kumc puni the, khatni kai khou guangna ngaengsaengc khou baanh mbaenglou pwkhou nrui rui nchowmei kumc puni the. 20Ringhpouc tuang tingmik hei zinghmei tingmik puni the, neihla zaenggaymei tingmik ni tuang hamh the, hei tei gaanhmei riw khat sini maekna zingh zingmei tingmik puni the.
21 Ringhpouc rui sa e, “Nangniw tuang khumngai tei ai karaeng e; ai hei tei akhaengv ngam mak ge!#Isa 1.11-14 22Nangniw rui akhang rawna khaengmei khatni nap-bi puatkat phungc guang pwkhou mi guay tei ai laa lak ge. Akhang khaeng khang kamei tigayloumei khouringh nunc tei ai laa lak ge. 23Nangniw tuang kachin karomei lu guay tei nthaekc tho; nangniw tuang nrah khwan ai chu nii mak ge. 24Mi phaan tei nchumhmei tei duithuak kumc luangc o, khatni ravchaptatmei tei thip dat zat lakmei duiriang kumc luangc o.
25“Isaraelmei nuncle, ai rui nangniw ta sypungramv khou zay tat bammei tingkwm 40 lungc khou tei nangniw ta khaeng o khatni kat ro twna sa kan mak ge.#Lat 7.42,43 26Tiki ntaw nangniw tuang guangc rav Sakkut, khatni nangniw tuang gaanchuangcna rav, Kaiwan ta nangniw kalummei zaeng rui, nangniw ta mi ravmaengc nunc tei phungcna 27Damaskas paengc kandic thangc nym zay tat puni the.” Ngamparymei Ravguangc twna kawmeipu rui mi hei sa the.
Currently Selected:
AMOS 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
