AMOS 4
4
1Mi hei nking o, Samariameipui nuncle, kataek gaymei Bashan tuang guaickui nunc kumc kamei gaymeipuithiu, nsuanmei ta sina swmei, lungcsi lungcroumei ta rairiumei, nangniw gaanv nunc ta zouh luan khang thouc bammeipui nunc thiu! 2Kauh Liangmeipu Ringhpouc kamei nthanmei zaeng rui kamei rui kumna Latdyng ding the, “Nangniw ta kaniw rui khavkhuay rui zay tat nimei tingmik guang pw the; nangniw kaguayna khavkhuay khou manhmei khav nunc kumc puni the. 3Nangniw ta raengh ramei phoukai khou zay patna nrou pat puni the.”
Isaraelmei Kabah Thay Zat Mak ge
4Kauh Liangmeipu Ringhpouc rui sa e, “Isaraelmei nuncle, Bethel tuang nthanmei bamv khou tei tatna paapc taanc tho! Gilgal thangc tat lana nangniw liam ni saanv liam tho! Lauthwan pum khaeng khang khouringh laaguang tho, kumna zaeng neih thumh pum nangniw tuang kadam ruh tuang akhat tei laaguang tho! 5Khoutei thuanc kumei tuang ntyan kat tho, kumna nangniw rui phungc guang haapmei kaipat khang ta nangniw gaengh sw tho! Nangniw rui taanc niimei kiu hei tei hamhna cho!
6“Ai rui nangniw tuang kaidai guay khou nap nkowmei tiguang the, tiki nangniw akhou lunglaic guang dat mak ge. 7Nangniw nap bang khang tingdui kage nai kare rap khou ai rui ting ta khaamlou the. Ai rui kaidai akhat khou tiriulou the, baihmei khou tiriulou mak khe. Laupuk akhat khou tiriulou the, laupuk baihmei akhat thu kangc ngam the. 8Kaidai mpeyna khou meic nunc rui dui nai pwng e twna kaidai akhat khou tarimei rui zangv makna ruan guang the, tiki khou tei zangv biuc ariw mak khe. Kum bam tisini nangniw akhou lunghlaic guang dat mak ge.
9“Nangniw nap bang titheic ngam khang mpwan suhmei khatni katiuh ai rui tiguang the. Nkav rui nangniw tuang pikwan khatni drakhalau, nangniw tuang tadut bang khatni Olive bang tu ngam the. Kum bam sini nangniw akhou lunghlaic guang dat mak ge.
10“Ai rui Izip khou tiguang kanmei tiryanra ryanriumei kumhmei tei ai rui nangniw ruc khou tiguang the. Ai rui nangniw tuang chabwan nunc ta suc-rih bamv khou swluai the kumna nangniw tuang takuanh nunc ta swmaan ngam the. Theihmei taam rym rui nangniw tuang zypuikai guay namh padik the. Kum bam sini nangniw akhou lunghlaic guang dat mak ge.
11“Ai rui Sodom khatni Gomora ta swmaan kanmei kumcna nangniw asaekc ta swmaan the. Theic nsaekcmei nangniw hei mai khou rui kadatpatmei maiswm kumc the. Kumcna bam sini nangniw akhou lunghlaic guang dat mak ge.#Tha 19.24 12Hei zaeng rui Isaraelmei, ai rui nangniw ta dandi tii puni the. Mi hei ai rui nangniw ruc khou taanc puni the. Nangniw Ravguangc latzan ta ariw khang chamdaanv la tho!”
13Zauc lo, mi Racguangc hei chyngbut guay khatni bumaengh damhmeipu e.
Kamei rui kalung maansei khou tithaylou e;
kamei rui kalaanv ta zingbangc tiguanhlou e.
Kamei kandih ruc khou kaipouc swna bam e.
Mi guay hei Ngamparymei Ringhpouc
Ravguangc rui taanclou tuang e.
Currently Selected:
AMOS 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
