2 KORINMEI 4

Bihlai khou Bumaengh tuang Lanv

1Ravguangc rui kazauzian paan rui mi taanv hei aniw khou tiilou the, kum thena, aniw lung kachanh mak ge. 2Nkamhmei zakpui taanv guay tei aniw thu taanh mak ge; aniw thu meicguat mak ge, Ravguangc lat ta swkalaih mak ge. Mi phaan tei nchumhmei lat tei ndauh phauna dinc ndauh the, kumna aniw hei nchumh de twmei meic guay rui thay khang Ravguangc mav khou sw bam tuang e. 3Aniw tuang gaychamv hei gumlou bammei tuang nai e thei, maan bammei nunc khang tei gumlou bam tina e. 4Kaniw lwm makmei tei thu mi mbaanv tuang rav rui kaniw lungning mik titiatlou tina kaniw khou tigaanclou bammei gaanhmei, Ravguangc kumc kahakmei Khrista tuang hymdaihmei gaychamv khou rui guangmei gaanhmei ta tei kamei rui kaniw ta tihowlou mak ge. 5Aniw rui dinc ndauh bammei hei aniw rana lam khou dinc ndauh bam tu hamh e; aniw rui dinc ndauh bammei thu Jisu Khrista hei Poubauhmei e, aniw hei Jisu khang nangniw bangc nunc e twmei dinc ndauh bam tuang e. 6“Zinghmei khou rui gaanhmei gaanc pat puni!” twna samei Racguangc hei rui Khrista zaw khou gaanc bammei Ravguangc hym tei tithaylou khang, katuang gaanhmei aniu lung khou tigaanclou e.#Tha 1.3

7Mi bumaengh tuang lanv lou bammei aniu hei bihlai kumhmei tuang e; mi hei ramh guayna Ravguangc baanc khou nai e, aniu khou maek ge twmei lyan khang e. 8Aniw ta kanaek kathuic khou rui chap guang e; tiki chap piak mak ge. Swang dwang maekpui tuang mpeyna ariw e; tiki aniw mpat mak ge. 9Aniw ta zauczihmei mpeyna nai e; tiki aniw pam ni nai mak mak ge. Bai pun keylou sini; swluailou mak ge. 10Mi kumna Jisu theihmei tei kaganv kathuic aniw pumc khou phungcna tat bam e; mi hei kamei ringc bammei tei aniw pumc khou rui lyan pat khang e. 11Aniw panty saanvsaengh hei, aniw Khrista khang rui theih khang tiipatlou bam e; mi hei aniw pumc khou rui Khrista ringc bammei tei how khang e. 12Mi kiu thu, aniw ruc khou taanc bammei thu swluai khang e; tiki nangniw khang taanc bammei thu ringh khang e.

13“Ai lwmpui zaeng rui sa tuang e,” twna nthanmei latrik rui sa e. Hei tei kumcna aniw ni lwmpui zaeng rui sa tuang e.#Kal 116.10 14Kalam thu Poubauhmei Jisu ta tiringcthaulou datmei Racguangc rui aniu ta ni Jisu lev tiringcthaulou nchamcna aniu ta kapamv khou laa guanglou puni. 15Mi guay hei nangniw khang rui e; Ravguangc zauzian hei meic nunc khou mbu hay hayna zin lik patna, Ravguangc hym thuanhmei mbu thau khang e.

16Hei zaeng rui, aniw lung tangkhyn zat mak ge. Aniw tuang mbaanv pumc hei suan khith khit key bam sini, aniw tuang bumaengc hei thu tingmik pum kachaengc ringc mbu hay hay thau bam e. 17Mi kumhmei matak khat na katitna ryanra khaengvloumei khang rui tii nimei taraina makmei tingsaeng hymdaihmei tei lev thu kida khang maek ge. 18Kalam thu aniu lunghlou bammei hei thu howmei puat khou hamh e, how makmei puat khou de. Howmei puat hei thu matak khat na khang de; tiki how makmei puatc hei thu tingsaeng khang e.

Currently Selected:

2 KORINMEI 4: RONGBSI

Highlight

Copy