2 KORINMEI 3

Latdyng Thanh tuang Taanvruaimei nunc

1Mi hei aniw gaengh swna rac bam tu kumc dat bu he cho? Aniw ta sachuyloupui tatdyn nangniw khang hy khang, hamh e thei nangniw rui hylou khang, meic baihmei nunc khang kage naimei tei kumcna, aniw khang ni kage nai bu cho? 2Aniw lam khou hyloumei tatdyn kiu nangniw hei the, meic kathuicna thay khang khatni pah khang aniw#nangniw lung khou hyloumei tatdyn kiu the. 3Aniw tuang taanvthai nangniw hei, Khrista khou rui tii guangmei tatdyn kiu the twmei nthanna lyanlou the. Mi hei muk rui hy tuang hamh e, ringhmei Racguangc tuang Bumaengc rui e; ntauh paek khou hamh e, maansei lung khou hylou tuang e.#Tat 24.12; Jer 31.33; Eze 11.19; 36.26 4Ai mi hei Khrista paan rui Ravguangc hu khou baucna sa tuang e. 5Mi taanv hei aniw taanc biuhmei nunc e twna sa nuhmei tuang aniw khou ramhkhat na sini maek ge; aniw taanc ngammei hei Ravguangc rui tiilou tuang de. 6Aniw ta hyloumei Riakdanv tuang hamhna, Bumaengh tuang latdyng thanh tuang taanvtaanhmei nunc sw ngam khang tiiloumei hei Ravguangc kamei rui e. Hyloumei Riakdanv tei rui theihmei phungc guang e; tiki Bumaengh tei rui thu ringhmei tiilou e.#Jer 31.31

7Riakdanv tei ntauh paek khou hylou khwan e, kumna hei tei tiilou khou tei Ravguangc hym kachanmei tei lyanlou khwan e. Mousi zaw khou panloumei riw tei kamv key dat kan khou sini, Isaraelmei nunc tei Mousi zaw zauc adyang ngam mak khwan e. Theihmei phungc guangmei Riakdanv tei tiilou khou sini heidi hymdaicna tiilou e thei,#Tat 34.29 8Bumaengh tuang taanv hei thu adih hymdaic puni cho! 9Latzan swmei tuang tei sini heidi hymdaic e thei, ravchaptatmei phungc guangmei tuang hei thu adih hymdaic puni cho! 10Ntaw tuang hymdaihmei hei rui reynungc tuang tei suangc mbu taph tappui zaeng rui, reynungc tuang hymdaihmei tei thu maan kan the twna aniu sa nuh the. 11Kaganv akhat na tuang tei sini mi kumcna hymdaic e thei, tingsaeng tuang thu adih hymdaic puni cho!

12Aniu khang mi kumcna rigwnmei hei naipui zaeng rui aniu baucna chamv hei dinc the; 13kamv keyna maan dat kan nimei kazaw tei Isaraelmei nac nunc how mak khang Mousi rui kazaw gum kanmei tei kumcna aniu thu gumbinlou dat mak khe.#Tat 34.33 14Isaraelmei nunc tuang lungning tei gumbinlou the, kum tina latdyng guangc tei pac pwkhou, ntaw nganvna kaniw lungning tei hei tei rui gumbinlou bam muay di he. Khrista khou guanglou pwkhou na rui gumlou bammei tei kakhang laanc patlou e. 15Ntaw nganvna kaniw Mousi tuang Riakdanv hei pac pwkhou kaniw lungning tei gumbinlou bam di he. 16Tiki thow pw ni kamei Poubauhmei biak karih pat pwkhou, mi zawgumphey tei laanc patlou e.#Tat 34.34 17Poubauhmei kamei hei Bumaengh e, Poubauhmei tuang Bumaengc rui nyngswmei tiilou e. 18Kum thena, aniu guayna hei, aniu zaw gum makna, Poubauhmei tuang kachanmei hym tei aniu khou how e. Mi Bumaengh swmei, Poubauhmei khou tei rui guangmei hym tei rui aniu ta kata luihmei hymdaihmei khou mbu hay hayna tigwanlihlou e.

Currently Selected:

2 KORINMEI 3: RONGBSI

Highlight

Copy