2 KORINMEI 11

Paul Khatni Guatmei Latdiutatmei nunc

1Ai mpangmei kumcna sa pwsini nangniw khaengvlou pungh e twna ning e. 2Ai nangniw ruc khou Ravguangc tuang lungh geic kadanmei tuang nai e. Kalam thu ai nangniw ta Khrista khang nthanmei nowpeic ta kumcna tiilou khang sw bam tuang e. 3Ai pingmei kiu thu, Ev ta karouc simei nrui tei rui guat kanmei tei kumcna, nangniw lung nthanna Khrista ta na nzianna bam nimei khou tei rui nangniw lungning tei zay mbiangh pw ramc e twna e.#Tha 3.1-5,13 4Kalam thu aniw rui dincloumei Jisu tei hamhmei Jisu lam khou dinhmei nunc guang ti ni nangniw neihlana nuhlou e. Aniw khou rui laaloumei Bumaengc khatni gaychamv tei hamhmei bumaengc khatni gaychamv phungc guang ti ni nuhlou e!

5Nangniw rui latdiutatmei daihmei nunc the twna sa bammei nunc khang tei suangc ai keymei e twna khat sini ning mak ge. 6Ai lat samei khou sa thay mak bam sini, thaymei khou thu thay makmei hamh e. Mi hei kalam kathuicna khou meic guayna khou aniw lyanlou kan the.

7Ai nangniw khou Ravguangc tuang gaychamv dincloumei khang tei kaphy kadam khat sini laa kan mak ge. Nangniw ta tidaiclou khang ai nthyam key the. Hei tei ai nkhuai bu cho? 8Ai nangniw khang taanv taanc bam khou tei phwamling baihmei guay rui ata makuat the. Hei tei nangniw khang taanclou khang rui kaniw khou rui asut laa tuang kumh tuang e. 9Ai nangniw daeng khou bammei ganv khou tei akhang syandui kage naipui ganv khou, nangniw ta sw katuakc kan mak ge; Makidonia thangc rui guangmei chana nunc rui akhang kage naimei guay phungc guang e. Tat kanmei ganv khou kumcna, guang nimei ganv khou ni ai nangniw khou apuatrith tiilou ni tu hamh e.#Phil 4.15-18 10Khrista tuang nchumhmei tei akhou naina samei tuang e: i mi hei kumcna gaenghswna samei hei Akhaia khou meic gaanv khat na rui sini kiuc hamh e twna sa dat ngam pu lak khe. 11Mi hei ai nangniw ta nzian makpui zaeng rui cho? Ai nangniw ta nzian e twmei Ravguangc rui thay e.

12Baihmei “Latdiutatmei nunc” ta tei, aniw rui sw bammei kumcna kaniw ni sw bam de, twna kaniw gaengh swna sa bammei tei tisa mak khang aniw ntaw sw bammei hei kumcna sw bam muay puni. 13Mi kumhmei mei nunc tei latdiutatmei ling hamh e—kaniw hei ravtaanv taanhmei khe swmei, Khrista tuang latdiutatmei khe swmei meic guatmei latdiutatmei nunc e. 14Mi khou hei ngak khang maek ge. Seitaan nganvna gaanhmei kauh baanchara khe sw ngam de. 15Kumna kabangc nunc rui thu ravchaptatmei bangc nunc khe swmei hei kadath datpui tuang hamh e. Nkhamh khou thu kaniw taanv thai kaniw laa puni.

Paul Latdiutatmei Akhat Swna Ryanra Khaengvmei

16Ai sa kanmei tei kumcna, ai hei mpangmei e twna meic gaanv khat na sini ning mak kan diu. Tiki nangniw mi kumcna ning e thei, ai gaenghsw khath tw nuh khang ata mpangmei lana e twna laalou o. 17Ai rui ntaw samei hei Poubauhmei rui ata tisa niipui lat hamh e; mi kumcna arana ata sathuancna bammei hei ai hei kachangcna mpangmei kumcna sa tuang e. 18Mei mpeyna rui mbaanv tuang khang rui gaenghsw bammei kumcna, ai ni sw puni. 19Nangniw thu ningtyng lapui zaeng rui mpangmei nunc ta neihlana khaengvlou e. 20Nangniw ta bangh tiswlou ti ni, nangniw ta nym tu bam ti ni, nangniw ta sintu bam ti ni, nangniw ta mala bam ti ni, nangniw ta kaphi bam ti ni nzuhlou dyng the. 21Zakna zakna sa tuang e: niw thu hei tei kumcna sw ngam mak dyng e. Tiki thowkumhmei rui gaenghsw bammei lam khou tei thu, mpangmei kumcna sa tuang e: i ni gaenghsw ngam de. 22Kaniw Ibrimei cho? Ai ni e. Kaniw Isaraelmei cho? Ai ni e. Kaniw Abraham kik cho? Ai ni e. 23Kaniw Khrista siamruaimei cho? Ai mpangmei kumcna sa tuang e: kaniw khang suangc ai mbumei de; kaniw khang suangc ai taanc ranv de; kaniw khang suangc ai kangkai gut geic de; kaniw khang suangc ai baimei zam suc gei de, theihpui tadiucmei bamv kaniw suangc ariw geic de.#Lat 16.23 24Jihudimei rui bai luan tamvrucna chakiumei luan panguh ai ariw the;#Tat 25.3 25Rommei rui ata bai luan kathumh e; ata ntauh kwam luan guai the. Rungh kalaimei ariw luan thumh the, kumna duipui khou zingbangc akhat kalaanv akhat bamlou guai the.#Lat 16.22; 14.19 26Ai nggin geicna tat bammei chaenglwan khou, duidai khou, kwamtumei nunc baanc khou, Jihudimei nunc baanc khou khatni Zentelmei nunc baanc khou theic duak theic duaklou the; kaidai khou, ramvpuk khou, duipui khou, saraamhmei chana nunc baanc khou theic duak theic duaklou the.#Lat 9.23; 14.15 27Lakna taanc the; zip makmei ganv mpeyna ariw the; ndaapc tarimei ariw the; tu khang ni, bamloupui bamv ni, pheybaan ni maekpui ganv mpeyna ariw the. 28Mi guay ruc khou rui phwamling guay khang kadanmei rui atuang puatrith sw bam e. 29Thowkumhmei suan key pwkhou ai ni suan key e; thowkumhmei ta zay bowlou pwkhou, ai ni alung kabiu e.

30Ai gaengh sw ni tw e thei, aram suan lyanmei bamv khou tei ai gaengh sw puni. 31Tingsaeng kazanc thuanc bam nimeipu, Poubauhmei Jisu Pu Ravguangc rui ai saraamh mak ge twmei thay e. 32Ai Damaskas khou bam khou, Guangh Areta bangc khou guanghkhyn rui kaidai tuang raengckat guay tei tirigaanvna ata nym khang sw khwan e.#Lat 9.23-25 33Tiki ata giupaekc khou louna, kaidai raengc tuang kailat akhat khou rui mpat keyna ai kabaanc khou rui duak the.

Currently Selected:

2 KORINMEI 11: RONGBSI

Highlight

Copy