2 KORINMEI 10
10
Paul rui Kalam khou Samei
1Zaw lev zaw puanc adyang e thei mbuaih e; bam mpaan e thei bauc e twna nangniw rui samei Paul ai rui Khrista tuang lungh zaenghmei khatni niamhmei kazauhna nangniw khou zaenghuay e: 2Ai nangniw khou guang pwkhou ata lat tanhmei tisa mak khang sw o. Kalam thu aniw mbaanv chwn phungcna sw bam tuang de twna samei nunc khou tei lat tanhmei sa puni. 3Aniw mi mbaanv khou bam e; tiki aniw mbaanv chwn khou rui adow bam tu hamh e. 4Aniw tuang buy baeng hei mbaanv tuang hamh e; tanhmei raengc guay swra ngammei Ravguangc tuang pumtan e. 5Adangvna agi bammei guay ta tei ngamlou the. Ravguangc tuang ningting ta akhangvna sw khamv namvmei guay ta tei sw bak gut the, kumna lungning guay ta tei nym lana Khrista lat tipiulou the. 6Kumna nangniw lat piu nthuih pwkhou lat piu makmei nunc ta riap khang chamdaanv bam the.
7Nangniw thu kapaengc lwn tei zauc e. Thow pw ni kamei Khrista mei e twna laaloumei nai e thei, kamei Khrista mei swmei tei kumcna aniw ni Khrista mei e twmei kamei ning nina e. 8Nangniw ta swra key khang hamhna kasiamh thau khang, Poubauhmei rui aniw khou tiiloumei ngamv lam khou gaengh sw ranv maihna salou khwan sini, ai zak mak ge. 9Atuang tatdyn guay tei rui ai nangniw ta tiping khang sw bam tu kumcna laaloumei ta ai laa nii mak ge. 10“Pual hei katuang tatdyn guay thu nrit re khatni tanc e; tiki kamei aniu lev bam nchamcna sa e thei kalat mbuaih e, ramhkhat sini hamh e,” twna gaanvsaekc rui sa e. 11Aniw pumc bam makna tatdyn swna hymei lev aniw pumc kazauhna taanhmei lev tabui baihmei tuang naina cho twmei kaniw thay puni.
12Kaniw rana kaniw ta sa kauhna bammei nunc tei lev aniw ta sa kida bam bauh mak ge. Kaniw mi hei kumcna khat lev khat ta kidana nthyammei, daihmei ndat bammei hei mpangmei taanv e. 13Aniw khang thu gaengh swlou nuhmei kanganv akhat nai e; Ravguangc rui aniw taanh khang tiiloumei lungc khou na tei de, mi lungc khou hei aniw rui nangniw khou taanclou kanmei taanv guay tei ni kazauh the. 14Nangniw hei aniw khang tiiloumei lungc khou kazauhpui zaeng rui, aniw rui nangniw khou Khrista tuang gaychamv phungc guang reymei swna guangmei hei taanc twanpui tuang hamh e.
15Aniw khang Ravguangc rui tiiloumei paengc twan patna meic baihmei rui taancloumei taanv khou tei aniw gaengh sw bam tu hamh e. Tiki aniw rui lwmgaymei thu nangniw lwmmei khou daicthauna nangniw pang khou aniw tuang laupuk hei daic hay hay pat pungh e twmei hei e. 16Kum pwkhou, nangniw khou na hamhna kandih baih baih thangc ni gaychamv hei dinc tatna meickai laupuk khou taanclou tangmei taanv khang tei rui gaengh sw bam mak khang e.
17Nthanmei latrik khou hyloumei kumcna, “Thow pw ni gaengh sw nii e thei, Poubauhmei rui taancloumei taanv khang tei rui gaengh sw kan diu.”#Jer 9.24 18Kalam thu laalou nuhpui mei twmei kiu thu karana kata gay e twna sapui mei tei hamh e; Poubauhmei rui gay e twna saloupui mei tei de.
Currently Selected:
2 KORINMEI 10: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
