2 KORINMEI 1
1
Chaengriw Lat
1Ravguangc rui ningmei thei layna latdiutatmei swmei Paul, khatni aniu chana Timothi khou rui, Korinmei khou naimei Ravguangc tuang phwamling khatni Akhaia kapwm khou bammei nthanmei nunc khou:#|Lat 18.1
2Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiiloumei sw diu.
Paul rui Ravguangc ta Thuanhmei
3Aniu Poubauhmei Jisu Khrista Pu Ravguangc zauzian thaymei Pu, kalam kapwmna khou swmgayloumei Racguangc hym daic diu! 4Aniu ryanra bampui ganv khou tei kamei rui aniu ta swmgaylou e. Mi hei mi paan tei rui aniu rui ni ryanra ryanriu bammei guay ta swmgaylou ngam khang e. 5Khrista tuang ryanra khaengvmei dam tei aniu ni lay phungc mbupui thei layna Ravguangc rui swmgayloumei tei ni aniu Khrista paan rui laatow e. 6Aniw ryanramei ariwmei hei nangniw ta swmgaylou khang e khatni kanlou khang e. Aniw ta swmgayloumei hei, nangniw ta ni swmgaylou khang e kumna aniw rui khaengv kanmei tei nangniw ni khaengv ngam khang pumtan tiilou khang e. 7Kumna aniw rui nangniw ta lwmgaymei tei kalung makna bam e. Nangniw ni aniw ryanramei dam hei laa nchamcpui zaeng rui, aniw ta swmgayloumei kumcna nangniw ta swmlou puni twmei aniw thay e.
8Chanathiu, Asia kandih khou aniw ryanramei ariw kanmei tei nangniw khou tiningtowlou nii e. Aniw ruc khou keyloumei ryanramei tei aniw chuath hamhna nrit the, kumna aniw ringc pat dat pungh e twmei lwm taan khwan the.#1 Ko 15.32 9Aniw ruc khou theih khang latdanv patlou lana khuangh di the twna ning tangc khwan the. Kum e tiki, hei tei aniw rana aniw khou ngangvlou makna, theihmei ta tiringcthauloumei Racguangc khou na ngangvlou khang tii guang tuang bu the. 10Mi kumhmei theic rap nuhmei bamv#Baanhhy baibal asaekc khou theic kasic karoucmei twna sa e. khou tei rui kamei rui aniw ta kanlou the, khatni kanlou puni. Kamei rui aniw ta kanlou bam puni de twmei aniw lwm e. 11Nangniw rui aniw khang huayneyloumei tei rui aniw ta nkhavlou nina the. Kumna nangniw rui aniw khang huayneyloumei tei dawlou puni, kumna Ravguangc rui aniw ta suaihiamlou puni. Kum pwkhou meic mpeyna rui aniw khang rui Ravguangc ta thuancku puni.
Paul Katuang Taanvraeng Kalaihmei
12Aniw rui gaenghswna samei tuang e: niw mi mbaanv khou lungc bammei panty, nkunna aniw lev nangniw kak khou nai bammei riang hei, gaylwnswmei tuang hamh e. Mi hei meicpumc tuang ningting khou rui patmei tuang hamhna, kazauzian paan rui Ravguangc rui aniw khou tiiloumei nthanmei, kalip kalei nai dat makmei lungning khou rui patmei tuang e twmei hei aniw lungsyng rui thay e. 13Nangniw pac thay lak nimei, hamh e thei kabah thay ngam lak nimei tei aniw nangniw khang hy mak ge. 14Nangniw aniw ta katitna thu thay bam nuh the; tiki Poubauhmei Jisu tuang tingmik nungc kiu, nangniw aniw ta nthanna thay puni. Mi khou kiu aniw nangniw zaeng rui neihla nimei kumcna nangniw ni aniw zaeng rui neihla puni twmei aniw lwm e.
15Mi hei kumcna ai lwmpui zaeng rui, nangniw suaihiam laatow luan nei khang, ai nangniw khou guanglou rey ni the twna raengc thau khwan the. 16Mi kiu thu ai Makidonia tat nimei chaeng khou nangniw daeng khou guang khanvlou lana, hanc dat ni khou ni, ai Judia tat nimei chaenglwan khou nangniw rui ata nkhavlou khang guang khanvlou dat ni twna ai raengc thau tuang e.#Lat 19.21 17Mi raeng kiu alung chalingc ding tuang maekna sw tu kumc bu cho? Ai raeng akhat raengc thaupui ganv khou, mbaanv mei nunc kumcna akhang gaeng khang zaucna “kum ni” tw guai “kum lak ge” tw dat guai tw bam tu cho?
18Ravguangc hei thu kalat suai makmeipu e, hei tei kumcna ai rui nangniw khou sa kanmei tei ni “guang ni the” khatni “guang lak ge” twna sa kan mak ge. 19Sila rui, Timothi rui, khatni ai rui nangniw khou dinclou kanmei Jisu Khrista, Ravguangc Nac Mpouh hei thu pat pat gut gutmeipu hamh e.#Lat 18.5 20Kalam thu kamei hei Ravguangc tuang latryan guay khou tei thu kalaic datmeipu hamh the. Hei zaeng rui, Jisu Khrista paan rui, aniu rui “Amen” twna samei hei Ravguangc hym khang sa tuang e. 21Aniu ta Khrista khou tiding ntiploumei hei Ravguangc rui e; aniu ta reicpatloumei hei Ravguangc rui e. 22Aniu hei katuang di the twmei thay khang, khatni kamei rui aniu khang chamdaanvlou bammei guay tei suai makna tiilou puni the twmei ndauhmei swna Bumaengh Nthanmei ta sinkhampui syan kumcna aniu khou tiiloumei hei ni Ravguangc kamei rui e.
23Ravguangc rui thay e! Ai Korin khou guang dat makmei hei nangniw ta mphut luh bam dat ni makpui zaeng rui e. 24Aniw rui nangniw ta mi hei lwm o, hei tei lwm riu twna kaipouc swna sa me twna hamh e; nangniw lwmmei khou ntipna ding bam the twmei aniw thay e. Aniw rui taanc bammei thu nangniw neihla khang de.
Currently Selected:
2 KORINMEI 1: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
