1 THESALONIKAMEI 5
5
Poubauhmei Guang Nimei khang Chamdaanvmei
1Chanathiu, kakwm kaganv lam khou thu nangniw khou hy dat khang kage maek khe. 2Kalam thu Poubauhmei guang nimei hei kaihouhmei zingbangc guang kumc guang puni twmei nangniw thay the.#Met 24.43; Luk 12.39; 2 Pi 3.10 3Meic nunc rui “Meic guayna nchu nrina bam de, ramhkhat sini sw ni tu hamh e,” twna sa bammei ganv khou tei thay mak liangna swkamut kamaimei kaniw khou meicpui narui thau kumc guang puni. Kaniw duak dat ngam lak khe. 4Tiki chanathiu, mi tingmik kiu nangniw khang thu thay mak liangna kaihouhmei guang kumc patlou lak ge; nangniw thu zinghmei khou bam mak ge. 5Nangniw thu gaanhmei nac nunc de; kalaanv nac nunc de. Aniu thu zingbangc mei hamh e; zinghmei mei hamh e. 6Hei zaeng rui, meic baihmei nunc kumcna aniu zipri bam lak nina e. Aniu rakna, ntak nrakna bam nina e. 7Zipmei nunc tei zingbangc zip tuang de; zouh mbamei nunc tei ni zingbangc mba tuang de. 8Tiki aniu thu kalaanv tuang mei nunc de. Kumna aniu thu ntak nrakna bam nina de. Lwmmei khatni nzianmei rui ngaengvthuapc swna, khatni kanloumei ta rigwnmei tei rui rihpyrun swna piuna bam nina e.#Isa 59.17; Eph 6.13-17 9Ravguangc rui aniu ta kalungpuam keylou nimei nunc khang kapahlou mak ge; tiki aniu Poubauhmei Jisu Khrista paan rui ringhbamv laa khang kapahlou tuang de. 10Kamei guang khou, aniu theic bam pw ni, ringc bam pw ni, kamei lev lungc nchamc khang kamei aniu khang theiclou the. 11Hei zaeng rui, nangniw sw bammei tei kumcna khat khat ta katiu thau kary o khatni kasiamh thau kary o.
Kady Kanavmei
12Chanathiu, nangniw pang khou taanv taancloumei, Poubauhmei khou nangniw ta chaengzayloumei khatni nchamloumei nunc ta tei chakhwang champouh sw khang aniw rui nangniw khou zaenghuay e. 13Kaniw tuang taanv zaeng khang tei rui kaniw ta nzianna nkunna chakhwang champouh swlou o. Nangniw latzan gayna lungc bam o.
14Chanathiu, aniw rui nangniw khou zaenghuay e: liauhmei nunc ta mphutlou o; kalung nnaumei nunc ta katiuthaulou o; suanmei nunc ta nkhavlou o, meic kathuicna khou khaengvlou o. 15Simei khang simei khangh riu; nangniw khat khat khou khatni meic guayna khou gaymei taanclou khang karamc tanh tan bam o.
16Neihla tanh tan bam o. 17Taek makna huayney bam o. 18Si khou ni, gay khou ni thuancku bam o. Nangniw Khrista Jisu khou bammei panty khou hei tei nangniw khang Ravguangc rui kahawmei e
19Bumaengh Nthanmei ta swmit riu. 20Ravmundinhmei ta ramh sak mak tuang sw riu. 21Tiki kaguayna tei simei gaymei zauc o. Gaymei tei laalou o; 22kumna simei guay tei ganc o.
23Nangniw pumc, bumaengh, du kapwm hei Khrista guang pwkhou nthuihmei, khanvbamv maekmei sw khang chuzaenghmei tiiloumei Racguangc rui nangniw ta sw nthanlou pw diu. 24Nangniw ta kawloumeipu hei thu suai makmeipu e; kamei rui mi hei taanclou puni.
25Chanathiu, aniw khang ni huayneylou o.
26Chana punav nzianmei tuang lyanna khat khat khang dwan gay kady kary o. 27Poubauhmei zanc khou ai rui nangniw khou sa tuang e: mi tatdyn hei chana punav guay khou pac o.
28Aniu Poubauhmei Jisu Khrista tuang zauzian rui nangniw ta bam nduanghlou diu.
Currently Selected:
1 THESALONIKAMEI 5: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
