1 KORINMEI 8

Ravkhaengmei Zanc Tumei lam khou

1Ravmaengc khang khaengloumei zanc tumei lam khou tei thu: Kaniw rui samei kumcna, “Aniu meic guayna khou thaymei nai e,” twmei aniu thay e. Mi kumhmei ramthai tei rui lianti e, tiki nzianmei rui thu tidaic thau e. 2Thowkumhmei kamei thay the twna ningpui mei tei kamei thay nimei tei thay lamc makna e. 3Ravguangc ta nzianpui mei ta tei Ravguangc thay e.

4Kumna ravmaengc khang katloumei zanc tumei lam khou thu: ravmaengc hei thu nai changhmei rav hamh e; Ravguangc thu akhat na de; baihmei maek ge twmei aniu thay e. 5Rav the twmei tingkauh khou ni, kandih khou ni nai bam geic nuh e. “Rav” khatni “kaipouc” mpeyna nai bam changh e; 6tiki aniu khang thu Pu Ravguangc akhat na de; mi kiu ramh katana damcloumeipu, kumna aniu kakhang ringc bammeipu hei e. Kaipouc ni akhat na de; mi kiu kapaan rui ramh guayna damcloumeipu khatni kapaan rui aniu ringc bammeipu Jisu Khrista hei e.

7Tiki mi hei meic kathuicna thay mak ge. Meic gaanvsaekc thu ravmaengc khou gut minc langvlou lana, ntaw nganvna kaniw mi kumhmei zanc tei tu pwkhou, hei tei ravmaengc tuang zanc the twna ning e. Mi kumna kaniw ramthai suanpui zaeng rui, mi zanc tei rui kaniw ta ti-mphuam the twna ning e. 8Taektw rui thu aniu ta Ravguangc daeng khou tituanc tiduh khang hamh e; hei tei tu ti makna aniu khang maan thuai mak ge, tu tina ni gaeng thuai tuang maek ge.

9Nangniw mi kumcna nyngsw nuhmei hei rui suanmei nunc ta tiphaysuy mak khang thu ramhthay o. 10“Thaymei” nang rui mi kumna ravmaengc tuang ravkai khou tu bammei ta thaymei khou suanmei gaanv khat rui howlou e thei, hei tei rui kata ravmaengc khou katloumei zanc tu khang tibauclou pw lak nah cho? 11Mi kumna, Khrista kakhang rui theicloumei, suanmei nang chana ta tei nang ramthai tei rui swmaan puni. 12Mi kumna kaniw tuang suanmei lungning ta tei tikabiulouna, nangniw chana nunc ruc khou paapc taancloumei hei rui Khrista ruc khou paapc taanclou the. 13Mi kumna taektw rui achana khat ta tiphaysuylou e thei, achana khat ta ti phaysuy mak khang ai zanh tu dat lak khe.

Currently Selected:

1 KORINMEI 8: RONGBSI

Highlight

Copy