1 KORINMEI 7

Nowkaw Mihmei lam khou

1Kumna nangniw rui hy guangmei lat lam khou tei ai rui sa nimei thu: Ntumei ta kahi makmei rui gay e.#Hamh e thei ntumei ta kahi makmei rui gay e twna nangniw rui sa e. 2Tiki lungcmaanv lungcmowmei naipui zaeng rui, nggaanvmei ni, ntumei ni kanow kagaanv naina lungc o. 3Kumna gaanv rui kanow khou swlou nimei thouc tei swlou nina e, now rui ni hei tei kumc muayna gaanv khou swlou nina e. 4Now tei kapumc tei karana kanyng sw khang hamh the, kagaanv tuang di the; gaanv tei ni kapumc tei karana kanyng sw khang hamh the, kanow tuang di the. 5Huayneymei ganv laa khang gaanv nei chwn chamcna nuhloumei hamhna, nangney khat khat khang nuh makmei tuang sw lak nina e. Kumna mi ganv tei luai kan e thei nowpuc lwnlung lungc dat nina e. Kum mak ge thei nangniw pumc sinriap ngam makna Seitaan rui nthiammei khou keylou puni.

6Ai samei hei latdanv hamh e, mi kumna swmei gay e twpui tuang de. 7Nangniw meic guayna akumc ngam e thei gay ni tuang e; tiki Ravguangc rui meic guayna khang katuang kaipat nchamcna tiilou mak khe; gaanv khat gaanv khat khang baic baicna nkunna tiilou the.

8Nowkaw makmei nunc khatni maypui nunc khou ai rui samei thu: i kumcna now kaw, mih makna bammei rui kaniw khang gay e. 9Tiki kaniw pumc sinriap ngam mak ge thei, kaniw now kaw mihmei rui gay e. Kahawmei rui chuangcna bammei suangc now kaw mihmei rui gay e.

10Nowkaw mihmei nunc khou ai rui sa e. Mi hei alat hamh e; Poubauhmei rui sa tuang e: Now tei kagaanv lev ntamv dat nuh mak khe.#Met 5.32; 19.9; Mrk 10.11-12; Luk 16.18 11Kamei ntamv dat re thei, mic dat makna bam nina e. Kum makna mic dat ni thei, kagaanv now sw dat nina e. Gaanv rui ni kanow ta taan nuh mak ge.

12Baihmei guay khou ai rui sa e (ai rui de, Poubauhmei rui hamh e): Thowkumhmei Khristian gaanv khat now tei Khristian hamh bam sini, kanow tei rui kamei lev lungc nchamc bam ni de tw e thei, kamei kanow ta tei mu ganh mak kan diu. 13Thowkumhmei Khristian gaanv khat gaanv tei Khristian hamh bam sini, kagaanv tei rui kamei lev lungc nchamc bam ni de tw e thei, kamei kagaanv ta tei mu ganh mak kan diu. 14Kalam thu Khristian hamhmei gaanv ta tei kanow paan rui sw nthanlou the, khatni Khristian hamhmei now ta tei kagaanv paan rui sw nthanlou the. Kum mak khwan e thei, kaney nac tei nthan makmei sw ni tuang e; tiki kaney nac tei ni nthanmei de. 15Tiki Khristian hamhmei tei rui ntamv nii e thei, kaney ntamv kan diu. Mi kumhmei latbamv khou thu ntamv nuh mak ge twna sa mak ge. Ravguangc rui aniu ta kawloumei thu chuzaenghna lungh khang de. 16Now, nang rui nang gaanv ta kanlou ngam puni#Hamh e thei kanlou ngam ni tu hamh e. twmei nang akumhna thayna cho? Hei tei kumcna gaanv rui ni kanow ta kamei rui kanlou ngam puni twmei akumhna thayna cho?

Nang ta Kawpatloumei Lwnlung khou tei Bam o

17Meic kathuicna Ravguangc rui kakhou kakhou tiiloumei lwnlung, twmei thu kata kawpui ganv khou kamei bammei lwnlung khou tei bam kan diu. Mi hei ai rui phwamling guay khou dinclou kan tu the. 18Thowkumhmei kata kawpui ganv khou kamei gihruamc bam khwan e thei, hei tei swmaan dat nangh khe; thowkumhmei kata kawpui ganv khou gihruamh mak bam khwan e thei, ruamc dat nangh khe. 19Gihruamhmei khatni ruamh makmei rui ramhkhat sini hamh e; nthukmei thu Ravguangc lat piumei hei de. 20Meic kathuic Ravguangc rui kata kawpui ganv khou kamei bammei lwnlung khou tei bam kan diu. 21Ravguangc rui nang ta kawpui ganv khou tei nang bangh sw bam tu cho? Kum bam kan diu; tiki nang nyng sw dat nuhmei tuang kadouchamei nai e thei, nyngswna lungc dat ro.#Hamh e thei nang nyngsw khang kadouchamei nai sini, bangh swna lungc chuy khang sw o. 22Kalam thu Ravguangc rui kawloupui mei tei thu meic bangc sw bam sini, Poubauhmei tuang nyngswpui mei di the. Hei tei kumcna Khrista rui kawloumei nyngswpui mei tei ni Khrista tuang bangc muay de. 23Ravguangc rui nangniw ta kamanv tiina thuaklou tuang di the. Mi zaeng rui, maansei tuang bangc sw dat ri tho. 24Achanathiu, meic kathuic Ravguangc rui kata kawloupui ganv khou kamei bammei lwnlung khou tei, Ravguangc khou bam nina e.

Nowkaw Mih Makmei khatni Maypui nunc khang

25Ntaw mih makmei nunc lam khou, Poubauhmei rui mi lam khou latdanv tiilou tuang maek ge; tiki Poubauhmei tuang zauzian paan rui lwmlou nuhmei akhat swna ai rui ningmei sa tuang e.

26Ntaw ganv khou kunghmei naipui zaeng rui, kamei kamei rui bam bammei lwnlung khou tei bammei gay e twna ning e. 27Nang now kaw e thei taan dat ri tho. Nang now kaw makna bam e thei, kaw khang sw nangh khe. 28Tunac nggaanv now kaw mihmei hei paapc hamh e; tiki now kaw mihmei thu mbaanv puatrith mbu the. Hei tei phungc tow mak khang sa tuang e.

29Achanathiu, ai rui sa nimei thu mi hei e: Kaganv hei ana guang the, kum thena, kanow naimei nunc ni now maekmei nunc kumcna lungc kan di tho; 30kap bammei nunc ni kap makmei nunc kumcna lungc bam kan di tho; nuic bammei nunc ni nuih makmei nunc kumcna lungc bam kan di tho; liu bammei nunc ni ramh maekmei nunc kumcna lungc bam kan di tho; 31lanvguanh lanvdaengh bammei nunc ni mi khou tei kaganv guayna tiilou dat ri tho. Kalam thu mbaanv hei ntaw nai bammei lwn kumcna nai bam nimei asaanh mak khe.

32Nangniw lungh geic kadan makna bammei ta ai kahaw e. Nowkaw makpui mei tei thu kamei Poubauhmei ta tipianlou khang rui twna Poubauhmei taanv khang kadanna bam e; 33Tiki now kawpui mei tei thu kanow ta tipianlou khang rui mbaanv tuang taanv khang rui kadanna lungc e. 34Kumna kachwn kanei pat the. Kumna mih makmei ntumei tei ni, kapumc kabumaengc Ravguangc khang reicpatlouna, Poubauhmei taanv khang kadanna lungc e. Tiki mihmeipui tei thu, kagaanv ta tipian khang rui mbaanv tuang taanv khang kadanna lungc e.

35Ai mi hei sa bammei hei, nangniw khang rui de. Ai nangniw ta karakclou khang hamh e. Nangniw daeklou tuang maekna, Poubauhmei taanv khou tii gutlou pary rina taanc nuh khang, nangniw mi kumcna swmei gay e twna sa tuang e.

36Thowkumhmei kakhaamv khang luailouna bammei ta, kahawmei chwn rui tancna, how gay makpui tuang nai thena, nowpuc sw kan ni the twna ning e thei, kaney tei nowpuc sw kan diu.#Hamh e thei kanac aluhpui lev nggaanvmei gaanv khat khou, kamei (kapu) rui kakhou (kanac aluhpui khou) swlou nimei tei swlou mak ge twna ning e thei, kamei (kapu) rui ningmei tei taanc kan diu kumna kata ti mic kan diu. Hei tei paapc hamh e. 37Tiki thowkumhmei, kum mak nuh mak ge twpui zaeng rui hamhna, karana kata sinriap ngam de twna, kalungchwn rui nuhna, kaney nowpuc swna lungc lak khe, khaamv swna bam kan ni the tw e thei, hei tei ni gay de. 38Mi kumna kakhaamv ta kawmei ni gay the; tiki now kaw makmei rui gay ranv the.

39Mihmei ntumei tei kagaanv ringc bam saanv meickai now di the; tiki kagaanv theic kan e thei, kamei miclou dat nii niimei kai khou miclou dat nuh the. Tiki Khristian khou na miclou nina e. 40Tiki kamei mic dat makna bammei rui kakhang gay ranv puni twna ai ning e. Akhou Ravguangc Bumaengc bam e twmei ai lwm e.

Currently Selected:

1 KORINMEI 7: RONGBSI

Highlight

Copy