1 KORINMEI 4

Khrista tuang Latdiutatmei

1Kumna nangniw rui aniw ta Ravguangc tuang ntheihloumei tei dinc ndauh khang nsinloumei Ravguangc tuang taanvsinmei nunc e twna laa nina e. 2Mi kumhmei taanvsinpui mei kiu thu kakaipouc khang lwmnuhpui mei sw nina e. 3Nangniw rui pw ni, kandih tuang latzan rui pw ni, ata latzan sw nimei ta akhang ramhkhat sini hamh e. Arana ni ata mi kumna latzan sw mak ge. 4Ai thaymei thei layna thu, ai nkhuai mak ge; tiki hei tei rui akhuay maek ge tw khang hamh e. Ata latzan sw nimei thu Poubauhmei de. 5Hei zaeng rui, kaganv tangh mak khou nangniw meickai ta latzan sw riu; nkhamhmei latzan thu Poubauhmei guang pwkhou rui sw puni. Mi nungc kiu zinghmei khou nkamhlou bammei guay gaanhmei khou lav pat puni, khatni meic nunc tuang lungning khou nkamhlou bammei guay ndauh pat puni. Ravguangc rui pianlou biuhmei tuang nai e thei, mi nungc kiu rui thay puni.

6Achanathiu, “Hylou bammei khou tei rui twan riu,” twna samei kabac hei nangniw thay khang, nangniw khang rui Apollo lev Paul ata zay daancna samei tuang e. Mi kiu thu, nangniw gaanv khat ta ning nthuk, gaanv khat ta loukey twna nangniw gaengh sw bam mak khang e. 7Thow rui nang ta meic baihmei khang suangc kauhmei e twna sa pwna cho? Nang khou nai bammei guay tei Ravguangc rui tiilou tu hamh nah cho? Kum e thei, nang khou nai bammei tei Ravguangc tuang kaipat hamh kumcna tabui swna nang gaengh sw bam tu cho?

8Nangniw bung padik the! Nangniw lungcgay the! Aniw ta ganclouna nangniw rana guangh sw the! Nangniw guangh sw changh e thei gay ni tuang e, aniw ni nangniw thei guang lay sw khang! 9Ravguangc rui latdiutatmei nunc aniw khou tiiloumei hei, charuangc laa khou zay patna kandih mei khatni kauh baanchara nunc hu khou swluai khang, thei liang khou lou bammei nunc kumc the. 10Khrista khang rui aniw hei mpangmei nunc the; tiki nangniw thu Khrista khou ningtyngmei nunc e! Aniw thu suan e; tiki nangniw thu tanc e! Aniw ta thu malalou the; tiki nangniw ta thu chakhwang swlou the! 11Ntaw kahak hei aniw ndaapc tarina lungc bam e; aniw khang pheybaan maek ge; meic nunc rui bai e; aniw kai maek ge; 12aniw baanc rui ryanrana taancna lungc e. Aniw ta sianglou pw khou, aniw suaihiamlou e; aniw ta rai pwkhou khaengv e;#Lat 18.3 13aniw ruc khou latsic salou pwkhou, aniw rui latgay dawlou e. Ntaw aniw hei meic nunc rui ganc patloumei puat kumc the.

14Ai rui nangniw ta mi kumna sa bammei hei rui nangniw ta sw zaklou me twna hamh e; tiki ai nzianmei anac kahak ta kumcna luh bam tuang e. 15Khrista khou nangniw ta ncham ncheilou nimei meic ching ching nai bam nuh e; tiki nangniw pu thu akhat na de. Kalam thu nangniw khou gaychamv phungc guangmei ai hei Khrista khou nangniw pu the. 16Hei zaeng rui, nangniw athei lay nzeic o.#1 Ko 11.1; Phil 3.17 17Mi khang rui ai rui nzianmei khatni lwm nuhmei, Khrista khou anac mpouh swmei Timothi ta ai nangniw khou ndiu guang tuang e. Ai Khrista khou lungc bammei panty lwnlung, twmei thu ai rui phwamling kathuic khou nchamlou tat bammei latdyn guay tei kamei rui nangniw khou tiningtowlou dat puni.

18Ai nangniw daeng khou guang ni tu hamh e twna ningna nangniw gaanvsaekc thu ramh sak makna bam e. 19Tiki Poubauhmei rui chwnmei e thei, ai asaanh mak khou nangniw daeng khou guang puni. Kumna mi kumna ramh sak makna sa bammei nunc ta kiuc, kaniw khou tabui pumtan naina sa bam tu cho twmei ai thay puni. 20Kalam thu Ravguangc guangcdic hei thu lat tuang hamh e, pumtan tuang de. 21Nangniw tabui tei kahaw bu cho? Ai builwang sinna guang o ni, nzianna khatni lungh zaenghna guang o cho?

Currently Selected:

1 KORINMEI 4: RONGBSI

Highlight

Copy