1 KORINMEI 3

Ravguangc tuang Siamruaimei nunc

1Hei zaeng rui, achanathiu, ai rui nangniw khou Bumaengh mei nunc khou samei kumcna sa ngam mak khe; mbaanv tuang mei, Khrista khou ngasatna sw bammei nunc khou samei kumcna sa tuang e. 2Ai nangniw khang noucdui na tii the, naptanh ti mak khe. Kalam thu nangniw laalou ngam mak khe. Ntaw nganvna nangniw naptanh tu ngam mak he.#Ibr 5.12-13 3Kalam thu nangniw mbaanv tuang mei sw bam di he. Nangniw khat khat ta mamavmei khatni agay agimei nai bammei hei, nangniw mbaanv tuang mei swna mbaanv mei kumcna lungc bam tina hamh nah cho? 4Nangniw pang khou gaanv khat rui, “Ai thu Paul mei de,” baihmei gaanv khat rui, “Ai thu Apollo mei de,” twna sa bammei hei mbaanv mei swmei lat hamh nah cho?#1 Ko 1.12 5Mi kumc bam khang, Apollo kiu thowna cho? Paul kiu thowna cho? Aney thu nangniw ta Khrista khou lwm khang nkhavloumei Ravguangc tuang siamruaimei de. Aney thu kakhou kakhou Poubauhmei rui tiiloumei taanv tei taanc bam tuang na de. 6Ai rui lingclou the, Apollo rui kabang tei dui zwanlou the, tiki tidaic thauloumei thu Ravguangc rui de.#Lat 18.4-11,24-28 7Lingcloumeipu khatni dui zwanloumeipu tei thu ramhkhat na sini hamh e; tiki nthukmei thu tidaic thauloumeipu Ravguangc tei de. 8Lingcloumeipu tei lev dui zwanloumeipu tei nchamc de; kataanv kataanv thei layna, kaney khang Ravguangc rui zaengphy tii puni. 9Aney hei Ravguangc tuang laupuk khou taanv taanc nchamcmei nei e, nangniw hei Ravguangc tuang laupuk ge.

Nangniw hei Ravguangc tuang kai ni the. 10Ravguangc rui akhou tiiloumei kaipat sinswna, taanv thaymei taanvpy akhat kumcna, ai rui kaibam kasiamh thaulou the, kumna meic baihmei gaanv khat rui mi ruc khou tei taanc nsuk thau the. Mi kai tei taanc thau nimei kathuic tei kadanna taanc nina e. 11Kalam thu duanclou kanmei kaibam, Jisu Khrista tei hamhna, baihmei kaibam duanc dat nuh mak khe. 12Mi kaibam khou tei thowkumhmei rui kachaekc rui, daandi rui, kamanv kunghmei tauc rui; baihmei gaanvsaekc rui thing rui, ngeic rui, napgou rui swlou bam nuh e. 13Tiki mi taanv tei Khrista tuang Tingmik nungc ndauh pwkhou kiu, kataanv kataanv tei thay puni. Kalam thu tabui rui swlou tu cho twmei mai rui nchanv puni. 14Mi kaibam ruc khou swloumei tei mai rui nchanv pwkhou, nai bam e thei, kai swmeipu tei kataanvphy laa puni, 15tiki thowkumhmei tuang taanv tei kau ngam kan e thei, kakhang maan the; tiki kameipouc ta thu mai khou rui duak pat kumcna kanlou puni.

16Nangniw hei Ravguangc tuang ravkai e; nangniw khou Ravguangc Bumaengc bam e twmei nangniw thay mak nah cho?#1 Ko 6.19; 2 Ko 6.16 17Ravguangc tuang ravkai ta sw kasicpui mei ta tei thu, Ravguangc rui kata ni swmaan puni. Ravguangc tuang ravkai thu nthanmei e, kumna mi ravkai kiu nangniw hei the.

18Nangniw rana nangniw ta guat riu. Thowkumhmei rui mi kandih mikzaw khou kamei hei ningtyngmei e twna ning e thei, kamei ningtyng changhmei sw khang, kamei mpangmei sw kan diu. 19Kalam thu mi mbaanv rui ningting e twna chakmei tei Ravguangc mikzaw khou thu mpangmei de. “Ravguangc rui ningtyngmei ta kaniw tuang takh khou timanc e,” twna hylouna nai e.#Job 5.13 20“Ningtyngmei nunc tuang latkhanv guay tei nsa tuang de twmei Poubauhmei thay e,” twna ni hylouna nai e.#Kal 94.11 21Hei zaeng rui, nangniw meic nunc lam khou gaengh sw bam dat ri tho. Ramh guayna nangniw khang de: 22Paul ni, Apollo ni, Pitar ni, mi mbaanv ni, ringhmei ni, theihmei ni, ntaw ni, guang nimei ni—mi guay hei nangniw khang de, 23kumna nangniw hei Khrista tuang e, Khrista hei Ravguangc tuang e.

Currently Selected:

1 KORINMEI 3: RONGBSI

Highlight

Copy