SHICÜSI 9
9
Shhukeya Kho kesa Keniwa
1 #
Bvü 12.1-13. Israel nyithu na Ejipt keteshi amapi keniwa asha atuwa wi Apvüwa na Sinai yyikeshü wi Mosa ccüneng. Ma khi, 2-3“Asha hawa tagha mejü ghanan wi aghani du gweghe Israel nyithu na Shhukeya Kho yenthu nu tsü kesa yen tsüdi nie nu saben.” 4Tsalina Mosa na anyithu na Shhukeya Kho tsü salo kiza, 5nu asha atuwa wi tagha mejü ghaja mathu na Sinai yyikeshü wi akho tsü sa wa. Apvüwa na Mosa kekiza ti anyithu na tsüdila kuli.
6Isala ciwi anyi pahan na keshü kamang kidhen kesalina keccüna wi nmetha laben, nu mathu na tsü ghanan wi Shhukeya Kho tsü sa meya la. Mathu na Mosa nu Aaron wi wa 7nu khi, “Ikhang na keshü kamang kidhen kesalina nmetha laben, isala mangsale Israel nyithu kekinyi sapi Apvüwa kecü wi ikhang pi nsaghula nu?”
8Mosa na luneng, “Hi Apvüwa wi kecükegwe npi mukeya chu hieben lalo.”
9Apvüwa na Mosa kiza 10nu Israel nyithu wi kiza thsü; “Nthu nu nthu shicüthu kesüle kesü lela keshü kamang pa nu nmetha laben, nyelela alen kesie wi kijünyi wa, isala Shhukeya Kho tsü samvu lethu, 11nthu na asha kesü seng wi asha keniwa taghamejü ghaja na tsü sa waya mehai. Azimi nkechi mesa nu aghang kekha sen nu tsü salo. 12#Bvü 12.46; Jhn 19.36.Nüncü wwencü sapi ghanenwa wi nthengla, nu asagü kesüla npakhhila. Shukeya kho kesa yenthu tsüdi nie nu salo. 13Isala anyi kesüle kesü lela keccüna wi metha ben nu kijünyi nwa lela Shhukeya Kho tsü nsa lethu, ma pi inyi kesüle sa nben, kepaghenanye matsü ssan ketheng tsüwi ma kekinyi sapi hi ncü. Ma ma kesami ghena ketizen saben. 14Keujüla asang kesü nthu ja wi hang kebenwa na Shhukeya Kho samvu lethu ma yenthu nu tsü kesa yenthu tsüdi nie nu nsathu yishü. Ayen tsüna ahvu le asang sa lela makesü saben.”
Anni Kulukeshü
(Bvü 40.34-38)
15-16Apvüwa ketenpen Nithsüjjen tsü sakeya tsathang wi akulukeshü na dugho tsü mejuya. Aghaja wi akulukeshü tsüna anni ti mu. 17Khathansha wi akulukeshü na bvü khe Israel nyithu na kemnanpen tsü pheghe, nu kheneng akulukeshü tsüna apen khiewi dugho khe mathu na wa ciwi kemnanpen sa. 18Anyithu na Apvüwa yenkhukechi tsü nie nu kemnanpen pheghe nu tsü sa neng. Akulukeshü na Nithsüjjen miwi keben chu mathu na kemnanpen tsüwa wi ben. 19Akulukeshü na matsü kesie Nithsüjjen miwi benwa lela, mathu na Apvüwa jühkina nu apen nketsen. 20Kutitsü akulukeshü na ghanan keu ketan Nithsüjjen miwi ben; katsüha sa lela mathu na Apvüwa jühkina nu kemnanpen wi ben, nyelela apen ketsen isa. 21Kutitsü akulukeshü na ghaja na wa ghanenwa kecu ketan ben, nu akulukeshü tsüna bvü gweghe mathu la apen ketsen. 22Tsüna ghanan keni, asha kesü, amapi kesü, nyelela tsümiwi sieki lela akulukeshü na Nithsüjjen miwi keben chu mathu na apen nketsen; isala tsüna bvü lethu mathu la apen ketsen wa. 23Apvüwa na ayenkhuchi pi Mosa kecü kenie wina mathu kemnanpen tsü pheghe nu sa neng isa.
Currently Selected:
SHICÜSI 9: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
