SHICÜSI 8
8
Ahulathu pi Kechi
1Apvüwa na Mosa kiza, #Bvü 25.31-40; 37.17-24. 2“Aaron wi ma khathansha ahula tagü tsüpi ma kedonpen wi chi khe ma tsüthu pi chi nu kewegü ya atu wiwa wegüya thsülo kizalo.” 3Aaron na tsü kinaya nu ahulathu pi ma kedonpen tuwa wi peghela chia. 4Apvüwa na pi Mosa keccüca tsü kenie wina ahula kedonpen tsüna ma li na cü ma ccü kecu suna cü pi sa theng.
Levi Nyithu Satekemetha
5Apvüwa na Mosa kiza, 6“Israel nyithu ja wi Levi nyithu tsü khuthi pi makepa sa nu mathu satemetha chi, 7hati salo: satekemetha tssü pi mathu keghü nu mathu gwo maben wi assen whi thsülo, nu mathu thsümeni ghasü thsülo. Isalethu mathu na keccüna wi metha shaben. 8Tsaseng wi mathu na amesü zza asüpon kesü khuya, nu awheng nu adeli saghu pi asu pi kekinyi saben; nu no kesami ghena kekinyi amesü süpon kepa la khuya. 9Tsaseng wi Israel nyi tenti maben cighu chi nu Levi nyithu pi hi ketenpen Nithsüjjen tuwi ngan thsülo. 10Israel nyithu na mathu kwen chang pi Levi nyithu miwi chi, 11nu Aaron na Israel nyithu ja wi Levi nyithu tsü satemetha pi aju kemehai sapi hi cü, isanu mathu ya hi kekuli sa thsüben. 12Levi nyithu na mathu kwen chang pi amesü süpon keni li miwi chiben; keccüna wi Levi nyithu satemetha le kesalina tsü kesü pi kesami ghena kekinyi nu kepawa pi mecang pi kekinyi saben.
13“Levi nyithu satemetha pi aju kemehai sapi hi cü, nu Aaron nu ma tsathu pi mathu ccüli sa thsülo. 14Israel nyithu ja wi hatinu Levi nyithu khuthi pi makepa sa, isanu mathu na iji saben.”
15No Levi nyithu sametha nu satemetha pi ccüla mathu na Nithsüjjen wi kekuli kesa qo nyi saben. 16Hi Israel nyi tsa tssütsethu tsüdi mithon wi mathu pi ijile nkayadha, nu mathu na iji sadha. 17#Bvü 13.2. Khathansha hi Ejipt wi tsa tssütsethu tsüdi pathi khe hi Israel nyi tsa tssütsethu nu asahang zza tssütsethu tsüdi satemetha pi iji sadha. 18Hi khili Israel nyi tsa tssütsethu tsüdi mithon wi Levi nyithu khuyadha, 19nu hi Israel nyithu ja wi Levi nyithu pi aju ti sala pi Aaron nu ma tsathu cü, Israel nyithu ghena Nithsüjjen wi kekuli sa nu mathu na Kemetha Pen kete wi gho lethu agükeccü na mathu miwi kegho wi Israel nyithu khweya thsüle kesalina.
20Tsalina Apvüwa na Mosa kekiza ti Mosa, Aaron, nu Israel nyithu na Levi nyithu satemetha chia. 21Levi nyithu na mathu ketanla mathu sametha nu mathu thsümeni ghasü, nu Aaron na mathu satemetha pi aju kemehai sapi Apvüwa cüa. Ma mathu ghena la sakemetha keccüna sachi. 22Apvüwa na Levi nyithu ghena Mosa kekiza tsü anyithu na tsüdila sa. Tsalina Levi nyithu na Aaron nu ma tsathu kekhu wi Nithsüjjen wi kekuli kesa qo nyi saya.
23Apvüwa na Mosa kiza, 24“Levi nyi kesüsü kahang mapi nkwe nu manga sacüla hi ketenpen Nithsüjjen wi ma kekulithu sa waben, 25nu kahang mapi deni wi ma nganwa shaben. 26Tsaseng wi ma ma Levi nyi na Nithsüjjen wi mathu kekuli kesa wi kiqaya mehai, isala ma ketanla kekuli mangla sa nben. No hatinu Levi nyithu kekuli yen sapi cüben.”
Currently Selected:
SHICÜSI 8: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
