SHICÜSI 4
4
Levi Nyi Kohath Gei Kekulithu
1Apvüwa na Mosa kiza 2nu Levi nyi Kohath gei wina gikezighe nu atheghithu kenie wina nyanzhüghu thsü, 3nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhü ya thsüa. 4Mathu kekuli tsüna kemetha tsanqaithu kenoncca.
5Apvüwa na kecükegwe hathu pi Mosa cü. Kemnanpen pheghe keten tsüwi Aaron nu ma tsathu na Nithsüjjen wi du nu Cenkethenjüh Khitson tuwi keshonthsü tsü khusha pi Akhitson tsü meju yaben. 6Mathu na asahyu kemeju kemehai pi ma miwi chiya, athsü atsena kesü pi ma miwi shizighe, nu ma kepie chan pi shon chiya.
7Mathu na amesa pi Apvüwa kekinyi ghena athsü atsena pi miz miwi shiya nu akhu, hankedemvu kechi khu, kekinyi khu, nu kisengtssü pi kekinyi ghena afüthu pi ma miwi chiya. Amesa na keshüthangla miz miwi benben. 8Mathu na athsü kenmie kesü pi tsüthu miwi chi, asahyu kemeju kemehai kesü pi ma miwi chiya, nu ma kepie chan pi shon chiya. 9Mathu na athsü atsena kesü pi ahula kedonpen, ahula, ma khukhi, ma khala khu, nu oliv deli kechi khu tsüdi meju yaben. 10Mathu na asahyu kemeju kemehai pi tsü nu ma tsanqaithu meju pi kepie ji miwi chiaben.
11Tsaseng wi mathu na athsü atsena pi suna pi sa ketheng kekinyipen miwi tsü shizighe, asahyu kemeju kemehai pi tsü mejuya, nu ma kepie chan pi ghechi yaben. 12Tsaseng wi mathu na Kemetha Pen wi kesenji ahyikhu tsüdi khuya nu athsü atsena pi tsüthu mejuya, asahyu kemeju kemehai kesü pi tsü miwi chiya, nu tsüthu pi kepie ji miwi chiyaben.
13Mathu na kekinyipen miwi kemecang khala khupi nu athsü nmiepheü kesü pi tsü miwi shizighe yaben. 14Mathu na kekinyipen kekuli wi kesen tsanqai tsüdi pi chiyaben: anni khu, akhu magi keben, ametsi ketsuwa, nu akwen kemetsikhu. Tsaseng wi mathu asahyu kemeju kemehai pi tsü miwi chiya nu kepie chan pi ghechi yaben. 15Kemnanpen pheghe keten tsüwi Aaron nu ma tsathu na kemetha tsanqaithu tsüdi mejuya ccüla Kohath gei wi anyithu na ghola tsü pie yaben. Kohath gei wi anyithu na kemetha tsanqaithu tsü pa yishü, isalethu mathu na shüaben.
Khathansha wi Nithsüjjenwa tsü papheghe khe hathu ha Kohath nyithu dulu.
16Keqhaikediwa Aaron tsa Eleazar dulu na Nithsüjjen maben nu ahula deli, hankedemvu, asu pi kekinyi, kenyenji deli, nu Nithsüjjen wi satemetha pi Apvüwa wi chi kesathu tsüdi ghena.
17Apvüwa na Mosa nu Aaron manyi kiza, 18“Kohath gei nyithu yala ciwi ngho thsüla, 19kemetha tsanqaithu kete wi gho nu mathu pathi thsü nsala. Hati kesa khenle kesalina Aaron nu ma tsathu na wala kekuli pi mathu tsüdi cü nu kesüsü mangwa nsathu yishü khe kizalo. 20Isala Kohath nyithu na Nithsüjjen wi du nu keqhaikedithu na kemetha tsanqaithu tsü ketssen le kiden keben mu#4.20: kemetha... mu; nyelela keujü kemetha tsanqaithu tsü mu lela. lethu mathu na shüaben.”
Levi Nyi Wi Gershon Gei Kekulithu
21Apvüwa na Mosa kiza 22nu Levi nyi wi Gershon gei wina gikezighe nu atheghithu kenie wina nyanzhüghu thsü, 23nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhüya thsüa. 24Atsanqai hathu kepvü hana mathu dulu: 25Nithsüjjen, ma nonwa keshon, ma miewa keshon, asahyu kemehai pi ma miwi kemeju, kedulen wi keshonthsü, 26Nithsüjjen nu kekinyipen khemi-jonqhe wi keshonthsü nu ali, khemi-jonqhe wi kedulen keshonthsü, nu atsanqai hathu kesa wi kesen-jithu tsüdila. Mathu na hathu wi nsenthu keyishü kekuli tsüdi saben. 27Mosa nu Aaron manyi na wala Aaron nu ma tsathu na kekuli pi Gershon nyithu nondi kechi tsü tsüdila sala nsa khe ghang ben. 28Nithsüjjen wi kekuli hathu hana Gershon gei nyithu dulu: keqhaikediwa Aaron tsa Ithamar kekhu wi mathu na kekuli ha saben.
Levi Nyi Wi Merari Gei Kekulithu
29Apvüwa na Mosa kiza nu Levi nyi wi Merari gei wina gikezighe nu atheghithu kenie wina nyanzhüghu thsü, 30nu npvüza amapi changha na wa deni jüwi Apvüwa ketenpen Nithsüjjen wi kekuli kesa qo nyi nyan tsüdi zhüya thsüa. 31Atsanqai hathu kepvü hana mathu dulu: Ajjen- chan, ameghethu, donbvü, zenza, kecetenji, 32nu Nithsüjjen khemi-jonqhe shonkevüli ghena ali pi tsü kepieki ji sa keten tsanqai tsüdi. Meshu kesüsü atsanqai kesüsü pvüben. 33Nithsüjjen wi mathu kekuli hathu hana Merari gei nyithu dulu: keqhaikediwa Aaron tsa Ithamar kekhu wi mathu na atsanqai tsüthu tsü pvüben.
Levi Nyithu Nyanzhügho
34-48Apvüwa na ahza khukechi kenie wina Mosa, Aaron, nu azitenti ccülikesathu na Levi nyi agei kecheng Kohath, Gershon, nu Merari nyithu nyanzhüghuya. Mathu na atheghithu kenie wina npvüza tsüdi amapi changha na wa deni jüwi Apvüwa ketenpen Nithsüjjen wi kekuli kesa qo nyi nyanzhüghu na hati:
| Agei | Anyi |
|---|---|
| Kohath | 2,750 |
| Gershon | 2,630 |
| Merari | 3,200 |
| Maben | 8,580 |
49Apvüwa na Mosa kekiza ti anyi kesüsü nyan tsüdi zhüya, nu Apvüwa na ahza khuchi pi Mosa kecü ti anyi kesüsü ma kekulile kepvükepie lela akhhiwa tsüpi gishü chi.
Currently Selected:
SHICÜSI 4: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
