SHICÜSI 3
3
Aaron Tsathu
1Apvüwa na Sinai Yikha wi Mosa keccüneng tsü wi hathu hana Mosa nu Aaron theghithu. 2#Scs 26.60. Aaron na atsa mejü ben: keqhai ntsawa na Nadab, tsaseng wi Abihu, Eleazar, nu Ithamar. 3Adeli pi mathu nyen nu satemetha pi keqhaikedithu sa thsü, 4#Lev 10.1-2; Scs 26.61. isala Nadab nu Abihu manyi na Sinai yyikeshü wi anni nkemetha pi Apvüwa kekinyi ghena shü. Manyi na atsanga nmi, tsalina Eleazar nu Ithamar manyi na Aaron kahang tsüwi keqhaikedi kekuli sa.
Levi Nyithu Pi Keqhaikedi Kekuli Kesa thsü
5Apvüwa na Mosa wi kiza, 6“Levi mizza ssighola mathu pi keqhaikediwa Aaron ketsikinathu sa thsülo. 7Mathu na hi ketenpen Nithsüjjen wi kekuli nsathu keyishüthu sa nu anyi maben ghena keqhaikedithu kekuli tsü sa thsülo. 8Mathu na Nithsüjjen wi atsanqaithu tsüdila noncca nu Israel nyi kepathu ghena kekulithu tsü saben. 9Levi nyithu duluwa tsüna Aaron nu ma tsathu kekuli kesa ketan. 10No Aaron nu ma tsathu ya keqhaikedi kekuli sa thsü, anyi kepa wi thowa na tsüti sale sa khe ma pi shü thsüaben.”
11Apvüwa na Mosa kiza, 12-13#Bvü 13.2. “Levi nyithu na khilitsü iji sadha. Hi Ejipt nyi tsa tssütsethu tsüdi pathi kesa wi hi Israel nyi jjenku tsüdi wi atsa tssütsethu nu asahang zza tssütsethu satemetha pi iji sadha. Khilitsü Israel nyi tsa tssütsethu mithon wi Levi nyithu na iji sadha; mathu na iji sadha. Hi Apvüwa.”
Levi Nyithu Nyankezhüghu
14Sinai yyikeshü wi Apvüwa na Mosa kiza 15nu agei nu atheghi kenie wina Levi nyithu nyan zhüya, atsa kahang asha kesü nu tsümiwi keqhaiki tsüdila saghu, 16nu Mosa na tsüti saya. 17-20Levi na atsa kecheng ben: Gershon, Kohath, nu Merari; mathu na mathu mizza bamyithu nyan keci. Gershon na atsa keni ben: Libni nu Shimei; Kohath na atsa mejü ben: Amram, Izhar, Hebron, nu Uzziel; nu Merari na atsa keni ben: Mahli, nu Mushi. Mathu na mathu bamyi nyan keci.
21Gershon gei na Libni nu Shimei theghithu saghu. 22Npvüza asha kesü nu tsümiwi keqhaiki tsüdi saghula 7,500. 23Agei hawa na Nithsüjjen seng wi niduwa, 24Lael tsa Eliasaf na aliwa sala kemnanpen sa. 25Mathu na Nithsüjjen, anonwa keshon, ameiwa keshon, kedulen wi keshonthsü, 26Nithsüjjen nu kekinyipen shonkevülithsü, nu ciwi kedulen keshonthsü tsüdila nonccaben. Mathu na hathu ghena kekuli tsüdila sa.
27Kohath gei na Amram, Izhar, Hebron, nu Uzziel theghithu saghu. 28Npvüza asha kesü nu tsümiwi keqhaiki tsüdi saghula 8,600. 29Agei hawa hana Nithsüjjen na acülawa kemnanpen saben. 30Uzziel tsa Elizafan na tsü gei wi aliwa sa. 31Mathu na Cenkethenjüh Khitson, miz, ahula kedonpen, kekinyipen, keqhaikedithu ghena Kemetha Pen wi kesenji ahyikhuthu, nu Kemetha ntsa Pen wi kedulen keshonthsü tsüdi noncca ben. Mathu na hathu ghena kekuli tsüdila saben.
32Levi nyithu ja wi kediwa na keqhaikediwa Aaron tsa Eleazar. Ma Kemetha Pen wi kekuli kesathu miwi kediwa.
33Merari gei na Mahli, nu Mushi theghithu saghu. 34Npvüza asha kesü nu tsümiwi keqhaiki tsüdi saghula 6,200. 35Agei hawa hana Nithsüjjen na aghawa Abihail tsa Zuriel na agei miwi aliwa sala kemnanpen sa. 36Mathu pi Nithsüjjen chanthu, ma khukhithu, donbvü, zenza, nu ma keghejithu tsüdi noncca thsü. Mathu na hathu ghena kekuli tsüdila sa thsü. 37Mathu na accühha ameiwa ghena ma donbvü, zenza, kecetenji, nu ali la tsüdi noncca thsü.
38Mosa, Aaron nu ma tsathu na Nithsüjjen tu nishuwa kemnanpen sa. Mathu na Kemetha Pen wi Israel nyithu ghena kekulithu tsüdi sa. Anyi kepa thowa na tsü sale sa khe ma pi shü thsüaben. 39Levi nyithu npvüza tsüdi asha kesü nu tsü miwi keqhaiki Apvüwa na Mosa kekiza ti ageithu wi nyanzhüghu keya na 22,000.
Levi Nyithu Na Atsa Tssütsethu Mithon Sayakesa
40-41Apvüwa na Mosa kiza, “Israel nyi tsa tssütsethu tsüdila iji. Tsalina Israel nyi tsa tssütsethu asha kesü nu tsü miwi keqhaiki tsüdi nyan zhüyalo. Isala mathu mithon wi Levi nyithu tsüdi ijile kesa hi nkaben! Hi Apvüwa le! Asahang zza tssütsethu tsüdi mithon wi Levi nyithu sahang la ijile kesa nkaben!” 42Mosa na jühkina nu atsa tssütsethu tsüdi nyanzhüghuya, 43asha kesü nu tsümiwi keqhaiki tsüdi saghula 22,273.
44Apvüwa na Mosa kiza, 45“Khili Israel tsa tssütsethu tsüdi mithon wi Levi nyithu satemetha pi iji sa thsülo, nu Israel nyithu sahang zza tssütsethu mithon wi Levi nyithu sahang la satemetha chilo. 46Israel nyi tsa tssütsethu na 273 Levi nyithu miwi jiki kesalina nthu na atsa tssütsethu gilli tsü shüyalo. 47Tsü tsüwi apisa men kenie wina meshu kesü wi rükatssü manga saben, 48nu apisa tsüpi Aaron nu ma tsathu cülo.” 49Mosa na jühkina nu rükatssü 501,365 khuya, 51nu tsüpi Aaron nu ma tsathu cüa.
Currently Selected:
SHICÜSI 3: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
