MATHI 19

Jisu na Awubvü Keyisha Cüki Pi Kesansi

(Mrk 10.1-12)

1Jisu na ajüh hathu ha khicen kesa seng wi Galilee teshi theng nu Judea yyi wi Jordan Ghaku khhakawa wi wa. 2Anyitenti keti na ma nie wa nu ma ciwi mathu tsüdila sa pi mehai cü.

3Farisithu pahan na gho ma wi hati keü nu ma ghan-nan le sa, “Anyi kesü ajjügi katsüha wina lela ma wubvü teshi mvu lethu ma tsü teshi kesa ayen benla nmi nu?”

4 # Ade 1.27; 5.2 Jisu na khineng, “Nthu na Ntsawajüh wi Anyiza na adechhü wina anyi nza nu npvüza sahang chile khi keben tsü si meya kwe? 5#Ade 2.24 Anyiza na khi, ‘Ha jjügi ghena npvüza na ma bajja teshi nu wala ma wubvü manyi ben waben, nu manyi na asajjü kesütan saben.’ 6Tsalina manyi na keni nyedha isala kesütan sadha. Anyiza na zanghu kethengwa tsü anyi na tsü sa pi kepapa sa yishü.”

7 # Aye 24.1-4; Mat 5.31 Farisithu na ma wi keü, “Isathu, Mosa na mangkesa npvüza kesü na keyisha lesü pi ma wubvü cü nu yisha thsülo kesa ayen khuchi nu?”

8Jisu na luneng, “Nthu na sansidhu ntsa kesa ghena Mosa na nthu yala nthu wubvüthu teshi thsüle, isala adechhü sahang kechi wi tsü tsüti nsale. 9#Mat 5.32; 1 Kor 7.10-11 Hi nthu kizaden, keujüla anyi kesü ma wubvü na nketsatan nsa lela yisha nu nza kepa wi yaya lethu ma keqheza sadha.”

10Ma sansikeyathu na ma wi khi, “Keujüla wubanyi jüwi tsüti lethu tsüna keshanyi nkesawa mehai.”

11Jisu na luneng, “Kesansijüh hawa ha anyi tsüdi ghena nye, isala Anyiza na pi cü kethengthu ghena ketan le. 12Kepaghenanye anyi keshanyi nkesa ma jjügi kepapa kesa na ben: pahan na, mathu tsüti kesa len wi pvügha theng; kepathu na anyithu na mathu sa pi tsüti sa thsü theng; nu kepathu na mathu tang Kadiyyi ghena keshanyi nsa. Thowa na kesansijüh ha yaya mehai khe ma ya tsüti saya thsülo.”

Jisu na Sawegü Pi Ghanyithu Kecü

(Mrk 10.13-16; Luk 18.15-17)

13Anyi pahan na ghanyithu ssinu Jisu wi gho nu ma ya ma kwen chang pi mathu miwi chi nu mathu ghena khie thsüle sa, isala sansikeyathu na anyithu ssikitagha. 14Jisu na khi, “Ghanyithu tsü nkhenla nu hi wi gho thsülo, kepaghenanye tang Kadiyyi na hathu hati kesathu ji saben.”

15Ma ma kwen chang pi mathu miwi sawegü chi, nu tsaseng wi bvüa.

Keban Pvünyiwa

(Mrk 10.17-31; Luk 18.18-30)

16Kuti anyi kesü Jisu wi gho nu hati keü, “Kesansiwa, hi anuphan kahang muyale kesalina kemehai mangwa nsathu yishü nu?

17Jisu luneng, “No mangkesa na kemehaiwa cüki hi keüben nu? Ciwi Kemehaiwa kesütan benle. No anuphan kahang muya mvu lethu ayenkhukechithu tsü nieyalo.”

18 # Bvü 20.13-16; Aye 5.17-20; Bvü 20.13-16; Aye 5.17-20 Ma keü neng, “Mangwa yenkhukechithu nu?”

Jisu luneng, “Nyu npathi la; nqheza la; n-ghanfü la; milikemesa wi nyu ssi nkitagha la; 19#Bvü 20.12; Aye 5.16; Lev 19.18 nbajja kinyiküya; nu no ketanla no ketizen ti njenshüjenphon tizenyalo.”

20Kepvünyiwa tsüna khineng, “Hi ayenkhukechi ha tsüdi nie yadha. Hi he la mangwa nsathu yishüben nu?”

21Jisu ma wi khi, “Keujüla no haicenya mvu lethu wala no keben tsüdi jeü nu apisa pi ketha-u cülo, isathu no tang wi ben ntsa sayaben; tsaseng wi gho hi nie ghalo.”

22Kepvünyiwa tsüna ha zakeya seng wi ma hathanathi bvüa, kepaghenanye ma keban ntsa kesü.

23Tsaseng wi Jisu na ma sansikeyathu wi kiza, “Hi nthu kizaden, keban kesü tang Kadiyyi wi dule kesa na dhu mtsü. 24Hi khineng ben, keban kesü na Anyiza Kadiyyi wi dule kesa na sunsiesa kesü na aghaceng ku wi keshhuwa la le.”

25Sansikeyathu na ha zakeya wi mathu mansa ntsa nu keü, “Isathu, thowa hangshakeya muya mehai nu?”

26Jisu na mathu ghang nu luneng, “Hawa ha anyi ghena saya nben, isala Anyiza ghena tsü pala tsüdila saya mehai.”

27Tsaseng wi Pitor na khi, “Ghangchilo, ikhang na pala tsüdila teshi nu no nie tenle. Ikhang na mangwa muya ben nu?”

28 # Mat 25.31; Luk 22.30 Jisu na mathu wi kiza, “Hi nthu kizaden, kahang ketheüwa wi Anyi Tsawa na ma nyankethang kadipen wi donkiya lethu nthu hi nie ketenthu Taghakeni la kadipen wi donki nu Israel mizza taghakeni miwi kekhang sen ben. 29Anyi thowa na ighena ajjenthu, acünyuthu, atssüggüthu, abajja, atsangathu, nu allithu teshi khe ma tsü miwi kishen meza mu nengya ben, nu anuphan kahang pi cüben. 30#Mat 20.16; Luk 13.30 Isala khili atu sa kebenthu kejon na asakhen saben, nu khili asakhen sa kebenthu kejon na atu saben.

Currently Selected:

MATHI 19: RENGNBSI

Highlight

Copy