LEVIYEN 19
19
Ketsatan Nu Kemetha Yenthu
1Apvüwa na Mosa kiza nu 2#Lev 11.44,45; 1 Pi 1.16. Israel nyithu wi khi thsü, “Methasi benlo, kepaghenanye hi nthu Nyiza Apvüwa hi methaben. 3#Bvü 20.12; Aye 5.16; Bvü 20.8; Aye 5.12. Hi kekhi ti nthu kesüsü nthu ba nu nthu jja nyuwakü nu Sabbath yen tsü nielo. Hi nthu Pvüwa Anyiza.
4 #
Bvü 20.15; Aye 5.19; Bvü 20.16; Aye 5.20. “Hi teshi nu wa atsikezhü nkinyila; amighe pi atsaghangthu zhü nu tsüthu tsü nkinyila. Hi Apvüwa nthu Nyiza.”
5Nthu khathansha wi asahang pathi pi kecca ghena kekinyi sa khe, hi ayen pi nthu kecüthu tsü nielo isathu hi kekinyi tsü yaben. 6Asahang kepathi ghanan nyelela dhitsüwa wi ma sa tsü dsalo. Kecheng ghanan wi la asa tsü ben lethu pi mecanglo, 7kepaghenanye tsüna keccüna wi nmetha ladha, anyi kesüla tsü dsa lethu hi ma kekinyiwa tsü ya nben. 8Thowa na tsü dsa khe ma satemetha pi hi cü kesawa tsüpi ghameme kesa ghena sazziben, nu ma pi inyi kesüle nsa laben.
9“Nthu khathansha wi nthu lli wwi khe alli khutsukhuna wi asu tsü nwwila, nu nthu kheneng wa amaseng tsü nbhala. 10Kheneng nlli wi wa kemeshentsse maseng nyelela ma bi ayyi wi keqancathu tsü nbhala; tsüthu teshi pi ketha-uthu nu asangthu cülo. Hi Apvüwa nthu Nyiza.
11“N-ghanfüla, nyu nmechula, nu mili-nmesala. 12#Bvü 20.7; Aye 5.11; Mat 5.33. Nthu na saya nben lethu inyan wina ajüh nkhuchila; tsüna inyan kekinyen sengho ben. Hi Apvüwa nthu Nyiza.
13 #
Aye 24.14,15. “Meshu kesü miwi la ma nanketizen ghe sala nthu kekiyi nbhala nyelela ma nteng dsala. Nthu na ssinu melli kaghawa kutimen ghaja kesüla pi ncüla theng nsala. 14#Aye 27.18 Akhuna kedecu nyi nkishencüla nyelela pala pi anyon nkemuwa tuwi chi nu ma ccü nmeshü thsüla. Hi kinyikülo; hi Apvüwa nthu Nyiza.
15 #
Bvü 23.6-8; Aye 16.19. “Ajühkekaghakhi wi atsentsa nu kemeshon wina khidhilo; ketha-uwa nkhichi nu kebenwa messi nsa lalo. 16Meshu kesü ghü la nsala; anyi kesü ma kahang ghena ajühkaghakhi keben wi nsheikepi jüh ma kiqaya ben lethu khichilo. Hi Apvüwa.
17 #
Mat 18.15. “Nleben wi thola meshensa nbenla, isala ma ssi keccünengli nu südheya, isathu nthu ma ghena kesami sa nben. 18#Mat 5.43; 19.19; 22.39; Mrk 12.31; Luk 10.27; Rom 13.9; Gal 5.14; Jos 2.8 Anyi tho miwila ajukhi meyala nyelela ma nanmeghüki nbenla, isala nthu ketanla nthu ketizen ti njenphonwa la tizenya. Hi Apvüwa.
19 #
Aye 22.9-11. “Iyenthu tsü nie yalo. Nsahangthu pi alen kepapa njigü thsüla. Amacü alen kepapa keni meyighu pi alli wi nchila. Athsü kesü wi anan len kepapa keni de nmephila.
20“Keujüla maghale kesü nyu meshibvüwa sa nu ma men pi ma ncüla teshichi, nu anyi kepa wi ma ssimehai lethu manyi qho kemeten pi cüben, isala pi shü thsü nben, nzawa ma nyu maghale kesü ghena. 21Npvüzawa na khaghaneni süpon sen nu ma kedhineng kekinyi ghena hi ketenpen Nithsüjjen kedulen wi gho, 22nu keqhaikediwa na tsüpi anyi tsüwa kesami khupiale kesalina satekemetha keccüna sa chithu Anyiza na ma kesami teshi cüben.
23“Khathansha wi nthu na Kanaan yyi wi gho nu kedsauton pi yangya khe, kedsau bi tsü atuwa amapi kecheng jüwi keccüna wi nmethale sayalo. Tsü tsüwi nthu na tsü ndsala. 24Mejü mapi wi kedsau bi tsüdi pi hi Apvüwa, keseng wina satekemetha kekinyi kesü keccüna sa chiben. 25Nthu na manga mapi wi ccüna ma bi tsü dsaya mehai. Nthu na ha tsüdi sa lethu nthu chanton ma bi kejon bün cüben. Hi Apvüwa nthu Nyiza.
26 #
Ade 9.4; Lev 7.26,27; 17.10-14; Aye 12.16,23; 15.23; Aye 18.10. “Ajjü na asa wi keben tsü ndsala. Kedema kekuli mangla nsala. 27#Lev 21.5; Aye 14.1. Nthu na alatan ssen ca nyelela apang kenye ce nsala. 28Nthu hyu miwi pala zhüki pvü nyelela keshü ghena anongü nu nthu sa handhi pvü tsüti nsala. Hi Apvüwa.
29 #
Aye 23.17. “N-ngathu pi kekinyijjen wi keqheza menkedsa #19.29: Kekinyijjen wi keqheza menkedsa; Kanaan nyithu kekinyijjen wi nza hathu ha muyaden, aghasu cenpvüthu kinyi keten pen wi. Nza hathu ha ssimehai lethu aghasu ghaben nu pvüyaben kesa nondiden nza sa nu anyankinyen nsa thsüla; nthu tsüti sa lethu nthu na atsaghang kepathu wi wa nu hang nkemetha na ayyi pong shaben. 30Sabbath yen nieya, nu hi kekinyipen tsü nyuwakülo. Hi Apvüwa.
31 #
Aye 18.11; 1 Sam 28.3; 2 Kad 23.4; Isa 8.19 “Anyi keshü ghamuthu ccüneng ketenthu wi kesansi bha nwala. Nthu tsüti sa lethu nthu na keccüna wi nmetha laben. Hi Apvüwa nthu Nyiza.
32“Kenyuwakü pi anyi keqhaithu cü nu mathu jühkina tenlo. Kinyikü nu ijühkinalo. Hi Apvüwa.
33 #
Bvü 22.21; Aye 24.17,18; 27.19. “Nthu yyi wi hang keben asangthu tsü metenmesha nsala. 34Mathu pi nthu Israel nyi ti sayalo, nu nthu ketanla nthu ketizen ti mathu tizenyalo. Nthu la kuti jüwi Ejipt wi asang sa nu kahang tsü chüyalo. Hi Apvüwa nthu Nyiza.
35 #
Aye 25.13-16; Kem 20.10; Ezk 45.10. “Milikemesa sen nu ketikesie kedegü, kiyan-kembhi, nyelela keji-kezeng whu kesa wi nkecen wi thola nmechula. 36Kewhuchan tsentsa, kewhu tsentsa, nu kedegü tsentsa salo. Hi Apvüwa nthu Nyiza, nu hi Ejipt wi nthu khushi cü. 37Iyen khukechi tsüdila nie yalo. Hi Apvüwa.”
Currently Selected:
LEVIYEN 19: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
