LEVIYEN 18
18
Nza kegweghe Kekhen
1Apvüwa na Mosa kiza nu 2Israel nyithu wi khi thsü, “Hi nthu Pvüwa Anyiza. 3Nthu na kheni kahang pen wi Ejipt nyithu nyelela hi khili nthu ssinu wa keten Kanaan yyi wi anyithu kahang kekuliyen tsü n-niela. 4Iyenthu nie nu hi kekhi salo. Hi nthu Pvüwa Anyiza. 5#Neh 9.29; Ezk 18.9; 20.11-13; Luk 10.28; Rom 10.5; Gal 3.12. Hi pi nthu kecü kahangyen nu ayenthu tsüdila nielo; tsüti kesa wina nthu kahang hangsha yaben. Hi Apvüwa.”
6Apvüwa na ayen hathu khuchi. Nshilithu tsü kesüla ssimehai nsala. 7Njja ssikemehai ghena nba nyankenyen nsala. No njja nyankenyen yishü. 8#Lev 20.11; Aye 22.30; 27.20. Nba wubvü kesüle kesü lela ssikemehai ghena ma nyankenyen nsala. 9#Lev 20.17; Aye 27.22. Ntsüggüwa sale nba nga nyelela njja nga ajjen makesü nyelela kepapa wi hang keshaghawa sa lela no ma ssimehai nsala. 10Ntsangathu nga ssimehai nsala; tsüna n-nyankenyen ben. 11No nba wubvü ngawa ssimehai nsala; ma la ntsüggü kesü. 12-13#Lev 20.19,20. Anyie, nba tssüggü sale njja pvünon sa lela ssimehai nsala. 14Nbiza wubvü ssimehai nsala; ma la njja kesü. 15#Lev 20.12. Ncünyie ssimehai nsala. 16#Lev 20.12. Ncüh ssimehai nsala. 17#Lev 20.14; Aye 27.23. No nza kesü pi ma ngawa manyi qho ssimehai nsala; mathu na nshilithu saben laya mehai, nu tsüna nankiqanan kekuli saben. 18Nwubvü na hang keben chu ma pvünonwa yapi nwubvü kesü nsala.
19 #
Lev 20.18. Nza kesü asha kaghapeng nzayen sa keben wi ma ssimehai nsala, kepaghenanye ma keccüna wi nmetha laben. 20#Lev 20.10. Nyu kepa wi wubvü ssimehai nsala, tsüna no sapi keccüna wi nmetha thsü laben. 21#Lev 20.1-5. Ntsangathu kesütanla pi Molek tsaghang kekinyi nsen thsüla; kepaghenanye tsüna Apvüwa Anyiza nyankenyen sengho ben. 22Npvüza kesü na npvüza kepawa ssimehai nsala; Anyiza na tsü nanmeghüden. 23#Bvü 22.19; Lev 20.15,16; Aye 27.21.Nzale npvüza lela asahang ssimehai nsala; kesazzi tsü no sapi keccüna wi nmetha thsü laben.
24Kekuli hathu ha kesa wina nthu ketanla nthu sapi nmethala nsala, kepaghenanye Anyiza nkechüthu na hati nu mathu ketanla mathu sapi nmethala; Anyiza nkechüthu tsüna nthu tuwi na ayyi ciwi hang wadha nu nthu yala ciwi duya thsüle kesalina Apvüwa na mathu jügüshiaben. 25Mathu kahangyen na ayyiwa tsü sapi nmetha thsüla, tsalina Apvüwa na kemeten pi cü nu ayyiwa tsü ya anyi ciwi kahangthu meshusha thsüa. 26-27Mathu na nankiqanan kekuli ha tsüdi sapi ayyiwa nmetha thsüla, isala nthu tsü tsüthu tsü nsala. Nthu tsüdi, Israel nyithu sale asang nthu gweghe hang kebenthu sa lela Apvüwa yenthu nu ma khi kechithu tsü n-niethu yishü, 28nu ayyiwa na nthu tuwi kahang Anyiza nkechüthu meshusha kesa ti nthu la meshusha nsa thsüla. 29Anyi thowa na nankiqanan kekuli hathu ha sa khe ma pi Anyiza nyi kesüle nsa laden.
30Apvüwa na khi, “Hi ayen khukechithu tsü nielo nu anyi nthu tuwi na ayyi ciwi hang ketenthu kekuli yen tsü n-niela, nu hathu ha kekuli ghena nthu sapi nmethala nsala. Hi Apvüwa nthu Nyiza.”
Currently Selected:
LEVIYEN 18: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
